കെ.എം മാണിയുടെ കൈയും കാലും പിടിച്ച് കോൺഗ്രസിലെത്തിക്കാൻ യുഡിഎഫിന്റെ സമാരാദ്ധ്യരായ നേതാക്കൾ തയ്യാറായതോടെ കർണാടകത്തിൽ കോൺഗ്രസ് കാണിച്ച മാതൃക അടുത്ത നിയമസഭാ തെരഞ്ഞടുപ്പിൽ കേരളത്തിലും ബാധകമാക്കേണ്ടി വരുമെന്ന് ഏതാണ്ട് ഉറപ്പായി.

കർണാടകത്തിൽ കുമാരസ്വാമിയാണ് മുഖ്യമന്ത്രിയായതെങ്കിൽ കേരളത്തിൽ പി കെ കുഞ്ഞാലിക്കുട്ടിയോ കെ-എം.മാണിയോ മുഖ്യമന്ത്രിയാകും. കാരണം കേരളത്തിൽ കോൺഗ്രസിനെക്കാളും ജനപിന്തുണയുള്ളത് ഇപ്പോൾ ലീഗിനും മാണിക്കുമാണ്. അടുത്ത നിയമസഭാ തെരഞ്ഞടുപ്പിൽ കോൺഗ്രസിനെക്കാളും വോട്ട് മാണിക്കും ലീഗിനും ലഭിക്കുമെന്ന് ഇപ്പോൾ തന്നെ ഉറപ്പായി.

കർണാടകത്തിലേത് പോലെ പ്രാദേശിക സഖ്യങ്ങൾക്കാണ് ദേശീയ തലത്തിൽ കോൺഗ്രസ് മുൻകൈയെടുക്കുന്നതെന്ന് വ്യക്തമായി. രാഹുൽ ഗാന്ധിയുടെ ഉദ്ദേശ്യം തന്നെ അതാണ്. രാഹുലിന് ഇപ്പോൾ പ്രധാനമന്ത്രിയാകാൻ ധൃതിയില്ല. ഒരു പത്തു വർഷം കൂടി കാക്കാൻ അദ്ദേഹം തയാറാണ്. സോണിയാ ഗാന്ധിക്കും ഇത് തന്നെയാണ് നിലപാട്. കോൺഗ്രസിന്റെ രാശി ദേശീയ തലത്തിൽ മോശമാണ്. അതു കൊണ്ടു തന്നെ പ്രാദേശിക സഖ്യങ്ങളിലൂടെ കളം പിടിക്കാൻ കോൺഗ്രസ് ഉദ്ദേശിച്ചത്.

കേരളത്തിൽ മത്സരിക്കുന്ന സീറ്റുകളിലൊക്കെ ജയിക്കുന്ന പാർട്ടിയാണ് ലീഗും കേരള കോൺഗ്രസ് മാണിയും. അവർ വിചാരിക്കുന്നവർ കേരളം ഭരിക്കും എന്നതാണ് ഇന്നത്തെ അവസ്ഥ. ഇതാണ് ഇന്ത്യയിലെമ്പാടും നടക്കുന്നത്. എല്ലായിടത്തും പ്രാദേശിക നേതൃത്വങ്ങളാണ് ഭരണം ആര് നടത്തണമെന്ന് തീരുമാനിക്കുന്നത്. ചന്ദ്രബാബു നായിഡുവും മമത ബാനർജിയും മായാവതിയും കരുണാനിധിയും കുമാരസ്വാമിയും മുലായം സിംഗും ഉദാഹരണം. പ്രാദേശിക പാർട്ടികൾ അധികാരത്തിലെത്തിയാൽ മാത്രമേ അതത് സംസ്ഥാനങ്ങളിൽ ഗുണം ചെയ്യുന്ന സ്ഥിതിവിശേഷം നിലവിൽ വരികയുള്ളു. കേരളത്തിൽ കോൺഗ്രസ് അധികാരത്തിലെത്തുന്നത് കൊണ്ടാണ് കേരളത്തിന് പ്രത്യേകിച്ചൊരു ഗുണവും ഉണ്ടാകാത്തത്. അതേ സമയം കരുണാനിധിയും മായാവതിയുമൊക്കെ അവരവരുടെ സംസ്ഥാനങ്ങളിലേക്ക് വികസന വസന്തം വാരിക്കോരിയെത്തിക്കുന്നു.

കേരളത്തിൽ കോൺഗ്രസ് തീരെ ദുർബലമാണ്. തികച്ചും ദുർബലമായ ഒരു സർക്കാരിനെ ഒരു കടലാസുകൊണ്ടു പോലും നേരിടാൻ രമേശിനാവുന്നില്ല.

അപ്പോഴും ഏച്ചുകെട്ടിയാൽ മുഴച്ചിരിക്കുമോ എന്ന സംശയം പ്രകടിപ്പിക്കുന്നവർ ഉണ്ട്. കേന്ദ്രത്തിൽ കൂട്ടുമുന്നണി അധികാരത്തിലെത്തിയാൽ അതിന് എത്ര നാൾ ആയുസ് കാണുമെന്ന് അറിയില്ല. എന്നാൽ പൊതുവേ ദുർബലമായി കൊണ്ടിരിക്കുന്ന ബിജെപിയെ സംബന്ധിച്ചടത്തോളം അടുത്ത തെരഞ്ഞെടുപ്പിൽ മികച്ചൊരു പ്രതിപക്ഷമായി ദേശീയ തലത്തിൽ അവർക്ക് മാറാൻ കഴിയുമോ എന്ന് സംശയമാണ്. അങ്ങനെ വരുമ്പോൾ ഭരണപക്ഷം കൂടുതൽ ശക്തമാകും. പൊളിക്കാൻ ആളില്ലെങ്കിൽ പൊളിക്കാനുള്ള ശ്രമങ്ങളും കുറഞ്ഞിരിക്കും. അതു കൊണ്ടു തന്നെ മുഖ്യമന്ത്രി സ്ഥാനത്തേക്ക് മാണിയെയോ കുഞ്ഞാലിക്കുട്ടിയെയോ കോൺഗ്രസ് ഉയർത്തി കാണിച്ചേക്കാം.