ചിന്നമ്മയുടെ 'വിധി' ജയലളിത കമ്മലണിഞ്ഞ് ഡപ്പാം കൂത്ത് നൃത്തമാടി തമിഴ് സ്ത്രീകള്
ഗ്രീന്സ്വേ റോഡില് കാവല് മുഖ്യമന്ത്രി പനീര്സെല്വത്തിന്റെ വസതിക്കു സമീപം തടിച്ചുകൂടിയ വനിതാപ്രവര്ത്തകര് ശാപവാക്കുകളോടെയാണ് ശശികലയ്ക്കെതിരായ കോടതിവിധിയെ സ്വീകരിച്ചത്. 'നാട് ഭരിക്കാന് വന്നിരിക്കുന്നു, ഇനി ജയിലില് പോയി സിഡി വില്ക്കട്ടെ'' കാഞ്ചീപുരത്തു നിന്നെത്തിയ നാഗമ്മാള് രോഷമടക്കാനാകാതെ പൊട്ടിത്തെറിച്ചു. 33 വര്ഷമായി അമ്മയെ കബളിപ്പിച്ച 'ചിന്നമ്മ'യെ നൂറു വര്ഷം ജയിലിലിടണമെന്നായിരുന്നു ഇവരുടെ അഭിപ്രായം.
കനത്ത പൊലീസ് കാവലുള്ള ഇവിടേക്കു രാവിലെ മുതല്തന്നെ പ്രവര്ത്തകര് ഒഴുകിയെത്തിയിരുന്നു. വീട്ടുപരിസരത്തു പലയിടങ്ങളിലായി എല്സിഡി സ്ക്രീനുകള് സ്ഥാപിച്ചിരുന്നു. കോടതിവിധിയും ആഘോഷവും പനീര്സെല്വം ക്യാംപ് നേരത്തേതന്നെ പ്രതീക്ഷിച്ച മട്ടിലായിരുന്നു ഒരുക്കങ്ങള്. പത്തുമണിയോടെ ജനക്കൂട്ടം പിന്നെയും വലുതായി. അണികള് പടക്കങ്ങളും മധുരവുമെല്ലാം തയാറാക്കിയിരുന്നെങ്കിലും നേതാക്കളുടെ മുഖത്ത് പിരിമുറുക്കം കാണാമായിരുന്നു.
ആവേശത്തിന്റെ തിരയിളക്കം തീര്ത്ത് പത്തേമുക്കാലോടെ വിധിയെത്തി ശശികല ജയിലിലേക്ക്. അതോടെ അണികള് സര്വവും മറന്ന് ആര്പ്പുവിളിച്ചു. നൃത്തം ചവിട്ടിയും മുദ്രാവാക്യം വിളിച്ചും പ്രവര്ത്തകര് രംഗം കൊഴുപ്പിച്ചു. പുറത്തു റോഡില് മാലപ്പടക്കത്തിനു തിരി കൊളുത്തി. ഉച്ചയോടെയാണ് സന്തോഷം പങ്കുവയ്ക്കാന് പനീര്സെല്വം വീടിന്റെ പൂമുഖത്തേക്ക് എത്തിയത്.
''അമ്മയുടെ ആത്മാവ് നമ്മോടൊപ്പമുണ്ടെന്നു തെളിഞ്ഞിരിക്കുകയാണ്. അമ്മ തുടങ്ങിവച്ച എല്ലാ പദ്ധതികളും വിജയകരമായി നടപ്പാക്കും. അമ്മയുടെ സര്ക്കാര് തുടരും'' പനീര്സെല്വത്തിന്റെ ഉറച്ച വാക്കുകള്ക്ക് കരഘോഷത്തിന്റെ അകമ്പടി. പിന്തുണ പ്രഖ്യാപിച്ചെത്തിയ രണ്ട് എംഎല്എമാര്ക്കുള്ള സ്വീകരണമായിരുന്നു പിന്നീട്. കൂട്ടലും കിഴിക്കലുമായി അകത്തും പുറത്തും പിന്നെയും പ്രവര്ത്തകരുടെ തിരക്ക്.
https://www.facebook.com/Malayalivartha
