പ്രാര്ത്ഥനകള് വിഫലമായി; സിയാച്ചനിലെ ഹിമപാതത്തില് പെട്ട് ജീവനോടെ കണ്ടെത്തിയ ഹനുമന്തപ്പ യാത്രയായി
അതിജീവനത്തിന്റെ പ്രതീക്ഷകള് വെറുതെയായി, ലാന്സ് നായക് ഹനുമന്തപ്പ (33) ഒടുവില് മരണത്തിനു കീഴടങ്ങി. സിയാച്ചിനിലെ ഹിമപാതത്തില്പ്പെട്ട് ആറാം ദിവസം രക്ഷാപ്രവര്ത്തകര് ജീവനോടെ കണ്ടെത്തിയ ഹനുമന്തപ്പ ഡല്ഹിയിലെ ആര്മി റിസര്ച് ആന്ഡ് റഫറല് ആശുപത്രിയില് വ്യാഴാഴ്ച പകല് 11.45ന് അന്ത്യശ്വാസം വലിച്ചു.
രാജ്യം മുഴുവന് പ്രാര്ഥനയോടെ കാത്തിരിക്കുകയും വൈദ്യശാസ്ത്രത്തിനു കഴിവുള്ളതെല്ലാം പരീക്ഷിക്കുകയും ചെയ്തിട്ടും ആ ധീരജവാനെ ജീവിതത്തിലേക്കു തിരികെ കൊണ്ടുവരാനായില്ല.
ത്രിവര്ണ പതാകയില് പൊതിഞ്ഞ് മൃതദേഹം ഡല്ഹി കന്റോണ്മെന്റിലെ ബ്രാര് സ്ക്വയറില് പൊതുദര്ശനത്തിനു വച്ചു. പ്രധാനമന്ത്രി നരേന്ദ്ര മോദി, കേന്ദ്ര പ്രതിരോധമന്ത്രി മനോഹര് പാരിക്കര്, ഡല്ഹി മുഖ്യമന്ത്രി അരവിന്ദ് കേജ്രിവാള്, കര, നാവിക, വ്യോമ സേനാധിപന്മാര് തുടങ്ങിയവര് ആദരാഞ്ജലികള് അര്!പ്പിച്ചു. ഹനുമന്തപ്പയുടെ മൃതദേഹം കര്ണാടകയിലെ ധാര്വാഡിലുള്ള ബേത്തുദൂര് ഗ്രാമത്തില് ഇന്നു സംസ്കരിക്കും. വ്യോമസേനയുടെ പ്രത്യേക വിമാനത്തിലാണു മൃതദേഹം എത്തിക്കുന്നത്.
ഹനുമന്തപ്പയുടെ ഭാര്യ മഹാദേവി, മകള് 18 മാസം പ്രായമുള്ള നേത്ര, അമ്മ ബസമ്മ, അച്ഛന് രാമപ്പ കൊപ്പാട് എന്നിവര് ബ്രാര് സ്ക്വയറില് മൃതദേഹത്തിനരികില് കണ്ണീരണിഞ്ഞിരുന്നു. ഇക്കഴിഞ്ഞ മൂന്നിനു സിയാച്ചിനിലെ ഹിമപാതത്തില്പ്പെട്ടു മരിച്ചെന്നു കരുതിയ ഹനുമന്തപ്പയെ ഒന്പതിനു ജീവനോടെ കണ്ടെത്തിയപ്പോള് അദ്ഭുതമെന്തെങ്കിലും സംഭവിക്കുമെന്ന പ്രതീക്ഷയിലായിരുന്നു കുടുംബം.
'നമ്മെ ആകെ തകര്ത്തും സങ്കടത്തിലാഴ്ത്തിയുമാണു ഹനുമന്തപ്പ വിട്ടുപോകുന്നത്. താങ്കളിലെ സൈനികന് അനശ്വരനായി തുടരും. ഇന്ത്യയെ ഇതുപോലെയുള്ള രക്തസാക്ഷികള് സേവിച്ചു എന്നതുതന്നെ അഭിമാനകരമാണെന്ന് പ്രധാനമന്ത്രി നരേന്ദ്ര മോദി പറഞ്ഞു. ഹനുമന്തപ്പയിലെ സൈനികന് ഇനി വരുന്ന തലമുറകള്ക്കെല്ലാം പ്രചോദനമായി നിലനില്ക്കുമെന്ന് കരസേനാമേധാവി ജനറല് ദല്ബീര് സിങ് പറഞ്ഞു..
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha