തൊണ്ണൂറ്റി നാലിന്റെ ചെറുപ്പത്തിലാണ് ഭരണപരിഷ്കാര കമ്മീഷൻ അധ്യക്ഷൻ വിഎസ് അച്യുതാനന്ദൻ. സജീവമായി രാഷ്ട്രീയ കാര്യങ്ങളിൽ ഇടപെടുന്നില്ലങ്കിലും വിഎസിന്റെ വീറും വാശിയും എങ്ങും പോയിട്ടില്ലെന്ന് ഇന്നലെ നിയമ സഭയിൽ നടന്ന പ്രസംഗം സൂചിപ്പിക്കും. കൃത്യമായ രാഷ്ട്രീയ വിമർശനവുമായി വിഎസ് സഭയിൽ തിളങ്ങിയപ്പോൾ പ്രതിപക്ഷത്തിന് മൗനം മാത്രമായിരുന്നു മറുപടി.

'കോൺഗ്രസ്സും ബിജെപിയും എട്ടുനിലയിൽ പൊട്ടി. ബാലറ്റ് പെട്ടി പൊട്ടിച്ചപ്പോൾ ആദ്യം ട്ടോ... കോൺഗ്രസ്സ് സ്ഥാനമാർത്തി പൊട്ടിയ ശബ്ദമായിരുന്നു അത്. പിന്നെയോ ട്ടോ.. ട്ടോ... ട്ടോ...അത് ബിജെപി പൊട്ടിച്ചിതറിയതായിരുന്നു. ഏതായാലും മെയ് മുപ്പത്തിയൊന്നിന് ശേഷം രണ്ട് കൂട്ടരെയും ഈ ചെങ്ങന്നൂർ ഒന്നും കാണാനില്ല. എന്തൊക്കെ ബഹളമായിരുന്നു സാർ, പണ്ടൊരു സിനിമയിൽ പറഞ്ഞതുപോലെ മലപ്പുറം കത്തി , മെഷീൻ ഗൺ , ബോംബ് ,ഒലക്കേടെ മൂട് ഒടുവിൽ പവനായി ശവമായി എന്ന് പറഞ്ഞത് പോലെയാണ് കോൺഗ്രസിന്റെയും ബിജെപിയുടെയും അവസ്ഥ.' എന്നായിരുന്നു വിഎസിന്റെ പ്രസംഗം .