ബധിരയും മൂകയുമായ യുവതിയെ തട്ടിക്കൊണ്ടുപോയി കൂട്ടബലാത്സംഗം ചെയ്തു
ഉത്തര്പ്രദേശില് ബധിരയും മൂകയുമായ യുവതിയെ തട്ടിക്കൊണ്ടുപോയി കൂട്ടബലാത്സംഗം ചെയ്തു. ഉത്തര്പ്രദേശിലെ ബല്റാംപുര് ജില്ലയിലെ ഉന്നത പൊലീസ് ഉദ്യോഗസ്ഥരുടെ വീടുകളില് നിന്ന് ഏതാനും മീറ്റര് അകലെയാണ് സംഭവം. സംഭവത്തില് ഉള്പ്പെട്ട രണ്ടുപേരെ പൊലീസ് അറസ്റ്റ് ചെയ്തു.
പ്രദേശത്തെ മൂന്നോ നാലോ സിസി ടിവി ക്യാമറകള് സ്വിച്ച് ഓഫ് ചെയ്ത നിലയില് ആയിരുന്നു. എന്നാല്, പൊലീസ് സൂപ്രണ്ടിന്റെ വീടിനു സമീപം സ്ഥാപിച്ചിരുന്ന ക്യാമറയില് യുവതി ഓടുന്നതും ബൈക്ക് യാത്രക്കാര് അവരെ പിന്തുടരുന്നതും കാണാമായിരുന്നു. 14 സെക്കന്ഡ് ദൈര്ഘ്യമുള്ള ഈ വിഡിയോ ആണ് പ്രതികളെ കണ്ടെത്താന് പൊലീസിനു സഹായകരമായത്.
തിങ്കളാഴ്ച രാത്രി യുവതി തന്റെ അമ്മാവന്റെ വീട്ടില് നിന്ന് ബല്റാംപുര് ജില്ലയിലെ സ്വന്തം വീട്ടിലേക്ക് പോകുമ്പോഴാണ് സംഭവം. വിജനമായ വയലിലേക്ക് കൊണ്ടുപോയ ശേഷം രണ്ട് പ്രതികളും യുവതിയെ മാറിമാറി ബലാത്സംഗം ചെയ്യുകയായിരുന്നു എന്നാണ് മൊഴി. വൈകല്യം കാരണം യുവതിയ്ക്ക് നിലവിളിക്കാന് സാധിച്ചില്ല.
യുവതി വീട്ടില് തിരിച്ചെത്താതെ ആയതോടെ വീട്ടുകാര് അന്വേഷിച്ചിറങ്ങി. പൊലീസ് സ്റ്റേഷനില് നല്കിയ പരാതിയുടെ അടിസ്ഥാനത്തില് നടന്ന അന്വേഷണത്തില് സമീപമുള്ള വയലില് യുവതിയെ കണ്ടെത്തുകയായിരുന്നു. ജില്ലയിലെ വനിതാ ആശുപത്രിയില് പ്രവേശിപ്പിക്കപ്പെട്ട യുവതി അവിടെ ചികിത്സയിലാണ്. സംഭവത്തിന്റെ ആഘാതത്തില് നിന്ന് ഇര മോചിതയായിട്ടില്ലെന്നാണ് അധികൃതര് പറയുന്നത്. പൊലീസുമായുള്ള ഏറ്റുമുട്ടലില് പ്രതികളായ രണ്ടുപേര്ക്കും പരുക്കേറ്റു. കുറ്റം സമ്മതിച്ച പ്രതികള് ആശുപത്രിയില് ചികിത്സയിലാണ്.
https://www.facebook.com/Malayalivartha
