എന്തും സംഭവിക്കാം ഇന്ത്യയുടെ പ്രാര്‍ത്ഥനക്കൊപ്പം ഭാഗ്യംകൂടി തുണച്ചാല്‍ മാത്രമേ സിന്ധുവിന് സ്വര്‍ണ്ണത്തില്‍ മുത്തമിടാനാകൂ. ഒളിമ്പിക്‌സ് ബാഡ്മിന്റണ്‍ ഫൈനലില്‍ 130 കോടി ജനങ്ങളുടെ പ്രാര്‍ത്ഥനയുമായി കളത്തിലിറങ്ങുന്ന പിവി സിന്ധു നേരിടുന്നത് ചില്ലറക്കാരിയെ അല്ല. വനിത വിഭാഗം ബാഡ്മിന്റണില്‍ ലോക ഒന്നാം നമ്പര്‍ താരം സ്‌പെയിനിന്റെ കരോലിനാ മാരിന്‍ ആണ് സിന്ധുവിനെ കാത്തിരിക്കുന്നത്. ഇന്ത്യയുടെ ഒന്നാം നമ്പര്‍ ബാഡ്മിന്റണ്‍ താരം സൈന നെഹാവാള്‍ ഏറ്റവും അധികം ഭയപ്പെടുന്ന എതിരാളി കൂടിയാണ് കരോലിനാ മാരിന്‍. സൈനയയെ തുടരെ തുടതെ തോല്‍പിക്കുന്ന ഇവര്‍ ഇന്ത്യന്‍ ആരാധകരുടെ സ്ഥിരം കണ്ണിലെ കരടാണ്.
2014ലും 2015ലും ലോക ചാമ്പ്യന്‍ഷിപ്പ് സ്വര്‍ണം നേടിയ കരോലിനാ ചൈനീസ് ആധിപത്യം തകര്‍ത്താണ് ബാഡ്മിന്റണ്‍ ലോകം കീഴടക്കിയത്. ഇതോടെ 2014ല്‍ തന്നെ ലോകചാമ്പ്യനാവുന്ന ആദ്യ സ്പാനിഷ് താരമെന്ന റെക്കോര്‍ഡും മൂന്നാമത്തെ യൂറോപ്യന്‍ താരമെന്ന നേട്ടവും കരോലിനാ സ്വന്തമായി.
2009ല്‍ പതിനാറാം വയസില്‍ ഐറിഷ് ഇന്റര്‍നാഷണലില്‍ കിരീടം നേടിയതോടെയാണ് ബാഡ്മിന്റണ്‍ ലോകം മാരിനെ ശ്രദ്ധിച്ചു തുടങ്ങിയത്. 2011ല്‍ ഫിന്‍ലന്‍ഡില്‍ നടന്ന യൂറോപ്യന്‍ ജൂനിയേഴ്‌സില്‍ ഒറ്റ ഗെയിം പോലും വിട്ടുകൊടുക്കാതെ കിരീടം നേടി മാരിന്‍ വീണ്ടും വാര്‍ത്ത സൃഷ്ടിച്ചു.
ബാഡ്മിന്റണില്‍ 2013ല്‍ ചൈനയില്‍ നടന്ന ലോക ചാമ്പ്യന്‍ഷിപ്പില്‍ ഫൈനലിലെത്തി മാരിന്‍ സീനിയര്‍ തലത്തിലേക്കുള്ള വരവറിയിച്ചു. ചൈനീസ് താരങ്ങളുടെ മൃഗീയാധിപത്യത്തെ വെല്ലുവിളിച്ചായിരുന്നു മാരിന്റെ മുന്നേറ്റം. 2014ല്‍ യൂറോപ്യന്‍ സീനിയര്‍ കിരീടവും ലോക ചാമ്പ്യന്‍ഷിപ്പും ജയിച്ച് മാരിന്‍ എതിരാളികള്‍ ഭയക്കുന്ന താരമായി വളര്‍ന്നു. 2015ലെ ലോക ചാമ്പ്യന്‍ഷിപ്പിലും കിരീടം നിലനിര്‍ത്തിയതോടെ മാരിന്‍ ബാഡ്മിന്റണ്‍ ലോകത്തിന്റെ നെറുകയിലുമെത്തി.
റിയോ ഒളിംപിക്‌സില്‍ ചൈനയുടെ ഉറച്ച മെഡല്‍ പ്രതീക്ഷയും നിലവിലെ ചാമ്പ്യനുമായ ലീ സുറേയിയെ സെമിയില്‍ കെട്ടുകെട്ടിച്ചാണ് മാരിന്റെ വരവ്. നാലുവര്‍ഷം മുമ്പ് ലണ്ടനില്‍ ബാഡ്മിന്റണില്‍ മെഡലുകള്‍ തൂത്തുവാരിയ ചൈനയ്ക്ക് ബ്രസീലില്‍ കനത്ത തിരിച്ചടിയാണ് നേരിട്ടത്. നേരത്തെ ക്വാര്‍ട്ടിറില്‍ സിന്ധു ലോക രണ്ടാം നമ്പറുകാരി ചൈനയുടെ വാങ് യിഹാനെ അട്ടിമറിച്ചാണ് സെമിയിലേക്ക് യോഗ്യത നേടിയത്.