ബോംബ് ഭീഷണിയെ തുടര്‍ന്ന് ലക്‌നൗ - ദമാം ഇന്‍ഡിഗോ വിമാനം അഹമ്മദാബാദില്‍ അടിയന്തരമായി തിരിച്ചിറക്കി. ഇന്ന് വൈകിട്ട് 5.45 നാണ് സംഭവം. എന്നാല്‍ വിമാനത്തില്‍ നടത്തിയ പരിശോധനയില്‍ സംശയാസ്പദമായ ഒന്നും തന്നെ കണ്ടെത്താനായില്ലെന്ന് പൊലീസ് അറിയിച്ചു.

ലക്‌നൗവില്‍നിന്ന് സൗദി അറേബ്യയിലെ ദമാമിലേക്കു പറക്കുന്ന ഇന്‍ഡിഗോയുടെ 6ഇ97 എന്ന വിമാനമാണ് അഹമ്മദാബാദിലെ സര്‍ദാര്‍ വല്ലഭായി പട്ടേല്‍ വിമാനത്താവളത്തില്‍ തിരിച്ചിറക്കിയത്. യാത്രക്കാരും ക്രൂ അംഗങ്ങളും സുരക്ഷിതരാണെന്ന് അധികൃതര്‍ അറിയിച്ചു. വിമാനത്തിനുള്ളില്‍ 'ബോംബ്' എന്നെഴുതിയ ഒരു പേപ്പര്‍ ക്രൂ അംഗം കണ്ടതാണ് ആശങ്ക പരത്തിയതെന്നാണു വിവരം. 107 യാത്രക്കാരും ആറ് ക്രൂ അംഗങ്ങളുമാണ് വിമാനത്തില്‍ ഉണ്ടായിരുന്നത്.