മണിപ്പൂരിലെ സുരക്ഷാ സാഹചര്യം വിലയിരുത്താന് നിര്ദ്ദേശം... നിയമം കൈയിലെടുക്കുന്നവര്ക്കെതിരെ കര്ശന നടപടി സ്വീകരിക്കുമെന്ന് അമിത് ഷാ
മണിപ്പൂരിലെ സുരക്ഷാ സാഹചര്യം വിലയിരുത്താന് ആഭ്യന്തര മന്ത്രി അമിത് ഷായുടെ നേതൃത്വത്തില് ഉന്നതതല യോഗം ദില്ലിയില് നടന്നു. സംഘര്ഷം തുടരുന്ന മണിപ്പൂരില് ചര്ച്ചയ്ക്ക് തീരുമാനിച്ച് കേന്ദ്രസര്ക്കാര്. അമിത് ഷാ വിളിച്ച ഉന്നതതല യോഗത്തിലാണ് തീരുമാനം. കുകി, മെയ്തെയ് വിഭാഗങ്ങളുമായി കേന്ദ്ര ഉദ്യോഗസ്ഥര് ചര്ച്ച നടത്തും. നിയമം കൈയിലെടുക്കുന്നവര്ക്കെതിരെ കര്ശന നടപടി സ്വീകരിക്കാനും അമിത് ഷാ യോഗത്തില് നിര്ദേശിച്ചു. ആവശ്യമെങ്കില് കൂടുതല് സേനയെ വിന്യസിക്കാനും യോഗത്തില് തീരുമാനമായി.
ആഭ്യന്തര മന്ത്രാലയത്തില് നടക്കുന്ന യോഗത്തില് കരസേനാ മേധാവി ജനറല് മനോജ് പാണ്ഡെ, കേന്ദ്ര ആഭ്യന്തര സെക്രട്ടറി അശോക് ഭല്ല, മണിപ്പുര് ചീഫ് സെക്രട്ടറി വിനീത് ജോഷി തുടങ്ങിയ ഉന്നത ഉദ്യോഗസ്ഥരാണ് പങ്കെടുത്തത്.
മണിപ്പൂരിലെ സുരക്ഷയ്ക്ക് പ്രഥമ പരിഗണന നല്കണമെന്ന് ഒരാഴ്ച മുന്പ് ആര്എസ്എസ് സര്സംഘചാലക് മോഹന് ഭഗവത് നിര്ദ്ദേശിച്ചിരുന്നു. തെരഞ്ഞെടുപ്പില് ഭരണകക്ഷിക്കേറ്റ തിരിച്ചടികളെക്കുറിച്ച് പറയുന്ന സാഹചര്യത്തിലായിരുന്നു ആര്എസ്എസ് തലവന്റെ പ്രതികരണം. അടുത്തിടെ മണിപ്പൂരില് വീണ്ടും അക്രമങ്ങള് നടന്ന പശ്ചാത്തലത്തില് കൂടിയാണ് അമിത് ഷാ യോഗം വിളിച്ചു ചേര്ത്തത്. മണിപ്പൂര് ഗവര്ണ്ണര് അനസൂയ ഉയിക ഇന്നലെ അമിത് ഷായെ കണ്ടിരുന്നു.
https://www.facebook.com/Malayalivartha
