വിമാനത്തില്‍ യാത്ര ചെയ്യുകയായിരുന്ന യുവതിക്ക് വിമാനത്തിലെ ജീവനക്കാരനില്‍ നിന്നും നേരിടേണ്ടി വന്ന ദുരനുഭവം ചൂണ്ടിക്കാട്ടി യുവതിയുടെ പരാതി അധികൃതര്‍ നിസാരവത്കരിച്ചു. ടേക്ക് ഓഫിന് തൊട്ടുമുമ്പ് ടോയ്‌ലറ്റ് ഉപയോഗിക്കുകയായിരുന്ന യുവതിയുടെ അടുത്ത് ഇന്‍ഡിഗോയുടെ കോപൈലറ്റ് അനുവാദമില്ലാതെ കയറുകയായിരുന്നു. സംഭവം പുറത്തായതോടെ സാമൂഹിക മാധ്യമങ്ങളില്‍ വന്‍ പ്രതിഷേധം ഉയര്‍ന്നിട്ടുണ്ട്.

പ്രതിഷേധം ശക്തമായതോടെ ഇന്‍ഡിഗോ എയര്‍ലൈന്‍സ് ക്ഷമാപണവുമായി രംഗത്തെത്തി. ജീവനക്കാരന്റെ ഭാഗത്ത് നിന്നുമുണ്ടായ പിഴവില്‍ ഖേദിക്കുന്നുവെന്നും എയര്‍ലൈന്‍സ് അറിയിച്ചു. പക്ഷേ, ഈ ക്ഷമാപണം സോഷ്യല്‍ മീഡിയയില്‍ കൂടുതല്‍ പ്രതിഷേധത്തിന് കാരണമായി. 'ഇത് ഭയാനകമാണ്. ആരും ഇങ്ങനെയൊരു അതിക്രമത്തിലൂടെ കടന്നുപോകാന്‍ പാടില്ലായിരുന്നു, സംഭവം കൈകാര്യം ചെയ്ത രീതി ഇതിനെ കൂടുതല്‍ വഷളാക്കുന്നു,' ഒരാള്‍ അഭിപ്രായപ്പെട്ടു. ടോയ്‌ലെറ്റ് ഉപയോഗത്തിലാണെങ്കില്‍ ചുവപ്പ് നിറത്തിലുള്ള സൂചകം കാണിക്കുമെന്നും, ഇതെങ്ങനെ ഒരു ഫസ്റ്റ് ഓഫീസര്‍ക്ക് അറിയാതിരിക്കുമെന്നുമാണ് സോഷ്യല്‍ മീഡിയ ചോദിക്കുന്നത്.

സ്വര്‍ണ്ണ വ്യാപാര സ്ഥാപനമായ സേഫ്‌ഗോള്‍ഡിന്റെ സഹസ്ഥാപകയും ലണ്ടന്‍ സ്‌കൂള്‍ ഓഫ് ഇക്കണോമിക്‌സ് പൂര്‍വ്വ വിദ്യാര്‍ത്ഥിനിയുമായ റിയ ചാറ്റര്‍ജിയാണ് തനിക്ക് നേരിട്ട ദുരനുഭവം ലിങ്ക്ഡ്ഇന്‍ പോസ്റ്റിലൂടെ പങ്കുവെച്ചത്. 'ഇന്‍ഡിഗോയുടെ ഒരു ഫസ്റ്റ് ഓഫീസര്‍ ഞാന്‍ ടോയ്‌ലറ്റ് ഉപയോഗിക്കുമ്പോള്‍ അകത്തേക്ക് കടന്നു വന്നു, എന്നാല്‍ സംഭവം അത്ര കാര്യമായി എടുക്കേണ്ടതില്ലെന്നാണ് എയര്‍ലൈനിന്റെ നിലപാട്' അവര്‍ കുറിപ്പില്‍ പറയുന്നു.

ഓഗസ്റ്റ് എട്ടിന് രാത്രി വൈകിയുള്ള വിമാനത്തിലാണ് റിയ യാത്ര ചെയ്തത്. വിമാനത്തിലെ മുന്‍ഭാഗത്തെ ടോയ്‌ലറ്റ് റിയ ഉപയോഗിക്കാന്‍ തുടങ്ങി. വാതില്‍ അകത്തു നിന്ന് പൂട്ടിയിരുന്നെങ്കിലും പുറത്തു നിന്ന് ആരോ മുട്ടുന്നത് കേട്ടപ്പോള്‍ റിയ പ്രതികരിച്ചു. പിന്നീട് വീണ്ടും വാതിലില്‍ മുട്ടുന്നത് കേട്ട് ഉറക്കെ പ്രതികരിക്കുന്നതിന് മുമ്പ് തന്നെ വാതില്‍ ബലമായി തുറക്കുകയും ഒരു പുരുഷ ജീവനക്കാരന്‍ അകത്തേക്ക് നോക്കുകയും ചെയ്തു. 'ഓ' എന്ന് മാത്രം പറഞ്ഞ് അയാള്‍ വാതില്‍ അടച്ചുവെന്നും റിയ പറഞ്ഞു.

സംഭവം തന്നെ അക്ഷരാര്‍ത്ഥത്തില്‍ ഞെട്ടിച്ചു കളഞ്ഞെന്നും, അപമാനഭാരം കൊണ്ട് തലകുനിച്ച് പോയെന്നും റിയ പറയുന്നു. 90 മിനിറ്റ് നീണ്ട വിമാനയാത്രയില്‍ തനിക്ക് അസ്വസ്ഥത അനുഭവപ്പെട്ടെന്നും അവര്‍ കൂട്ടിച്ചേര്‍ത്തു. എന്നാല്‍, ഇതിന് ശേഷം തന്റെ ദുരനുഭവം വിവരിച്ചപ്പോള്‍ മറ്റ് ജീവനക്കാര്‍ സംഭവം നിസ്സാരവല്‍ക്കരിച്ചെന്നും 'അസൗകര്യം' ഉണ്ടായതില്‍ ക്ഷമ ചോദിക്കുന്നുവെന്ന് മാത്രം പറഞ്ഞുവെന്ന് റിയ കുറിച്ചു. അയാള്‍ ഒന്നും കണ്ടിട്ടില്ലെന്ന് ഉറപ്പുണ്ടെന്നും ജീവനക്കാര്‍ പറഞ്ഞതായി റിയ ആരോപിച്ചു.

തുടര്‍ന്ന് ക്യാപ്റ്റനെയും ഫസ്റ്റ് ഓഫീസറെയും വിളിപ്പിക്കാന്‍ റിയ ആവശ്യപ്പെട്ടെങ്കിലും അവരെ കോക്ക്പിറ്റില്‍ പോയി കാണാനാണ് ജീവനക്കാര്‍ നിര്‍ദ്ദേശിച്ചത്. അത് കൂടുതല്‍ ആശങ്കയുണ്ടാക്കിയെന്നും റിയ പറഞ്ഞു. വിമാനം നിലത്തിറങ്ങിയ ശേഷം ഇന്‍ഡിഗോയുടെ നേതൃത്വവുമായി റിയ ബന്ധപ്പെട്ടു. എന്നാല്‍, സംഭവം അസൗകര്യമുണ്ടാക്കിയെന്നും ജീവനക്കാരന്‍ 'അഗാധമായ ഖേദം' അറിയിച്ചെന്നും മാത്രമാണ് മറുപടി ലഭിച്ചത്. നഷ്ടപരിഹാരമായി വിമാന ടിക്കറ്റിന്റെ പണവും വൗച്ചറുകളും നല്‍കാമെന്നും അവര്‍ അറിയിച്ചു. എന്നാല്‍ താന്‍ നഷ്ടപരിഹാരത്തിന് വേണ്ടിയല്ല പോസ്റ്റ് ഇട്ടതെന്നും, യാത്ര ചെയ്യുന്ന ഓരോ സ്ത്രീയും ജാഗ്രത പാലിക്കണമെന്നും റിയ പറഞ്ഞു.