ഇന്ത്യയ്‌ക്കെതിരെ വീണ്ടും ഭീഷണി ഉയര്‍ത്തി പാക്കിസ്ഥാന്‍ സൈനിക മേധാവി ഫീല്‍ഡ് മാര്‍ഷല്‍ അസിം മുനിര്‍. ഭാവിയില്‍ ഇന്ത്യയുമായി ഏതെങ്കിലും സൈനിക ഏറ്റുമുട്ടല്‍ ഉണ്ടായാല്‍, ഗുജറാത്തിലെ ജാംനഗറിലുള്ള റിലയന്‍സ് ഇന്‍ഡസ്ട്രീസ് ലിമിറ്റഡിന്റെ റിഫൈനറിയെ ആക്രമിക്കുമെന്നാണ് പുതിയ ഭീഷണി. ഇന്ത്യയിലെ സുപ്രധാന റിഫൈനറി ആക്രമിക്കുമെന്ന് ഒരു പാക്കിസ്ഥാന്‍ സൈനിക മേധാവി ഇതാദ്യമായാണ് ഭീഷണി മുഴക്കിയതെന്ന് ഒരു മാധ്യമം റിപ്പോര്‍ട്ട് ചെയ്തു.

യുഎസിലുള്ള പാക്കിസ്ഥാന്‍ പ്രവാസികളെ അഭിസംബോധന ചെയ്തുകൊണ്ട് നടത്തിയ പ്രസംഗത്തിലാണ് അസിം മുനീര്‍ ഇന്ത്യക്കെതിരെ പുതിയ ഭീഷണി മുഴക്കിയതായുള്ള റിപ്പോര്‍ട്ട് പുറത്തുവന്നത്. ഇന്ത്യയുമായി ഭാവിയിലുണ്ടായേക്കാവുന്ന ഏറ്റുമുട്ടലിനിടെ തന്റെ രാജ്യത്തിന് നിലനില്‍പ്പിന് തന്നെ ഭീഷണി നേരിടേണ്ടി വന്നാല്‍ ഒരു ആണവായുധ ഉപയോഗിക്കാനും മടിക്കില്ലെന്ന് നേരത്തെ അസിം മുനിര്‍ ഭീഷണി മുഴക്കിയിരുന്നു.

അതേസമയം യുഎസില്‍ വച്ച് അസിം മുനീര്‍ നടത്തിയ ആണവ ഭീഷണിക്ക് ശക്തമായ മറുപടിയുമായി ഇന്ത്യന്‍ വിദേശകാര്യ മന്ത്രാലയം രംഗത്തെത്തി. ആണവ ഭീഷണിക്ക് വഴങ്ങില്ലെന്നും ദേശീയ സുരക്ഷ സംരക്ഷിക്കുന്നതിന് ആവശ്യമായ എല്ലാ നടപടികളും സ്വീകരിക്കുന്നത് തുടരുമെന്നുമാണ് ഇന്ത്യ ഇതിനോടകം വ്യക്തമാക്കിയത്. പാക്കിസ്ഥാന്‍ സൈന്യം ഭീകരവാദ ഗ്രൂപ്പുകളുമായി കൈകോര്‍ക്കുന്നുവെന്നും വിദേശകാര്യ മന്ത്രാലയം ആരോപിച്ചു.