ചെന്നൈ: ക്ലാസിലിരിക്കെ 12കാരി പെൺകുട്ടിയുടെ വസ്​ത്രത്തിലും ബെഞ്ചിലും ആർത്തവ രക്​തം പുരണ്ടതിന്​ അധ്യാപിക ശകാരിച്ചതിനെ തുടർന്ന്​ പെൺകുട്ടി ആത്​മഹത്യ ചെയ്​തു. അയൽവാസിയുടെ വീടി​ന്റെ ടെറസിൽ നിന്ന്​ ചാടിയാണ്​ പെൺകുട്ടി ആത്​മഹത്യ ചെയ്തത്.

യൂണിഫോമില്‍ ആര്‍ത്തവ രക്തം പുരണ്ടുവെന്ന് പറഞ്ഞ് അധ്യാപിക തന്നെ ക്രൂരമായി കളിയാക്കിയതായി വിദ്യാര്‍ഥിനി ആത്മഹത്യാക്കുറിപ്പില്‍ പറയുന്നു. യൂണിഫോമിലും ബെഞ്ചിലും ആർത്തവ രക്​തമായിട്ടുണ്ടെന്ന്​ സുഹൃത്തുക്കൾ അറിയിച്ചതിനെ തുടർന്ന്​ വിശ്രമമുറിയിൽ പോയിയിരിക്കാൻ അധ്യാപികയോട്​ അനുവാദം ചോദിച്ചിരുന്നുവെന്ന്​ പെൺകുട്ടി ആത്​മഹത്യാകുറിപ്പിൽ പറയുന്നു.

എന്നാൽ, അധ്യാപിക ക്ലാസുമറിയിലേക്ക്​ വിളിച്ചു വരുത്തി. കൃത്യമായി പാഡ്​ വെക്കാൻ പോലും നിനക്ക്​ കഴിയില്ലേ എന്നു ചോദിച്ച്​ ശകാരിച്ചു. പ്രിൻസിപ്പലി​ന്റെ റൂമിലും കൊണ്ടുപോയി. അദ്ദേഹവും ശകാരിച്ചുവെന്നും പെൺകുട്ടി കത്തിൽ പറയുന്നു. ഇതുവരെ എനിക്കെതിര ആരും ഒരു പരാതിയും പറഞ്ഞിട്ടില്ല. പിന്നെ അധ്യാപിക എന്തിനാണ്​ ഇത്തരത്തിൽ പരാതിപ്പെട്ടതെന്നും വിദ്യാർഥിനി കത്തിൽ ചോദിക്കുന്നു. സംഭവത്തെ തുടർന്ന്​ രക്ഷിതാക്കളും നാട്ടുകാരും സ്​കൂളിനു മുന്നിൽ പ്രതിഷേധിച്ചു. തമിഴ്നാട്ടിലെ തിരുനെല്‍വേലിയില്‍ ഒരു സ്വകാര്യ സ്കൂളിലാണ് സംഭവം നടന്നത്.