ദുബായിലെ കമ്പനിയിൽ മാനേജരായി ജോലി നോക്കിയിരുന്ന പ്രവാസി യുവാവ് ശമ്പള കുടിശ്ശികയായി കിട്ടാനുള്ള പണം ചോദിച്ച്‌ ഓഫീസിലെത്തി ആത്മഹത്യാ ഭീഷണി മുഴക്കി .. മാനേജറെ ദുബായ് പോലീസ് എത്തി അറസ്റ്റ് ചെയ്തു നീക്കി .

27കാരനായ ബംഗ്ലാദേശി യുവാവാണ് ദുബായിലെ അല്‍ ഹംരിയ്യ പ്രദേശത്തെ കണ്‍സ്ട്രക്ഷന്‍ കമ്പനി ഓഫീസില്‍ പെട്രോള്‍ കാനുമായി കയറിച്ചെന്ന് ഭീഷണി മുഴക്കിയത്. കിട്ടാനുള്ള പണം നല്‍കിയില്ലെങ്കില്‍ ദേഹത്ത് പെട്രോള്‍ ഒഴിച്ച് തീക്കൊളുത്തി ആത്മഹത്യ ചെയ്യുമെന്നായിരുന്നു മാനേജറുടെ ഭീഷണി.

കമ്പനിയിലെ അക്കൗണ്ടന്റായ ഈജിപ്ത് പൗരന്റെ കാബിനില്‍ ചെന്നായിരുന്നു യുവാവ് ആത്മഹത്യാ ഭീഷണി മുഴക്കിയത്. എന്നാല്‍ കമ്പനിയിലെ സെക്യൂരിറ്റി ഉദ്യോഗസ്ഥന്‍ വിവരം അറിയിച്ചതനുസരിച്ച് സ്ഥലത്തെത്തിയ പോലീസ് ഇയാളെ അറസ്റ്റ് ചെയ്ത് കേസെടുക്കുകയായിരുന്നു.

ദുബായ് ഫസ്റ്റ് ഇന്‍സ്റ്റന്‍സ് കോടതിയിലാണ് കേസ്. പ്രതി പെട്രോള്‍ കാനുമായി ഓഫീസില്‍ നില്‍ക്കുന്നത് താന്‍ കണ്ടതായി റഫാ പോലിസ് സ്‌റ്റേഷനിലെ പോലീസ് ഉദ്യോഗസ്ഥന്‍ കോടതിയെ അറിയിച്ചു.

എന്താണ് സംഭവമെന്ന് അന്വേഷിച്ചപ്പോള്‍ തനിക്ക് കമ്പനിയില്‍ നിന്ന് ശമ്പള കുടിശ്ശിക കിട്ടാനുണ്ടെന്നും പലവട്ടം ആവശ്യപ്പെട്ടിട്ടും അത് നല്‍കാന്‍ കമ്പനി തയ്യാറാകുന്നില്ലെന്നും ഇയാള്‍ പറഞ്ഞതായി പോലീസ് കോടതിയെ അറിയിച്ചു. അറ്റകൈ എന്ന രീതിയിലാണ് താന്‍ പെട്രോളുമായെത്തി ആത്മഹത്യാ ഭീഷണി മുഴക്കിയതെന്നും അയാള്‍ പറഞ്ഞു.

ഉച്ചയ്ക്ക് ഒരു മണിയോടെയാണ് യുവാവ് തന്‍റെ കാബിനിലെത്തിയതെന്ന് 32കാരനാണ് ഈജിപ്ത്യന്‍ അക്കൗണ്ടന്റും കോടതിയെ അറിയിച്ചു. പണം നല്‍കിയില്ലെങ്കില്‍ ഓഫീസിനകത്ത് വെച്ചുതന്നെ പെട്രോളൊഴിച്ച് തീക്കൊളുത്തി മരിക്കുമെന്ന് യുവാവ് പറഞ്ഞതായും അക്കൗണ്ടന്റ് വ്യക്തമാക്കി.

ആത്മഹത്യാ ഭീഷണി മുഴക്കിയതിനും ഓഫീസിന് തീവയ്ക്കാന്‍ ശ്രമിച്ചതിനുമാണ് ഇയാള്‍ക്കെതിരേ കേസെടുത്തിരിക്കുന്നത്. ചോദ്യം ചെയ്യലില്‍ പ്രതി കുറ്റം സമ്മതിച്ചതായും പോലീസ് പറഞ്ഞു. നവംബര്‍ 24 നു കോടതി കേസ് പരിഗണിക്കാനിരിക്കുകയാണ്