അഭിമാനമുണ്ടെങ്കിൽ പിണറായി മുഖ്യമന്ത്രി സ്ഥാനത്ത് തുടരില്ലെന്ന് പി.സി.ജോർജ്.  മുഖ്യമന്ത്രി രാജി വയ്ക്കണം എന്ന്   – പി.സി.ജോർജ് . പിണറായി വിജയൻ ഇത്തവണ ശബരിമലയ്ക്കു പകരം തൃശൂർ പൂരത്തിനു പുറകേ പോയി. ബിജെപിക്ക് നല്ല ഭാവിയുണ്ട്. കേരളത്തിൽ ബിജെപിക്ക് അക്കൗണ്ട് തുറക്കാനും കഴിഞ്ഞു. ഇന്ത്യയുടെ രക്ഷ ബിജെപിയിലാണ്. കേന്ദ്രത്തിൽ സീറ്റ് കുറഞ്ഞത് നന്നായി. ഇനിയെങ്കിലും പാഠം പഠിച്ച് മുന്നോട്ടു പോകാൻ കഴിയും.  ക്രിസ്ത്യൻ–ഹിന്ദു സമൂഹം ഒന്നിക്കണം എന്നും അദ്ദേഹം പറഞ്ഞു .  

 ലോക്സഭാ തിരഞ്ഞെടുപ്പിൽ പത്തനംതിട്ട മണ്ഡലത്തിലെ ബിജെപി സ്ഥാനാർഥിയായിരുന്ന അനിൽ ആന്റണിയുടെ തോൽ‌വിയിൽ  വിമർശനവുമായി  ബിജെപി നേതാവും പൂഞ്ഞാർ മുൻ എംഎൽഎയുമായ പി.സി.ജോർജ്.  അനിൽ ആന്റണിക്ക്  നാടുമായി ഒരു ബന്ധവും ഇല്ലായിരുന്നു. ഇതു തോൽവിക്ക് കാരണമായതായി അദ്ദേഹം പറഞ്ഞു.  അനിലിന് വോട്ടുപിടിക്കാൻ വളരെയധികം ബുദ്ധിമുട്ടിയെന്ന് പി.സി ജോർജ് വ്യക്തമാക്കി.  

 നാട്ടിൽ അറിയപ്പെടുന്നവരെയോ, സംസ്ഥാനതലത്തിൽ അറിയപ്പെടുന്നവരെയോ ആണ് സ്ഥാനാർഥിയാക്കേണ്ടത്.  അല്ലെങ്കിൽ സ്വന്തം പാർട്ടിക്കു വോട്ട് ഉണ്ടാകണം. സിപിഎമ്മിന് സ്വന്തം നിലയ്ക്ക് വോട്ട് ഉണ്ട്. ആരെ നിർത്തിയാലും പലയിടങ്ങളിലും ജയിക്കാനാകും. ബിജെപി പതുക്കെ വളർന്നു വരുന്നതേയുള്ളൂ. ആ പാർട്ടി ഇതുപോലെ ആരുമായും ബന്ധമില്ലാത്ത ആളെ സ്ഥാനാർഥിയാക്കിയാൽ വിജയിക്കാനാകില്ല എന്നും  അദ്ദേഹം പറഞ്ഞു.