ദൈവം കനിഞ്ഞാല്ലേ ഇനി രക്ഷയുള്ളൂ; സംസ്ഥാനം ഗുരുതരമായ വൈദ്യുതി പ്രതിസന്ധിയിലേക്ക്; മഴ പെയ്യാൻ പ്രാർത്ഥിക്കണമെന്ന് വൈദ്യുതി മന്ത്രി എം എം മണി
സംസ്ഥാനത്തു മഴ കുറഞ്ഞതിനാല് ഗുരുതരമായ വൈദ്യുതി പ്രതിസന്ധി വരുമെന്നും അങ്ങനെ വരാതിരിക്കാൻ എല്ലാവരും ദൈവത്തോടു പ്രാര്ത്ഥിക്കണമെന്നും മന്ത്രി എം.എം. മണി. എന്നാൽ നിരീശ്വരവാദിയായതിനാല് താൻ പ്രാർത്ഥിക്കില്ലെന്നും അദ്ദേഹം പറഞ്ഞു. ''നിരീശ്വരവാദിയായതിനാല് ഞാന് പ്രാര്ത്ഥിക്കില്ല. പക്ഷേ, നിങ്ങളെല്ലാം ഒത്തൊരുമിച്ചു പ്രാര്ത്ഥിക്കണം. ഇല്ലെങ്കില് കട്ടപ്പൊകയാണ്. സര്വമത പ്രാര്ത്ഥന ആയാലും കുഴപ്പമില്ല.''-മന്ത്രി പറഞ്ഞു. പാലക്കുഴ പഞ്ചായത്തിലെ ശുദ്ധജല വിതരണ പദ്ധതികളുടെ ഉദ്ഘാടനത്തിനു സംസാരിക്കവെയാണ് മന്ത്രി ഇക്കാര്യം വ്യക്തമാക്കിയത്.
എന്നാൽ കേരളത്തിൽ 19 വരെ ശക്തമായ മഴക്ക് സാധ്യതയുള്ളതായി കേന്ദ്ര കാലാവസ്ഥാ നിരീക്ഷണ കേന്ദ്രം അറിയിപ്പ് നൽകി. 18 ന് മലപ്പുറത്തും 19 ന് ഇടുക്കിയിലും അതിശക്തമായ മഴയ്ക്ക് സാധ്യതയുണ്ട്. ഈ ജില്ലകളിൽ ഓറഞ്ച് അലേര്ട്ട് പ്രഖ്യാപിച്ചു. 19 വരെ അറബികടലില് തെക്കുപടിഞ്ഞാറന് ദിശയില് മണിക്കൂറില് 50 കിലോമീറ്റര് വരെ വേഗത്തില് കാറ്റ് വീശാനും സാധ്യതയുള്ളതായി കാലാവസ്ഥാ നിരീക്ഷണ കേന്ദ്രം നിര്ദ്ദേശം നൽകി.
എറണാകുളം, ഇടുക്കി, മലപ്പുറം, വയനാട് ജില്ലകളിലില് ചൊവ്വാഴ്ച്ചയും ഇടുക്കി, മലപ്പുറം, കോഴിക്കോട്, കണ്ണൂര് ജില്ലകളില് ബുധനാഴ്ച്ചയും ദുരന്തനിവാരണ അതോറിറ്റി ജാഗ്രതാനിര്ദ്ദേശം പറഞ്ഞിട്ടുണ്ട്. വ്യാഴാഴ്ച കൊല്ലം, പത്തനംതിട്ട, ആലപ്പുഴ, കോട്ടയം, എറണാകുളം, ഇടുക്കി, കോഴിക്കോട്, വയനാട്, കണ്ണൂര് ജില്ലകളിലും 19ന് തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, എറണാകുളം, മലപ്പുറം ജില്ലകളിലും ജാഗ്രതാ നിര്ദ്ദേശം നൽകിയിട്ടുണ്ട്.
https://www.facebook.com/Malayalivartha