പാലാ വോട്ടെണ്ണലിന്‍റെ ആദ്യ ഘട്ടത്തിൽ രാമപുരത്തും എൽ ഡി എഫ് മുന്നേറ്റം നടത്തിയതോടെ യു ഡി എഫ് ആശങ്കയിൽ. എന്ത് കൊണ്ട് രാമപുരത്ത് പിന്നോട്ട് പോയി എന്ന കാര്യത്തിൽ വിലയിരുത്തലുകൾക്ക് സമയമായിട്ടില്ലെന്ന് കോട്ടയം എംപി തോമസ് ചാഴികാടൻ പ്രതികരിച്ചു. എന്നാൽ ഇക്കാര്യങ്ങളിൽ ഉറപ്പായും അന്വേഷണം ഉണ്ടാകുമെന്ന് അദ്ദേഹം പറഞ്ഞു.

പാലാ വോട്ടെണ്ണലിൽ എൽഡിഎഫ് സ്ഥാനാർത്ഥി മാണി സി കാപ്പൻ മുന്നേറുന്നതിൽ ആശങ്കയില്ലെന്ന് ചാഴികാടൻ വ്യക്തമാക്കി . ആശങ്കപ്പെടേണ്ട സാഹചര്യമില്ലെന്നും ഇനി എണ്ണാൻ പോകുന്ന പഞ്ചായത്തുകളിലൽ നല്ല പ്രതീക്ഷ പുലർത്തുന്നതായും തോമസ് ചാഴികാടൻ വ്യക്തമാക്കി. അഞ്ച് മാസം മുൻപ് നടന്ന ലോക്സഭാ തെരഞ്ഞെടുപ്പിൽ രാമപുരം പഞ്ചായത്തിൽ എൽഡിഎഫ് സ്ഥാനാർത്ഥി നേടിയതിനേക്കാൾ ഇരട്ടി വോട്ടിൽ യുഡിഎഫ് സ്ഥാനാർത്ഥി തോമസ് ചാഴിക്കാടൻ മുന്നിലെത്തിയിരുന്നു. അന്ന് രാമപുരത്ത് നിന്ന് 4440 വോട്ട് തോമസ് ചാഴിക്കാടൻ നേടി . 2016- നിയമസഭാ തെരഞ്ഞെടുപ്പിൽ ഒന്നാം റൗണ്ടിൽ ഇവിടെ നിന്നും 150 വോട്ടിന്‍റെ ലീഡ് കെ എം മാണി നേടിയിരുന്നു.