കേരളത്തിൽ  സാമൂഹിക പെൻഷൻ മസ്റ്ററിംഗ് പൂർത്തിയാക്കാനായി 6,66,654 പേരുണ്ട്. അവസാന തീയതി നാളെയാണ്. മസ്റ്ററിംഗ് പൂർത്തിയാക്കാത്തവരുടെ പെൻഷൻ തടസപ്പെട്ടേക്കും. അക്ഷയ കേന്ദ്രങ്ങൾ വഴി ആധാർ അധിഷ്ഠിത ബയോമെട്രിക് സംവിധാനത്തിലൂടെയാണ് മസ്റ്ററിംഗ് നടത്തേണ്ടത്. ഇത്രയും പേർ ഒഴിവായാൽ പ്രതിമാസം 133.33 കോടി രൂപയുടെ ചെലവ് കുറയും.

1,331.42 കോടി രൂപയാണ് സാമൂഹ്യ സുരക്ഷാ പെൻഷൻ ഇനത്തിലെ ആകെ ചെലവ്.മരണപ്പെട്ടവരുടെ പേരിൽ പെൻഷൻ കൈപ്പറ്റുന്നത് തടയുന്നതിനും ഇരട്ടിപ്പുൾപ്പെടെയുള്ള ക്രമക്കേടുകൾ കണ്ടെത്തുകയും അർഹരായവർക്ക് മാത്രം ആനുകൂല്യം ഉറപ്പാക്കുന്നതിനുമാണ് മസ്റ്ററിംഗ് നടത്തുന്നത്.
കേരളത്തിൽ 66.57 ലക്ഷം പേരാണ് പെൻഷൻ കൈപ്പറ്റുന്നത്. ക്ഷേമനിധി ബോർഡുകളിൽ നിന്ന് പെൻഷൻ ലഭിക്കുന്ന 14.33 ലക്ഷം പേരുൾപ്പെടെയാണിത്. വാർദ്ധക്യ പെൻഷൻ വിഭാഗത്തിലാണ് ഏറ്റവും കൂടുതൽ പേർ മസ്റ്ററിംഗ് പൂർത്തിയാക്കാനായുണ്ട്.