ബംഗളൂരുവിലെ ബിടിഎം സെക്കന്‍ഡ് സ്റ്റേജില്‍ പ്രവര്‍ത്തിച്ചു വരുന്ന സ്വകാര്യ ആരോഗ്യ സ്ഥാപനത്തിലെ മാനേജിംഗ് ഡയറക്ടറാണ് പിറന്നാള്‍ സമ്മാനമായി സിഇഒയോടു ലൈംഗികബന്ധത്തിന് വഴങ്ങണമെന്ന് ആവശ്യപ്പെട്ടത്. വ്യക്തിഗത ഹെല്‍ത്ത് ഡാറ്റ കാര്‍ഡ് തയ്യാറാക്കുന്ന കമ്പനിയിലെ ഹൈദരാബാദ് സ്വദേശി ബ്രിസ് ജോണിനെയാണ് യുവതിയുടെ പരാതിയെ തുടര്‍ന്ന് അറസ്റ്റു ചെയ്തത്.

പിറന്നാള്‍ സമ്മാനമായി തന്നോടൊപ്പം ഒരു രാത്രി ചിലവഴിക്കണമെന്നു എംഡി ആവശ്യപ്പെട്ടതായി സ്ഥാപനത്തിലെ വനിതാ സിഇഒയുടെ പരാതിയില്‍ പറയുന്നു. വഴങ്ങിയില്ലെങ്കില്‍ പൊതുനിരത്തില്‍ നഗ്‌നയാക്കുമെന്ന് ഭീഷണിപ്പെടുത്തിയതായും, പലപ്പോഴും എംഡി ഓഫീസിലും ലിഫ്റ്റിലും വച്ച് മോശമായി പെരുമാറിയതായും പരാതിയിലുണ്ട്. കമ്പനിയില്‍ ജോലിക്കു കയറി അധികം കഴിയുന്നതിനു മുമ്പു തന്നെ എംഡി ലൈംഗികമായി തന്നെ പീഡിപ്പിക്കാന്‍ ശ്രമിക്കാറുണ്ടെന്ന് സിഇഒ പറയുന്നു.

ബ്രിസ് ജോണിന്റെ പിറന്നാള്‍ ആയിരുന്ന ഇക്കഴിഞ്ഞ ജൂലൈ 21നാണ് സംഭവം നടന്നത്. പിറന്നാള്‍ സമ്മാനമായി തന്റെ കൂടെ ഒരു ദിവസം തന്റെ റൂമില്‍ ചെലവഴിക്കണം എന്ന് എംഡി ആവശ്യപ്പെട്ടു. വഴങ്ങിയില്ലെങ്കില്‍ കമ്പനിയുടെ ലാഭവുമായി സഹകരിക്കില്ലെന്നും പറഞ്ഞു, ദിവസങ്ങള്‍ക്കു ശേഷം എംഡി ഓഫീസില്‍ വച്ച് കടന്നു പിടിച്ചതായും സമ്മതിച്ചില്ലെങ്കില്‍ നടുറോഡില്‍ നഗ്‌നയാക്കുമെന്ന് ഭീഷണിപ്പെടുത്തുകയും ചെയ്തു. ഓഗസ്റ്റ് 1നു ഇയാള്‍ ചെന്നൈയിലേക്ക് തന്നോടു കൂടെ ചെല്ലണമെന്നു പറയുകയും ചെയ്തു. നിരന്തരമായ ഇയാളുടെ പീഡനം സഹിക്കാന്‍ കഴിയാതെ വന്നതോടെയാണ് യുവതി പരാതി നല്‍കിയതെന്ന് പറയുന്നു.

ഹൈദരാബാദ് സ്വദേശിയായ ബ്രിസ് ജോണിനു 53 വയസ്സുണ്ട്, സിഇഒ ഇയാളുടെ സുഹൃത്താണെന്നും മുന്‍പ് ഒരുമിച്ച് ജോലി ചെയ്തിരുന്നവരാണെന്നും പൊലീസ് പറയുന്നു. ഭര്‍ത്താവുമായി അകന്നു കഴിയുന്ന ഇവര്‍ ജോണുമായി അടുത്തത് ഈ ഓഫീസില്‍ എത്തിയപ്പോഴാണ്. ബിസിനസ് ട്രിപ്പ് എന്ന പേരില്‍ ഇരുവരും പല തവണ തിരുവനന്തപുരം, ചെന്നൈ അടക്കമുള്ള സ്ഥലങ്ങളിലേക്ക് യാത്ര പോയിട്ടുള്ളതായും പൊലീസ് പറയുന്നു.