2019 ലോക്​സഭാ തെരഞ്ഞെടുപ്പില്‍ പ്രതിപക്ഷ പാര്‍ട്ടികളുടെ ഐക്യത്തെ മറികടന്ന് വിജയിക്കുകയെന്നത്​ ബി.ജെ.പിക്ക് അസാധ്യമാണെന്ന് കോണ്‍ഗ്രസ്​ അധ്യക്ഷന്‍ രാഹുല്‍ ഗാന്ധി. തെരഞ്ഞെടുപ്പ് വിജയം എന്ന സ്വപ്​നം ബി.ജെ.പി മറക്കുകയാണ്​ നല്ലതെന്നും അദ്ദേഹം പറഞ്ഞു.

പ്രതിപക്ഷ ഐക്യത്തിന്റെ കീഴില്‍ പ്രധാനമന്ത്രി നരേന്ദ്രമോദിക്ക്​ വാരണസി സീറ്റു പോലും നഷ്​ടമാകും. 2019 ല്‍ എല്ലാം സാധാരണത്തേതു പോലെയാവുകയും കോണ്‍ഗ്രസ്​ തിരിച്ചുവരുകയും ചെയ്യുമെന്നും രാഹുൽ വ്യക്തമാക്കി.ബംഗളൂരുവില്‍ തെരഞ്ഞെടുപ്പ്​ പ്രചരണത്തിനെത്തിയ അദ്ദേഹം മാധ്യമങ്ങളോട്​ സംസാരിക്കുകയായിരുന്നു.

ഗുജറാത്ത്​, രാജസ്ഥാന്‍, മധ്യപ്രദേശ്​, ഹരിയാന, പഞ്ചാബ്​, ഛത്തിസ്​ഗഢ്​ എന്നിവിടങ്ങള്‍ കോണ്‍ഗ്രസ്​ തിരിച്ചെടുത്തു കഴിഞ്ഞു. ഇതുവരെ നിങ്ങള്‍ കാണാത്ത രീതിയിലുള്ള തകര്‍ച്ചയാണ്​ ബി.ജെ.പിക്ക്​ ഉണ്ടാകാന്‍ പോകുന്നത്. മോദിയും ആര്‍.എസ്​.എസും ചേര്‍ന്ന്​ താറുമാറാക്കിയ രാജ്യത്തെ തിരിച്ചെടുക്കുകയെന്നതാണ്​ ലക്ഷ്യമെന്നും അത്​ പ്രതിപക്ഷ പാര്‍ട്ടികളുടെ ഐക്യത്തിലൂടെ നടപ്പാകുമെന്നും അദ്ദേഹം പറഞ്ഞു.