തമിഴ്നാട്ടില് പുതിയ സര്ക്കാര് രൂപീകരണത്തിന് സമ്മര്ദമേറുന്നു; ഗവര്ണറുടെ തീരുമാനം കാത്ത് തമിഴ്നാട്
തമിഴ്നാട്ടില് പുതിയ സര്ക്കാര് രൂപീകരിക്കാനായി ഗവര്ണര് സി. വിദ്യാസാഗര് റാവുവിനുമേല് സമ്മര്ദമേറുകയാണ്. അണ്ണാ ഡിഎംകെ നിയമസഭകക്ഷി നേതാവ് എടപ്പാടി പളനിസാമിയും കാവല് മുഖ്യമന്ത്രി ഒ. പനീര്സെല്വവും ഇന്നലെ വീണ്ടും രാജ്ഭവനിലെത്തി അവകാശവാദം ഉന്നയിക്കുകയുണ്ടായി. മുഖ്യമന്ത്രി ആരെന്ന് തീരുമാനിക്കാന് നിയമസഭാതലത്തില് കോംപോസിറ്റ് വോട്ടിങ് അഥവാ സമഗ്ര വോട്ടിങ്ങിനുള്ള സാധ്യതയാണ് കൂടുതല്.
ദിവസങ്ങളായി തുടരുന്ന രാഷ്ട്രീയ അനിശ്ചിതത്വവും ഭരണസ്തംഭനവും പുതിയ തലത്തിലേക്ക് നീങ്ങുന്നതിനിടെയാണ് എടപ്പാടി പളനിസാമിയും ഒ. പനീര്സെല്വവും വീണ്ടും രാജ്ഭവനിലെത്തി സത്യപ്രതിജ്ഞക്കായി അവകാശവാദമുന്നയിച്ചത്. 124 പേരുടെ പിന്തുണയുണ്ടെന്ന അവകാശവാദം പളനിസാമി ആവര്ത്തിച്ചു.
എന്നാല്, എംഎല്മാരുടെ എണ്ണത്തിലെ നിജസ്ഥിതി ഗവര്ണറെ ബോധ്യപ്പെടുത്താന് ഇരുപക്ഷത്തിനും കഴിഞ്ഞിട്ടില്ല. ആരെ ആദ്യം വിശ്വാസവോട്ട് തേടാന് സഭയിലേക്ക് അയയ്ക്കും എന്നതാണ് ചോദ്യം. സര്ക്കാരിന്റെ ഭൂരിപക്ഷം തെളിയിക്കേണ്ടത് സഭാതലത്തില് തന്നെവേണമെന്നാണ് ഗവര്ണര്ക്ക് കിട്ടിയ നിയമോപദേശങ്ങളെല്ലാം. മുഖ്യമന്ത്രി നിയമനത്തിന് അവകാശ വാദമുന്നയിച്ച പനീര്സെല്വത്തെയും പളനിസാമിയെയും നിയമസഭയില് വിശ്വാസ വോട്ട് തേടാന് ഗവര്ണര് ആവശ്യപ്പെടുമെന്നാണ് പൊതുവിലയിരുത്തല്. അങ്ങനെയെങ്കില് ഇപ്പോള് സഭയിലുള്ള 233 അംഗങ്ങള് വോട്ടിലൂടെ മുഖ്യമന്ത്രിയെ തീരുമാനിയ്ക്കും.
https://www.facebook.com/Malayalivartha
