ലോക്‌സഭാ തെരഞ്ഞെടുപ്പ് നേരത്തെയാക്കാന്‍ ബിജെപി നേതൃത്വത്തില്‍ ആലോചന. കര്‍ണ്ണാടക തെരഞ്ഞെടുപ്പ് കഴിഞ്ഞതോടെ ലോക്‌സഭാ തെരഞ്ഞെടുപ്പ് നേരത്തെ നടത്തുന്നതിനുള്ള ആലോചനകള്‍ ബിജെപിയില്‍ സജീവമാണ്. പാര്‍ട്ടി സംസ്ഥാന പ്രസിഡന്റുമാരുടേയും സംഘടനാ സെക്രട്ടറിമാരുടേയും യോഗം വിളിച്ച് ദേശീയ അധ്യക്ഷന്‍ അമിത് ഷാ തെരഞ്ഞെടുപ്പ് പ്രവര്‍ത്തനങ്ങള്‍ വിലയിരുത്തുകയും നിര്‍ദ്ദേശങ്ങള്‍ നല്‍കുകയും ചെയ്യും. പാര്‍ട്ടി ബൂത്ത് തലത്തില്‍ തന്നെ ഇതിനോടകം തെരഞ്ഞെടുപ്പ് പ്രവര്‍ത്തനങ്ങള്‍ തുടങ്ങിക്കഴിഞ്ഞു.

ഓരോ പഞ്ചായത്തിലും നിയോജക മണ്ഡലങ്ങളിലും പാര്‍ലമെന്റ് മണ്ഡലത്തിലും പാര്‍ട്ടി തെരഞ്ഞെടുപ്പ് പ്രവര്‍ത്തനങ്ങള്‍ക്കായി ഇന്‍ചാര്‍ജുമാരെ നിശ്ചയിച്ചിട്ടുണ്ട്. കേരളത്തില്‍ ബിജെപി നേതൃത്വം 11 സീറ്റുകളിലാണ് മികച്ച മത്സരം കാഴ്ച്ചവെയ്ക്കാന്‍ കഴിയുമെന്ന് പ്രതീക്ഷിക്കുന്നത്. ഇവിടങ്ങളില്‍ പ്രമുഖരെ തന്നെ സ്ഥാനാര്‍ത്ഥികളാക്കാനും പാര്‍ട്ടിയില്‍ ആലോചന നടക്കുന്നുണ്ട്. കഴിഞ്ഞ ലോക്‌സഭാ തെരഞ്ഞെടുപ്പില്‍ പാര്‍ട്ടി മികച്ച വിജയം നേടിയ ഉത്തര്‍പ്രദേശ് ,മധ്യപ്രദേശ്, രാജസ്ഥാന്‍,തുടങ്ങിയ സംസ്ഥാനങ്ങളില്‍ ഇത്തവണ വിജയം ആവര്‍ത്തിക്കാനാകില്ലെന്ന തിരിച്ചറിവും ബിജെപിക്കുണ്ട്. അതുകൊണ്ട് തന്നെ കേരളമുള്‍പ്പെടെയുള്ള ദക്ഷിണേന്ത്യന്‍ സംസ്ഥാനങ്ങളില്‍ നിന്ന് പരമാവധി സീറ്റുകള്‍ സ്വന്തമാക്കുന്നതിനുള്ള തന്ത്രങ്ങള്‍ക്കാണ് ബിജെപി രൂപം നല്‍കുക.

പൊതു തെരഞ്ഞെടുപ്പ് നേരത്തെ പ്രഖ്യാപിക്കുന്നതിലൂടെ പ്രതിപക്ഷ പാര്‍ട്ടികള്‍ക്കിടയില്‍ ആശയക്കുഴപ്പം സൃഷ്ടിക്കുന്നതിനും ബിജെപി ശ്രമിക്കുന്നുണ്ട്. പ്രതിപക്ഷ ഐക്യം തകര്‍ക്കുന്നതിനുള്ള നീക്കമാണ് ബിജെപി നടത്തുന്നത്. ഉത്തര്‍പ്രദേശില്‍ പ്രതിപക്ഷ പാര്‍ട്ടികള്‍ക്കിടയില്‍ ഐക്യം രൂപപെട്ടത് ബിജെപി യ്ക്ക് തിരിച്ചടിയായെന്ന കാര്യവും നേതൃത്വം മനസിലാക്കുന്നുണ്ട്. കോണ്‍ഗ്രസ്സ് മുക്ത ഭാരതമാണ് തങ്ങളുടെ ലക്ഷ്യമെന്നും മറ്റ് രാഷ്ട്രീയ പാര്‍ട്ടികളോട് അയിത്തമില്ലെന്നും ബിജെപി നേതൃത്വം വ്യക്തമാക്കുകയും ചെയ്യുന്നു.