കർണാടക നിയമസഭാ തെരഞ്ഞെടുപ്പ് നടക്കാനിരിക്കെ പുറത്ത് വരുന്ന സർവേ ഫലങ്ങൾ കോൺഗ്രസിന് അനുകൂലം. കോൺഗ്രസ് 46 ശതമാനം വോട്ട് വിഹിതത്തോടെ 126 സീറ്റുമായി അധികാരത്തിൽ എത്തുമെന്ന് സീ-ഫോർ സർവേ റിപ്പോർട്ട് വ്യക്തമാക്കുന്നു.

ബിജെപി 70 സീറ്റുകളിൽ വരെ വിജയിച്ച് നില മെച്ചപ്പെടുത്തുമെന്നും സർവേ റിപ്പോർട്ട് പറയുന്നു. അതേസമയം ജനതാദൾ എസിന് വോട്ടുവിഹിതത്തിലും സീറ്റെണ്ണത്തിലും വലിയ കുറവ് ഉണ്ടാക്കുമെന്നാണ് സർവേ നല്‍കുന്ന സൂചന. 2013ൽ 40 സീറ്റുകള്‍ നേടിയ ജനതാദൾ ഇത്തവണ 27 സീറ്റ് നേടുമെന്നാണ് സർവേ ഫലം.

154 നിയമസഭാ മണ്ഡലങ്ങളിലെ വോട്ടർമാരിൽ നിന്ന് വിവരങ്ങൾ ശേഖരിച്ചാണ് റിപ്പോർട്ട് തയ്യാറാക്കിയത്. നഗരമേഖലകളിലെ 326 പ്രദേശങ്ങൾ, ഗ്രാമീണ മേഖലകളിലെ 977 കേന്ദ്രങ്ങൾ എന്നിവക്കൊപ്പം 2368 പോളിംഗ് ബൂത്തുകളും അടിസ്ഥാനപ്പെടുത്തിയാണ് സർവേ നടത്തിയത്.