സ്വദേശികളും വിദേശികളും വ്യക്തികളുമായി ബന്ധപ്പെട്ട കാര്യങ്ങള്‍ അടിയന്തിര ഘട്ടങ്ങളില്‍ അധികൃതരെ അറിയിക്കുന്നതിന് വേണ്ടി ഒരുപോലെ ഉപയോഗിച്ചു വരുന്നതാണ് കുല്ലുനാ അംന്‍ എന്ന മൊബൈല്‍ ആപ്പ്. വ്യക്തികളുടെ സുരക്ഷ കൂടുതല്‍ ഉറപ്പാക്കുന്ന വിധത്തിലുള്ള സേവനങ്ങള്‍ ഉള്‍പ്പെടുത്തിയാണ് ആപ്പ് പുറത്തിറക്കിയിരിക്കുന്നത്. ലോഗിന്‍ ചെയ്താല്‍ ഏതൊരാള്‍ക്കും എളുപ്പത്തില്‍ ഉപയോഗിക്കാന്‍ കഴിയുന്ന വിധത്തിലാണ് ആപ്പ് രൂപകല്‍പ്പന ചെയ്തിരിക്കുന്നത്.

ഇഖാമ നമ്പറും മൊബൈല്‍ നമ്പരും നല്‍കിയാണ് ആപ്പിലേയ്ക്ക് ലോഗിന്‍ ചെയ്യേണ്ടത്. വ്യക്തികളുടെ സ്വകാര്യ ജീവിതത്തിന് പ്രായാസം സൃഷ്ടിക്കുക, സോഷ്യല്‍ മീഡിയാ അക്കൗണ്ടുകള്‍ ഹാക്ക് ചെയ്യുക, മനുഷ്യ കടത്ത്, അപകീര്‍ത്തിപ്പെടുത്തുക, വഞ്ചന, മോശം വാക്കുകളുപയോഗിക്കുക, നിര്‍ബന്ധിച്ച് തൊഴിലെടുപ്പിക്കുക, സെക്‌സ് വ്യാപാരം, ലൈംഗിക ഉപദ്രവം തുടങ്ങിയ കുറ്റകൃത്യങ്ങള്‍ ഈ ആപ്പ് വഴി റിപ്പോര്‍ട്ട് ചെയ്യാവുന്നതാണ്.

കര്‍ഫ്യൂ ഇന്‍സിഡന്റുകള്‍, വാഹനാപകടങ്ങള്‍, ഗതാഗത തടസ്സം അടക്കമുള്ള ട്രാഫിക് സംബന്ധമായ എല്ലാ വിവരങ്ങളും പെട്ടെന്ന് തന്നെ അധികൃതരുടെ ശ്രദ്ധയില്‍ പെടുത്താന്‍ ഈ ആപ്പ് ഉപയോഗിക്കുന്നതിലൂടെ സാധിക്കും. കോവിഡ് രോഗികളുടെ എണ്ണം അനുദിനം വര്‍ദ്ധിച്ചു വന്ന സാഹചര്യത്തില്‍ വ്യാപനം തടയുന്നതിനും സ്വയം സുരക്ഷ ഉറപ്പ് വരുത്തുന്നതിനും അകലം പാലിക്കുക എന്ന് അര്‍ത്ഥം വരുന്ന 'തബാഉദ്' എന്ന പേരില്‍ ഒരു മൊബൈല്‍ ആപ്പ് വികസിപ്പിച്ചിരുന്നു. ഉപയോക്താക്കള്‍ക്ക് അവരുടെ വിവരങ്ങള്‍ പങ്കിടാനും അവരുമായി സമ്പര്‍ക്കം പുലര്‍ത്തുന്നവരുമായി ബന്ധപ്പെടുന്നതിനും വേണ്ടിയായിരുന്നു ഇത്.