ലഹരി വില്‍പന കേസുകളിലെ വിതരണ ശൃംഖലയിലെ കണ്ണികളെയും പിന്തുടര്‍ന്ന് പിടികൂടി വയനാട് പൊലീസ്. മുത്തങ്ങയിലും അമ്പലവയല്‍ കോട്ടൂരിലും വ്യത്യസ്ത സംഭവങ്ങളില്‍ വാണിജ്യ അളവില്‍ എംഡിഎംഎയുമായി പിടിയിലായ പ്രതികളെ ചോദ്യം ചെയ്തു ലഭിച്ച വിവരങ്ങള്‍ അടിസ്ഥാനമാക്കി നടത്തിയ തുടരന്വേഷണത്തിലാണ് ഇവര്‍ക്ക് ലഹരി കൈമാറിയവരെയും പിടികൂടിയത്. തൃശൂര്‍, ചേലക്കര അന്ത്രോട്ടില്‍ വീട്ടില്‍ എ.കെ.ധനൂപ് (27), ബത്തേരി പള്ളിക്കണ്ടി കല്ലുവയല്‍ ജാസിം അലി (30) എന്നിവരെയാണ് പൊലീസ് അറസ്റ്റ് ചെയ്തത്.

സ്‌കൂട്ടറിന്റെ വൈസറിനുള്ളില്‍ സഞ്ചിയില്‍ ഒളിപ്പിച്ചു കടത്താന്‍ ശ്രമിച്ച 17.188 ഗ്രാം എംഡിഎംഎയുമായി ജൂലൈ 27 ന് മുത്തങ്ങയില്‍ വച്ച് കോഴിക്കോട്, രാമനാട്ടുകര തയ്യില്‍ വീട്ടില്‍ കെ. ഫഹദിനെ (25) ജില്ലാ ലഹരിവിരുദ്ധ സ്‌ക്വാഡും ബത്തേരി പൊലീസും ചേര്‍ന്ന് പിടികൂടിയിരുന്നു. ഇതിന്റെ തുടന്വേഷണത്തിലാണ് ഇയാള്‍ക്ക് ലഹരി കൈമാറിയ എ.കെ.ധനൂപിനെ ബെംഗളൂരുവിലെ ഫ്‌ലാറ്റില്‍നിന്ന് ഇക്കഴിഞ്ഞ ചൊവ്വാഴ്ച പൊലീസ് പിടികൂടിയത്.

ജൂലൈ 20 ന് അമ്പലവയല്‍ സ്‌റ്റേഷന്‍ പരിധിയിലെ കോട്ടൂരില്‍ നടത്തിയ പരിശോധനയില്‍ കല്‍പറ്റ, മുണ്ടേരി, താന്നിക്കല്‍ വീട്ടില്‍ വേണുഗോപാലിനെ(35) 124.39 ഗ്രാം എംഡിഎംഎയുമായി പിടികൂടിയ സംഭവത്തിലാണ് എംഡിഎംഎ കൈമാറിയ ബത്തേരി സ്വദേശി ജാസിം അലിയെ ബുധനാഴ്ച വൈകിട്ട് ബത്തേരിയില്‍വച്ച് അമ്പലവയല്‍ പൊലീസ് പിടികൂടിയത്.

ബത്തേരി ഡിവൈഎസ്പി എം.എം.അബ്ദുല്‍ കരീമിന്റെ മേല്‍നോട്ടത്തില്‍ ബത്തേരി സ്‌റ്റേഷന്‍ എസ്എച്ച്ഒ കെ.എസ്.അജേഷിന്റെയും അമ്പലവയല്‍ സ്‌റ്റേഷന്‍ സബ് ഇന്‍സ്‌പെക്ടര്‍ ജെസ്വിന്‍ ജോയിയുടെയും നേതൃത്വത്തിലാണ് അന്വേഷണം നടക്കുന്നത്. ഓപ്പറേഷന്‍ തൂഫാന്റെ ഭാഗമായി ലഹരിക്കടത്ത്, വില്‍പന, ഉപയോഗം എന്നിവ തടയുന്നതിനായി എല്ലാ സ്‌റ്റേഷന്‍ പരിധികളിലും വയനാട് ജില്ലാ അതിര്‍ത്തികളിലും ശക്തമായ പരിശോധന നടത്തിവരുന്നുണ്ട്. ലഹരിക്കേസില്‍ ഉള്‍പ്പെടുന്നവരുടെ സ്വത്ത് കണ്ടുകെട്ടുന്നത് ഉള്‍പ്പെടെയുള്ള നിയമനടപടികളും സ്വീകരിച്ചു വരികയാണെന്ന് പൊലീസ് പറഞ്ഞു.