ടൗണ്‍ഷിപ്പില്‍ കടന്നു കൂടിയ പെരുമ്പാമ്പിനെ സുരക്ഷാ ഉദ്യോഗസ്ഥര്‍ വെടിവെച്ചുകൊന്ന് കഷണങ്ങളാക്കി വെട്ടി തുണ്ടം തുണ്ടമാക്കി കുഴിച്ചിട്ടു. പൂനെ മുല്‍സിയിലെ ആംബി വാലി സിറ്റിയിലാണ് സംഭവം. വനം വകുപ്പ് നടത്തിയ അന്വേഷണത്തിലാണ് സംരക്ഷിത വിഭാഗത്തില്‍ പെട്ട പെരുമ്പാമ്പിനെ വെടിവെച്ച് വെട്ടി തുണ്ടമാക്കി കുഴിച്ചിട്ടതായി കണ്ടെത്തിയത്.
പ്രതികളെ ചോദ്യം ചെയ്തപ്പോള്‍ വലിയ പെരുമ്പാമ്പായതിനാല്‍ പിടികൂടാന്‍ ബുദ്ധിമുട്ടേണ്ടി വരും. അതിനാലാണ് കൊന്നു കൂഴിച്ചുമൂടിയതെന്നാണ് സുരക്ഷാ ജീവനക്കാരുടെ ന്യായം.
സംഭവത്തിന്റെ മുഴുവന്‍ വീഡിയോ എടുത്ത് സൂക്ഷിച്ചതാണ് ഇവരെ കുടുക്കിയത്. വീഡിയോ ശ്രദ്ധയില്‍പ്പെട്ട വന്യജീവി സംരക്ഷന്‍ നിലേഷ് ഗാര്‍ഡെ വനംവകുപ്പിനെ വിവരം അറിയിച്ചു. തുടര്‍ന്ന് വനംവകുപ്പ് ഉദ്യോഗസ്ഥര്‍ നടത്തിയ അന്വേഷണത്തില്‍ വോളിബോള്‍ കോര്‍ട്ടിനടിയില്‍ കുഴിച്ചു മൂടിയ പെരുമ്പാമ്പിന്റെ ജഡം കണ്ടെത്തുകയായിരുന്നു.
ടൗണ്‍ഷിപ്പിലെ സുരക്ഷ ഉദ്യോഗസ്ഥരായ കബീര്‍ സുബേദാര്‍, ധ്യാനേശ്വര്‍ ടോഡ്മാല്‍, ഷണ്ഡാര്‍ യാദവ് , കെ പി രാമചന്ദ്ര, ചന്ദന്‍ രാംചേരി എന്നിവര്‍ക്കെതിരെ വനംവകുപ്പ് കേസെടുത്തു.
ഇവര്‍ പോലീസിന്റെ കസ്റ്റഡിയിലാണ്. 1972ലെ വന്യജീവി സംരക്ഷണ നിയമ പ്രകാരമാണ് കേസെടുത്തത്.
പെരുമ്പാമ്പിനെ വെടിവെക്കാന്‍ ഉപയോഗിച്ച തോക്കും മറ്റ് ആയുധങ്ങളും പിടിച്ചെടുത്തു. ടൗണ്‍ഷിപ്പിന്റെ നടത്തിപ്പുകാരായ സഹാറ ഗ്രൂപ്പുകാര്‍ സംഭവത്തില്‍ മാധ്യമങ്ങളോട് പ്രതികരിച്ചില്ല