ഞങ്ങള്‍ക്ക് കിട്ടേണ്ടുന്ന വോട്ടുകള്‍ ഞങ്ങൾക്ക് കിട്ടുമെന്ന മാണി സി കാപ്പന്റെ പ്രതീക്ഷ പൂവണിയുന്ന കാഴ്ച്ചയാണ് ഇപ്പോൾ പാലായിൽ കാണുന്നത്. രാവിലെ മാധ്യമങ്ങളെ കണ്ടപ്പോഴായിരുന്നു അദ്ദേഹം ഈ കാര്യം പറഞ്ഞത്. ഞങ്ങള്‍ക്ക് കിട്ടേണ്ട വോട്ടുകള്‍ മാറിപ്പോവാന്‍ ഒരു സാധ്യതയുമില്ല എന്ന് പറഞ്ഞ മാണി സി കാപ്പൻ ചില വോട്ടുകൾ പ്രതീക്ഷിക്കുന്നതായും പറഞ്ഞിരുന്നു. വ്യക്തിബന്ധങ്ങളിലൂടെ കിട്ടേണ്ടുന്ന വോട്ടുകള്‍ കൂടാതെ ബിഡിജെഎസ് വോട്ടും പിജെ ജോസഫ് വിഭാഗത്തിന്‍റെ വോട്ടും പ്രതീക്ഷിക്കുന്നതായി അദ്ദേഹം പറഞ്ഞു.

എന്നാൽ മുത്തോലി, കൊഴുവനാല്‍ പഞ്ചായത്തുകളില്‍ മാത്രമേ സംശയമുള്ളൂ. ബാക്കി എല്ലാ പഞ്ചായത്തുകളിലും ഞങ്ങള്‍ ലീഡ് ചെയ്യുമെന്ന വിശ്വാസം അവർ പുലർത്തി. പാലാ മുന്‍സിപ്പാലിറ്റിയില്‍ നന്നായി ലീഡ‍് ചെയ്യും. കഴിഞ്ഞ തവണ 58,000 വോട്ട് എനിക്ക് കിട്ടിയിട്ടുണ്ടെന്നും ഇതില്‍ 3000 വോട്ട് പോയാലും അതിലേറെ വോട്ടുകള്‍ വരാനുണ്ടെന്നും അദ്ദേഹം പറഞ്ഞിരുന്നു. മാണി സാറിനോട് മൂന്ന് വട്ടം യുദ്ധം ചെയ്തയാളാണ് താനെന്ന്‌ പറഞ്ഞ അദ്ദേഹം മാണി സാറിനോളം ശക്തനല്ല ഇപ്പോഴത്തെ സ്ഥാനാര്‍ഥി എന്നും വ്യക്തമാക്കി . ഇത്‌ മണ്ഡലത്തിലെ യുവാക്കളെ സ്വാധീനിക്കുമെന്ന് കരുതുന്നതായും മാണി സി കാപ്പൻ പ്രതിക്കരിച്ചിരുന്നു. ഇപ്പോൾ വൻ മുന്നേറ്റമാണ് എൽ ഡി എഫ് പാലായിൽ നടത്തി കൊണ്ടിരിക്കുന്നത്.