ബി.ജെ.പി നേതാവും മുന്‍ മുഖ്യമന്ത്രിയുമായ യെദിയൂരപ്പയെ അഴിമതിക്കാരനാക്കി ബി.ജെ.പി ദേശീയ അധ്യക്ഷന്‍ അമിത് ഷാ. കര്‍ണാടകയിലെ കോണ്‍ഗ്രസ് സര്‍ക്കാരിനെതിരെ അഴിമതി ആരോപണം ഉന്നയിക്കവെയാണ് അമിത് ഷായുടെ നാവ് പിഴച്ച്‌ സിദ്ധരാമയ്യക്ക് പകരം യെദിയൂരപ്പയുടെ പേര് പറഞ്ഞത്. യെദിയൂരപ്പയെ വേദിയില്‍ തൊട്ടടുത്ത് ഇരുത്തിക്കൊണ്ടാണ് ബിജെപി നേതാക്കളെ ഞെട്ടിച്ച്‌ അമിത് ഷാ ഈ പ്രസ്താവന നടത്തിയത്.

രാജ്യത്ത് ഏറ്റവുമധികം അഴിമതി നടത്തിയ സര്‍ക്കാരിന്റെ കാര്യത്തില്‍ ഒരു മത്സരം നടത്തിയാല്‍ യെദിയൂരപ്പ സര്‍ക്കാര്‍ ഒന്നാം സ്ഥാനത്ത് എത്തുമെന്ന് അമിത് ഷാ പറഞ്ഞു. അടുത്തിടെ വിരമിച്ച ഒരു സുപ്രീം കോടതി ജഡ്ജി ഇങ്ങനെ പറഞ്ഞുവെന്നായിരുന്നു അമിത് ഷായുടെ പ്രസ്താവന. സിദ്ധരാമയ്യ സര്‍ക്കാര്‍ എന്നാണ് ഉദ്ദേശിച്ചതെങ്കിലും പറഞ്ഞുവന്നപ്പോള്‍ സ്വന്തം പാര്‍ട്ടി നേതാവിന്റെ പേര് തന്നെ അദ്ദേഹം പറഞ്ഞു. എന്നാല്‍ ഉടന്‍ തന്നെ, തെറ്റു തിരുത്തി സിദ്ധരാമയ്യ സർക്കാരാണ് അഴിമതിയില്‍ ഒന്നാമതെന്ന് അമിത് ഷാ വ്യക്തമാക്കി.