പാർലമെന്റ് തെരഞ്ഞെടുപ്പ് അടുക്കുകയാണ്. ഇനി സീറ്റുകൾക്ക് വേണ്ടിയുള്ള അടിപിടി ആണ് നടക്കാനിരിക്കുന്നത്.... നാം കാണാനിരിക്കുന്നത്. ഇടത് മുന്നണിയിൽ ആ ആവശ്യങ്ങൾ ഉയർന്നു തുടങ്ങി. ഇപ്പോൾ ഇതാ , വരാനിരിക്കുന്ന പാർലമെന്റ് തെരഞ്ഞെടുപ്പിൽ കോട്ടയത്തിന് പുറമേ ഒരു സീറ്റ് കൂടി ഇടതുമുന്നണിയിൽ നിന്ന് കിട്ടുമെന്ന് പ്രതീക്ഷ പ്രകടിപ്പിച്ചിരിക്കുകയാണ് കേരള കോൺഗ്രസ് എം.

ഇന്നലെ കോട്ടയത്ത് പാർട്ടി ഹൈപ്പവർ കമ്മിറ്റി യോഗം ചേർന്നിരുന്നു. ആ യോഗത്തിൽ ചില ധാരണകൾ ആയിരിക്കുകയാണ്. കോട്ടയത്തിനു പുറമേ രണ്ട് സീറ്റുകൾ അധികമായി വേണമെന്ന ആവശ്യം ഉന്നയിക്കാനുള്ള തീരുമാനത്തിൽ ആണ് കേരള കോൺഗ്രസ് എം എത്തിയിരിക്കുന്നത്.

പാർട്ടി ചെയർമാൻ ജോസ് കെ.മാണി മാധ്യമങ്ങളോട് പറഞ്ഞത് ഇപ്രകാരമാണ്; ഇടതുമുന്നണി യോഗത്തിൽ ഉന്നയിക്കാൻ കൂടുതൽ സീറ്റ് കിട്ടാൻ കേരള കോൺഗ്രസിന് യോഗ്യതയുണ്ടെന്നാണ്. സിറ്റിങ്ങ് സീറ്റായ കോട്ടയം കേരള കോൺഗ്രസ് എമ്മിന് തന്നെയെന്ന് സിപിഎം ഉറപ്പു നല്കിയതാണ്.

ഇപ്പോഴത്തെ പശ്ചാത്തലത്തിൽ ഒരു സീറ്റ് കൂടി നൽകാൻ ഇടതുമുന്നണി തയ്യാറാകും എന്ന പ്രതീക്ഷയിലാണ് മാണി ഗ്രൂപ്പ് ആയിരിക്കുന്നത് . ഹൈപ്പവർ കമ്മിറ്റി യോഗത്തിൽ ഉന്നത സിപിഎം നേതാക്കളിൽ നിന്ന് തന്നെ ഇക്കാര്യത്തിൽ ചില ഉറപ്പുകൾ കിട്ടിയിട്ടുണ്ടെന്ന് പാർട്ടി ചെയർമാൻ ജോസ് കെ മാണി പറഞ്ഞു.

കേരള കോൺഗ്രസ് അധികമായി ലക്ഷ്യമിടുന്നതും പ്രതീക്ഷിക്കുന്നതും , പത്തനംതിട്ട , ചാലക്കുടി, വടകര എന്നീ സീറ്റുകളിൽ ഒന്നാണ്. ലോക്സഭാ മണ്ഡലത്തിന്റെ പരിധിയിലെ 3 നിയമസഭാ മണ്ഡലങ്ങളിൽ പാർട്ടിക്ക് എംഎൽഎമാർ ഉണ്ട് എന്ന കാരണത്താലാണ് പത്തനംതിട്ട ആവശ്യപ്പെട്ടിരിക്കുന്നത് .

ക്രൈസ്തവ വോട്ടുകൾക്ക് പ്രാമുഖ്യം ഉള്ള മണ്ഡലം എന്ന രീതിയിൽ ചാലക്കുടിയും കേരള കോൺഗ്രസ് എം പ്രതീക്ഷിക്കുന്നുണ്ട്.വടകര സീറ്റും കേരള കോൺഗ്രസ് എം ആഗ്രഹിക്കുന്നത് എന്ന് തന്നെയാണ് അനുമാനം.

കാരണം പാർട്ടിയുടെ സംസ്ഥാന ഭാരവാഹികളിൽ പ്രധാനിയും മലബാറിൽ നിന്നുള്ള പ്രമുഖ നേതാവുമായ മുഹമ്മദ് ഇക്ബാലിന് വേണ്ടിയാണ് അത്. സിപിഎം മറ്റൊരു നിർദേശം നൽകുകയുണ്ടായി, അതായത് ഇടുക്കി സീറ്റ് കേരള കോൺഗ്രസ് എമ്മിന് നൽകാമെന്നും അവിടെ പൊതുസ്വതന്ത്രനായി ജോയ്സ് ജോർജിനെ വീണ്ടും മത്സരിപ്പിക്കണമെന്നും ആണ് ആ നിർദേശം.