കോവിഡ് പശ്ചാത്തലത്തില്‍ കര്‍ശന മാനദണ്ഡങ്ങള്‍ ഉള്‍പ്പെടുത്തി 2021ലെ ഹജ്ജിന് അപേക്ഷ സ്വീകരിക്കാനുള്ള നടപടികള്‍ ആരംഭിച്ചു. ഹജ്ജുമായി ബന്ധപ്പെട്ട് സൗദി അറേബ്യ മാര്‍ഗനിര്‍ദേശങ്ങള്‍ ഇതുവരെ പുറപ്പെടുവിച്ചിട്ടില്ല. ഇതുകൂടി പരിഗണിച്ചാകും അന്തിമനടപടികള്‍. 18നും 65 വയസ്സിനും ഇടയിലുള്ളവര്‍ മാത്രമാണ് അപേക്ഷ സമര്‍പ്പിക്കേണ്ടത്.കുട്ടികളെ അനുവദിക്കില്ല. 45 വയസ്സിന് മുകളിലുള്ള സ്ത്രീകളുടെ വിഭാഗത്തിലും 65 വയസ്സാണ് പ്രായപരിധി. ഒരുകവറില്‍ പരമാവധി മൂന്ന് പേര്‍ക്ക് മാത്രമേ അപേക്ഷിക്കാന്‍ പാടുള്ളൂ.

പൂര്‍ണമായും ഓണ്‍ലൈന്‍ വഴി അപേക്ഷിക്കണം. കേന്ദ്ര ഹജ്ജ് കമ്മിറ്റിയുടെ   www.hajcommittee.gov.in വെ​ബ്സൈ​റ്റി​ലും സം​സ്ഥാ​ന ഹ​ജ്ജ് ക​മ്മി​റ്റി​യു​ടെ www.keralahajcommittee.org വെബ്‌സൈറ്റിലും അപേക്ഷസൗകര്യം ലഭ്യമാണ്. ഡിസംബര്‍ പത്തുവരെയാണ് സമര്‍പ്പിക്കാനുള്ള സമയം. തെരഞ്ഞെടുക്കപ്പെട്ട അപേക്ഷകര്‍ അപേക്ഷയും ഒറിജിനല്‍ പാസ്‌പോര്‍ട്ടും അഡ്വാന്‍സ് തുകയടച്ച രശീതി, മെഡിക്കല്‍ ഫിറ്റ്‌നസ് സര്‍ട്ടിഫിക്കറ്റ് എന്നിവയും സംസ്ഥാന ഹജ്ജ് കമ്മിറ്റിക്ക് രണ്ടാം ഘട്ടത്തില്‍ സമര്‍പ്പിക്കണം. എന്‍.ആര്‍.ഐ അപേക്ഷകര്‍ക്ക് പ്രത്യേക പരിഗണനയുണ്ടാകില്ല. അപേക്ഷകര്‍ക്ക് 10-01-2022 വരെ കാലാവധിയുള്ളതും 10-12-2020നുള്ളില്‍ ഇഷ്യൂ ചെയ്തതുമായ മെഷീന്‍ റീഡബിള്‍ പാസ്‌പോര്‍ട്ട് ഉണ്ടാകണമെന്നും ഹജ്ജ് കമ്മിറ്റി.