പാകിസ്ഥാനിലെ ക്വറ്റയില്‍ ഉണ്ടായ സ്‌ഫോടനത്തില്‍ 15 പേര്‍ മരിച്ചു. മുപ്പതോളം പേര്‍ക്ക് പരിക്കേറ്റു. ബലൂചിസ്ഥാനിലെ ബാര്‍ അസോസിയേഷന്‍ മുന്‍ പ്രസിഡന്റ് ബിലാല്‍ അന്‍വര്‍ കാസി കൊല്ലപ്പെട്ടതിനെ തുടര്‍ന്ന് ക്വറ്റയിലെ ആശുപത്രിയില്‍ ധാരാളം അഭിഭാഷകര്‍ തടിച്ചു കൂടിയിരുന്നു. ഈ സമയത്താണ് അവിടെ സ്‌ഫോടനം നടന്നതെന്നാണ് സൂചന. സ്‌ഫോടനത്തിന് ശേഷം വെടിവയ്പുണ്ടായതായും റിപ്പോര്‍ട്ടുകളില്‍ പറയുന്നു.
ചാവേര്‍ ആക്രമണമാണ് നടന്നതെന്ന് അന്തര്‍ദേശീയ മാദ്ധ്യമങ്ങള്‍ റിപ്പോര്‍ട്ട് ചെയ്തു. ഇന്നു പുലര്‍ച്ചയാണ് കാസിയെ അജ്ഞാതര്‍ വെടിവച്ചത്. ഗുരുതരമായി പരിക്കേറ്റ കാസിയെ ആശുപത്രിയില്‍ പ്രവേശിപ്പിച്ചെങ്കിലും പിന്നീട് മരണം സംഭവിച്ചു.