പ്രധാനമന്ത്രി നരേന്ദ്ര മോദിയെ വിമർശിച്ച് കോൺഗ്രസ് നേതാവ് രാഹുൽഗാന്ധി രംഗത്ത്. ചിലർ അറിവുള്ളവരായി നടിക്കുന്നുവെന്നും പ്രധാനമന്ത്രി അതിലൊരാളാണെന്നും അദ്ദേഹം പറഞ്ഞു. എല്ലാം അറിയാമെന്നാണ് ഭാവമെന്നും, ദൈവത്തെ വരെ പഠിപ്പിക്കുമെന്നും രാഹുൽഗാന്ധി കുറ്റപ്പെടുത്തി. ശാസ്ത്രജ്ഞരേയും സൈനികരേയും ഉപദേശിക്കും എന്നാൽ, ബിജെപിയിൽ ചോദ്യങ്ങളില്ല. ഉത്തരങ്ങൾ മാത്രമേയുള്ളൂവെന്നും രാഹുൽഗാന്ധി പറഞ്ഞു. ശ്രീ നാരായണ ഗുരുവും ഗുരു നാനാക്കും ഉൾപ്പെടയുള്ള എല്ലാ മഹാരഥൻമാരും മറ്റുള്ള മതങ്ങളെ ബഹുമാനിക്കാൻ പഠിപ്പിച്ചവരാണെന്നും രാഹുൽ ഗാന്ധി ചൂണ്ടിക്കാണിച്ചു..

ജോഡോ യാത്ര തനിക്കൊരു അനുഭവമായിരുന്നു. ഇന്ത്യ ഒരു ആശയത്തെയും തിരസ്കരിച്ചിട്ടില്ല. എൻആർഐക്കാർ ഇന്ത്യയുടെ അംബാസിഡർമാരാണ് എന്നും അദ്ദേഹം വ്യക്തമാക്കി. വനിത സംവരണ ബിൽ പാസാക്കാനാണ് കോൺഗ്രസ് ശ്രമിച്ചത്. എന്നാൽ, സഖ്യകക്ഷികളിൽ ചിലർ എതിർപ്പ് പ്രകടിപ്പിക്കുകയും ചെയ്തു. കോൺഗ്രസ് അധികാരത്തിൽ എത്തിയാൽ ബിൽ പാസാക്കും.

ഭരണഘടനയിൽ യൂണിയൻ ഓഫ് സ്റ്റേറ്റ് ആണ് ഇന്ത്യ. ഓരോ സംസ്ഥാനത്തെയും സംസ്കാരത്തെയും ചരിത്രത്തെയും സംരക്ഷിക്കേണ്ടത് ആവശ്യകതയാണെന്നും അദ്ദേഹം പറഞ്ഞു . ഭരണഘടനയിലെ ഈ ആശയത്തെയാണ് ആർഎസ്എസും ബിജെപിയും ആക്രമിക്കുന്നത്, അതിലൂടെ ഭരണഘടനയെയും ആക്രമിക്കുന്നുവെന്നും വെറുപ്പിനെ വെറുപ്പ് കൊണ്ട് ജയിക്കാനാവില്ലെന്നും രാഹുൽ ഗാന്ധി പറഞ്ഞു. വെറുപ്പിൽ വിശ്വസിക്കുന്നവരല്ല, ഇന്ത്യയിലെ ജനങ്ങൾ. പരസ്പരം കൊല്ലുന്നവരല്ല. ഇതിനു പിന്നിൽ പ്രവർത്തിക്കുന്നത്, ഒരു ചെറിയ കൂട്ടരാണ് .

അവർക്ക് അധികാര സംവിധാനത്തിൽ സ്വാധീനം ഉണ്ട്. അവർക്ക് പണം കിട്ടുന്നുണ്ടെന്നും അദ്ദേഹം പറഞ്ഞു. . മാധ്യമങ്ങളിൽ നിയന്ത്രണമുണ്ട്. ഭാരത് ജോഡോയിൽ താൻ കണ്ട ആളുകളിൽ പകുയിലധികവും സ്നേഹിക്കുന്നവരാണ്. യഥാർത്ഥത്തിൽ സംഭവിക്കുന്നതല്ല മാധ്യമങ്ങൾ ഇന്ത്യയിൽ നൽകുന്നത്. മാധ്യമങ്ങളിൽ കാണുന്നത് സത്യമാണെന്ന് കരുതരുതെന്നും രാഹുൽഗാന്ധി ചൂണ്ടിക്കാണിച്ചു . അമേരിക്കയിലെ സംവാദപരിപാടിയിൽ സംസാരിക്കുകയായിരുന്നു അദ്ദേഹം.