ലോക്‌സഭാ തിരഞ്ഞെടുപ്പ് മുന്നില്‍ കണ്ടാണ് ബിജെപി ന്യൂനപക്ഷ സമുദായങ്ങളുമായി അടുക്കുന്നത്. സിപിഎമ്മും ന്യൂനപക്ഷ സമുദായങ്ങളുമായി അടുപ്പം വര്‍ധിപ്പിക്കാന്‍ ശ്രമിക്കുന്നു. യുഡിഎഫിനോട് അടുപ്പമുള്ള ന്യൂനപക്ഷ വിഭാഗങ്ങള്‍ അകലാതിരിക്കാന്‍ ജാഗ്രത വേണമെന്നും യോഗത്തില്‍ അഭിപ്രായമുയര്‍ന്നു
ന്യൂനപക്ഷ വിഭാഗങ്ങളുമായി ബിജെപി സൗഹൃദം സ്ഥാപിക്കാന്‍ ശ്രമിക്കുന്ന സാഹചര്യത്തില്‍, കോണ്‍ഗ്രസ് നേതാക്കള്‍ താഴേത്തട്ടു മുതല്‍ മത സമുദായ നേതാക്കളെ കാണും. കെപിസിസി രാഷ്ട്രീയ സമിതി യോഗത്തിലാണ് തീരുമാനം.
ബിജെപിയുടെ സമുദായ പ്രീണന നീക്കത്തെ ജാഗ്രതയോടെ നേരിടണമെന്ന് യോഗത്തില്‍ അഭിപ്രായം ഉയര്‍ന്നു. ലോക്‌സഭാ തിരഞ്ഞെടുപ്പ് മുന്നില്‍ കണ്ടാണ് ബിജെപി ന്യൂനപക്ഷ സമുദായങ്ങളുമായി അടുക്കുന്നത്. സിപിഎമ്മും ന്യൂനപക്ഷ സമുദായങ്ങളുമായി അടുപ്പം വര്‍ധിപ്പിക്കാന്‍ ശ്രമിക്കുന്നു. യുഡിഎഫിനോട് അടുപ്പമുള്ള ന്യൂനപക്ഷ വിഭാഗങ്ങള്‍ അകലാതിരിക്കാന്‍ ജാഗ്രത വേണമെന്നും യോഗത്തില്‍ അഭിപ്രായമുയര്‍ന്നു. ബിജെപി സംഘപരിവാര്‍ സംഘടനകള്‍ ന്യൂനപക്ഷങ്ങള്‍ക്കു നേരെ നടത്തിയ അക്രമങ്ങളുടെ ചിത്രങ്ങളും വിഡിയോയും സാധാരണക്കാര്‍ക്കു മുന്നില്‍ പ്രദര്‍ശിപ്പിക്കും. ഇതിനായി പ്രത്യേക കമ്മിറ്റി രൂപീകരിക്കാന്‍ തീരുമാനിച്ചു.
പ്രധാനമന്ത്രിയുടെ യുവം പരിപാടിക്ക് ബദലായി കെപിസിസി യുവജനങ്ങളുടെ സംഗമം സംഘടിപ്പിക്കും. മേയ് മാസത്തില്‍ കൊച്ചിയില്‍ നടക്കുന്ന പരിപാടിയില്‍ രാഹുല്‍ ഗാന്ധി പങ്കെടുക്കും. ഒരു ലക്ഷം യുവാക്കളെ സംഗമത്തില്‍ പങ്കെടുപ്പിക്കാന്‍ രാഷ്ട്രീയകാര്യ സമിതി തീരുമാനിച്ചു. ബിജെപിയുടെ യുവ സംഗമത്തിനു ബദലായാണ് കോണ്‍ഗ്രസ് യുവാക്കളുടെ സംഗമം വിളിച്ചു ചേര്‍ക്കുന്നതെന്ന് കെപിസിസി പ്രസിഡന്റ് കെ.സുധാകരന്‍ പറഞ്ഞു.
യുവാക്കള്‍ വിദേശത്തേക്കു കൂട്ടമായി പോകുകയാണ്. കേരളത്തില്‍ ജോലി സാധ്യതയില്ല. ജോലി ലഭിക്കാന്‍ മൂലധനം ഇറക്കാന്‍ കേന്ദ്ര-സംസ്ഥാന സര്‍ക്കാരുകള്‍ തയാറാകുന്നില്ല.
കോണ്‍ഗ്രസ് അഭിമുഖീകരിക്കുന്ന പ്രശ്‌നങ്ങള്‍ രാഷ്ട്രീയകാര്യ സമിതി ചര്‍ച്ച ചെയ്തതായി കെ.സുധാകരന്‍ പറഞ്ഞു.
https://www.facebook.com/Malayalivartha
