മണ്ണടിയുമെന്നു കരുതിയ ഇന്ത്യാ മുന്നണിക്ക് ജീവന്‍ വച്ചിരിക്കുന്നു; ഉത്തര്‍പ്രദേശിലും ബിഹാറിലും ഡല്‍ഹിയിലും ഉള്‍പ്പെടെ ആറു സംസ്ഥാനങ്ങളില്‍ ഇന്ത്യാ സഖ്യം ബിജെപിക്കു ഭീഷണിയാകും!!! കോണ്‍ഗ്രസിന് കുറഞ്ഞത് 25 സീറ്റുകള്‍ അധികം ലഭിക്കാന്‍ ഈ മുന്നണി നീക്കം ഇടവരുത്തും
മണ്ണടിയുമെന്നു കരുതിയ ഇന്ത്യാ മുന്നണിക്ക് ജീവന്‍ വച്ചിരിക്കുന്നു. ഉത്തര്‍പ്രദേശിലും ബിഹാറിലും ഡല്‍ഹിയിലും ഉള്‍പ്പെടെ ആറു സംസ്ഥാനങ്ങളില്‍ ഇന്ത്യാ സഖ്യം ബിജെപിക്കു ഭീഷണിയാകുമെന്നു തീര്‍ച്ച. കോണ്‍ഗ്രസിന് കുറഞ്ഞത് 25 സീറ്റുകള്‍ അധികം ലഭിക്കാന്‍ ഈ മുന്നണി നീക്കം ഇടവരുത്തുമെന്ന് തീര്‍ച്ചയായി. ബംഗാളില്‍ മമതയും ബിഹാറില്‍ നീതീഷും കോണ്‍ഗ്രസിനെ ആട്ടിയോടിച്ചെങ്കിലും യുപിയിലും എംപിയിലും സമാജ് വാദി പാര്‍ട്ടിയുമായുള്ള കോണ്‍ഗ്രസ് സഖ്യം വലിയ നേട്ടമായി മാറും. പ്രിയങ്കാ ഗാന്ധിയും അഖിലേഷ് യാദവും തമ്മിലുണ്ടാക്കിയ സഖ്യം രണ്ടു നേതാക്കള്‍ഡക്കും നേട്ടമാകും.
സോണിയാ ഗാന്ധി വിരമിച്ച് ഒഴിവില്‍ ഉത്തര്‍പ്രദേശിലെ റായിബറേലിയില്‍ പ്രിയങ്കാ ഗാന്ധി മത്സരിക്കാനുള്ള സാധ്യതയേറിയിരിക്കുകയാണ്. ഇന്ത്യാ സഖ്യം ഇത്തരത്തില്‍ പഞ്ചാബിലും ഹരിയാനയിലും ഗുജറാത്തിലും മഹാരാഷ്ട്രയിലും സഖ്യമായി മാറിയാല്‍ നരേന്ദ്ര മോദിയുടെ അമിതാവേശം തെല്ലൊന്നു കെട്ടടങ്ങും. കേവല ഭൂരിപക്ഷം നേടണമെങ്കില്‍ ബിജെപിക്ക് ഇന്ത്യാ മുന്നണിയെ പിളര്‍ത്തേണ്ട സാഹചര്യവും സംഭവിച്ചുകൂടായ്കയില്ല.
കഴിഞ്ഞ ലോക്‌സഭ തെരഞ്ഞെടുപ്പില്‍ റായ്ബറേലിയില്‍ മാത്രമാണ് കോണ്‍ഗ്രസിന് ജയിക്കാന്‍ സാധിച്ചത്. ഉത്തര്‍ പ്രദേശില്‍ 17 സീറ്റുവരെ നല്‍കാമെന്ന് അറിയിച്ച സമാജ് വാദി പാര്‍ട്ടിയുമായി ശ്രാവസ്തി സീറ്റുകൂടി കിട്ടണമെന്ന് കോണ്‍ഗ്രസ് വാദിച്ചു നോക്കിയിരുന്നു. സംസ്ഥാന കോണ്‍ഗ്രസ് നേതാക്കള്‍ കൂടുതല്‍ വിട്ടുവീഴ്ചക്ക് തയാറായില്ല. സഖ്യം മുന്നോട്ടുനീക്കാന്‍ ആ സീറ്റ് എസ്.പിക്ക് വിട്ടുകൊടുക്കാനുള്ള തീരുമാനം പ്രിയങ്ക-അഖിലേഷ് സംഭാഷണത്തില്‍ ഉണ്ടായി.
ലോക്സഭാ തിരഞ്ഞെടുപ്പ് അടുത്തു വരവെ ഉത്തര്‍ പ്രദേശില്‍ ഇന്ത്യ സഖ്യം സാധ്യമാകുമോ എന്നായിരുന്നു പൊതുവെയുള്ള ആശങ്ക. ഉത്തര്‍പ്രദേശും മധ്യപ്രദേശും രാജസ്ഥാനും കൈവിട്ടു പോയാല്‍ ബിജെപിക്ക് ഭരണത്തില്‍ വരാന്‍ പോലും സാധ്യത കുറയുമെന്നതാണ് പ്രസക്തമായ കാര്യം. രാഹുല്‍ ഗാന്ധി നയിക്കുന്ന ഭാരത് ജോഡോ ന്യായ് യാത്ര നിലവില്‍ ഉത്തര്‍ പ്രദേശില്‍ പര്യടനം നടത്തുകയാണ്. ബംഗാളില്‍ മമത ബാനര്‍ജി വിട്ടുനിന്ന പോലെ യുപിയില്‍ അഖിലേഷും വിട്ടുനില്‍ക്കുമോ എന്ന ചോദ്യം ഉയര്‍ന്നിരുന്നു. സീറ്റ് വിഭജനത്തില്‍ ധാരണയായാല്‍ ജോഡോ യാത്രയില്‍ പങ്കെടുക്കുമെന്ന് അഖിലേഷ് യാദവ് കഴിഞ്ഞ ദിവസം വ്യക്തമക്കുകയും ചെയ്തു. ഇതോടെയാണ് കോണ്‍ഗ്രസ് നടപടികള്‍ വേഗത്തിലാക്കിയത്.
80 ലോക്സഭാ മണ്ഡലങ്ങളാണ് ഉത്തര്‍ പ്രദേശിലുള്ളത്. 62 സീറ്റില്‍ എസ്പി മല്‍സരിക്കുമെന്നാണ് അവസാന തീരുമാനം. 17 സീറ്റില്‍ കോണ്‍ഗ്രസും മല്‍സരിക്കും. കോണ്‍ഗ്രസ് മത്സരിക്കുന്നതില്‍ അമേഠിയും റായ്ബറേലിയുമെല്ലാം ഉള്‍പ്പെടുമെന്നിരിക്കെ രാഹുല്‍ ഗാന്ധി വയനാടിനു പുറമെ അമേഠിയിലുംകൂടി മത്സരിക്കാന്‍ സാധ്യത കൂടുകയാണ്. ഉത്തര്‍പ്രദേശില്‍ ഒരു സീറ്റ് ചന്ദ്രശേഖര്‍ ആസാദിന്റെ ആസാദ് സമാജ് പാര്‍ട്ടിക്ക് നല്‍കാന്‍ ധാരണയായിട്ടുണ്ട്.
യുപിയിലെ ഇന്ത്യാ സഖ്യത്തില്‍ നിലവില്‍ ഈ മൂന്ന് പാര്‍ട്ടികളാണുള്ളത്. മുറാദാബാദ് സീറ്റ് കോണ്‍ഗ്രസ് വിട്ടുകൊടുക്കാന്‍ എസ്പി തയ്യാറായിട്ടുണ്ട്. 2019ല്‍ എസ്പിയുടെ എസ്ടി ഹസന്‍ ജയിച്ച മണ്ഡലമാണിത്. അതേസമയം, നരേന്ദ്ര മോദിയുടെ വാരണാസി മണ്ഡലം എസ്പി കോണ്‍ഗ്രസിന് നല്‍കും. ഇന്ത്യയുടെ ഹൃദയഭൂമിയായ ഉത്തര്‍പ്രദേശില്‍ നാലു പതിറ്റാണ്ട് കോണ്‍ഗ്രസിന്റെ കോട്ടയാണ്. പിന്നീട് ക്ഷയിച്ചുക്ഷയിച്ച് ഉത്തര്‍ പ്രദേശില്‍ കോണ്‍ഗ്രസിനു വിലാസം പോലുമില്ലാതായി.
2022ലെ യുപി നിയമസഭാ തിരഞ്ഞെടുപ്പില്‍ രണ്ട് സീറ്റില്‍ മാത്രമാണ് കോണ്‍ഗ്രസ് ജയിച്ചിരുന്നത്. സമാജ് വാദി പാര്‍ട്ടി 111 സീറ്റിലും. ഇതെല്ലാം പരിഗണിച്ചാണ് ലോ്ക്സഭാ സീറ്റുകള്‍ വിഭജിച്ചിരിക്കുന്നത്. ഇരു കക്ഷികള്‍ക്കും ഉത്തര്‍ പ്രദേശില്‍ ലഭിച്ച വോട്ടു പരിഗണിച്ചാല്‍ അത് ബിജെപിക്കു ലഭിച്ചതിനെക്കാള്‍ വോട്ടുശതമാനം ഇന്ത്യാ മുന്നണിക്ക് വന്നുചേരും. കോണ്‍ഗ്രസ് ആം ആദ്മി പാര്‍ട്ടി തര്‍ക്കത്തിലും മഞ്ഞുരുക്കമായിരിക്കുന്നു. ഡല്‍ഹിയിലെ ഏഴു സീറ്റുകളിലും തനിച്ചു മത്സരിക്കാനുള്ള തീരുമാനത്തില്‍നിന്ന് ആം ആദ്മി പാര്‍ട്ടി പിന്മാറും. കോണ്‍ഗ്രസ് അധ്യക്ഷന്‍ മല്ലികാര്‍ജുന്‍ ഖര്‍ഗെയും ആം ആദ്മി പാര്‍ട്ടി ദേശീയ കണ്‍വീനര്‍ അരവിന്ദ് കേജ്രിവാളും തമ്മില്‍ ഇന്നലെ ഡല്‍ഹിയില്‍ ചര്‍ച്ച നടത്തിയതിലാണ് നീക്കം. പഞ്ചാബില്‍ വെവ്വേറെ മത്സരിക്കാന്‍ ആം ആദ്മി പാര്‍ട്ടിയും കോണ്‍ഗ്രസും തീരുമാനിച്ചിരുന്നു.
ഇരു പാര്‍ട്ടികളും ഒന്നിച്ചു മത്സരിച്ചാല്‍ പ്രതിപക്ഷ വോട്ടുകള്‍ ബിജെപിക്കു ലഭിച്ചേക്കുമെന്നതിനാലാണ് ഇങ്ങനെ തീരുമാനിച്ചത്. എന്നാല്‍, ഡല്‍ഹിയില്‍ പരസ്പരം മത്സരിക്കുന്നതും ബിജെപിക്കു നേട്ടമാകുമെന്ന നിഗമനമാണ് ചര്‍ച്ചയിലുണ്ടായിരിക്കുന്നത്. ഹരിയാനയിലും ഇരു പാര്‍ട്ടികളും ഒരുമിച്ചു മത്സരിക്കാനാണ് ധാരണ. ഡല്‍ഹിയില്‍ കോണ്‍ഗ്രസിന് ഒരു സീറ്റും പഞ്ചാബില്‍ മുന്നു സീറ്റും ഹരിയാനയില്‍ നാലു സീറ്റും നല്‍കാനാണ് സാധ്യത തെളിയുന്നത്. അതേസമയം ആരോടും സഹകരിക്കാതെ മമതാ ബാനര്‍ജി ബംഗാളിലെ 42 സീറ്റുകളിലും തനിച്ചു മത്സരിക്കാനുള്ള തയാറെടുപ്പിലാണ്. 40 സീറ്റുകളെങ്കിലും തനിച്ചുനേടാനായാല്‍ മമത ദേശീയ തലത്തില്‍ ഒരു താരോദയമായി മാറാം. മമതയെ പ്രധാനമന്ത്രിയാക്കി ഇന്ത്യാ മുന്നണി പുറത്തുനിന്ന് പിന്തുണയ്ക്കുന്ന സാഹചര്യവുമുണ്ടാകാം.
https://www.facebook.com/Malayalivartha
