കോറോണയെ തുടർന്ന് ഏറെ കഷ്ടതകൾ അനുഭവിച്ച് നാട്ടിലേക്ക് എത്തിയ പ്രവാസികളെ വീട്ടിൽപോലും അടുപ്പിക്കാത്ത കാഴ്ചകൾ നാം കണ്ടതാണ്. സമൂഹമാധ്യമങ്ങളാണ് സാക്ഷി. എന്നിരുന്നാലും കണ്ടിരുന്ന പ്രവാസികൾ കണ്ണുനീർ തുടച്ചുകൊണ്ട് പറഞ്ഞു ഇനി നാട്ടിലേക്ക് ഇല്ല എന്ന്. എന്നാൽ ഇപ്പോഴോ പ്രവാസലോകം സജീവമായികഴിഞ്ഞു. പറഞ്ഞുവരുന്നത് നമ്മുടെ നാട്ടിലെത്തിയ പ്രവാസികളെ കുറിച്ചാണ്. ഇനി അവർ തീരുമാനിക്കും കേരളത്തിന്റെ തലവര. കോവിഡിനെ തുടർന്ന് മടങ്ങിയെത്തിയ പ്രവാസികളുടെ വോട്ട് തദ്ദേശ തിരഞ്ഞെടുപ്പിൽ നിർണായകമാകുമെന്നാണ് റിപ്പോർട്ട്. ലോക്ഡൗണിനു ശേഷം കാസർകോട് ജില്ലയിൽ മാത്രം കാൽ ലക്ഷത്തിലേറെ പേരാണ് പ്രവാസ ജീവിതത്തിൽ നിന്ന് താൽക്കാലിക അവധിയെടുത്ത് നാട്ടിലെത്തിയിട്ടുള്ളത്. അപ്പോൾ കേരളത്തിലോ .

എന്നാൽ ഇതിൽ പലരും ആദ്യമായി വോട്ട് ചെയ്യാൻ ഒരുങ്ങുകയാണ്. 1990ലെ തിരഞ്ഞെടുപ്പിൽ വോട്ട് ചെയ്ത ശേഷം വോട്ട് ചെയ്യാൻ പറ്റാത്തവരുമുണ്ട്. തിരഞ്ഞെടുപ്പ് സമയത്ത് നാട്ടിൽ ഇല്ലാത്തതും ഉണ്ടെങ്കിൽ തന്നെ വോട്ടർ പട്ടികയിൽ പേരില്ലാത്തതുകൊണ്ടുമാണ് പലർക്കും വോട്ട് ചെയ്യാൻ കഴിയാതിരുന്നത്. കോവിഡ് കാരണം മാസങ്ങൾക്കു മുൻപ് തന്നെ നാട്ടിലെത്തിയതിനാൽ ഇത്തവണ വോട്ടർ പട്ടികയിൽ പേര് ഉൾപ്പെടുത്താൻ പറ്റിയവർ അനവധിയാണ്.

അതേസമയം കോവിഡ് ജാഗ്രത പോർട്ടലിലെ കണക്കനുസരിച്ച് 28755 പ്രവാസികളാണ് ഇതുവരെ നാട്ടിലെത്തിയത്. കാഞ്ഞങ്ങാട് (2123), കാസർകോട് (2048) നഗരസഭകളിലും ചെമ്മനാട് പഞ്ചായത്തിലു(2089) മാണ് ഏറ്റവും കൂടുതൽ പ്രവാസികൾ എത്തിയത് എന്നാണ് കണക്ക്. ചെങ്കള(1812), പള്ളിക്കര(1778), അജാനൂർ(1738) പഞ്ചായത്തുകളിലും ഒട്ടേറെ പ്രവാസികൾ വിദേശ രാജ്യങ്ങളിൽ നിന്ന് എത്തിയിട്ടുണ്ട്.

50 ൽ താഴെ വോട്ടുകൾക്ക് പരാജയപ്പെട്ട ഒട്ടേറെ സ്ഥാനാർഥികൾ പല പഞ്ചായത്തുകളിലും നഗരസഭകളിലുമുള്ളതിനാൽ തന്നെ ഇവരുടെ ഓരോ വോട്ഉം നിർണായകമാകും. ജില്ലാ പഞ്ചായത്ത് ഡിവിഷൻ പോലും 200 ൽ താഴെ വോട്ടുകൾക്ക് ജയപരാജയങ്ങൾ നിർണയിച്ച അനുഭവം കഴിഞ്ഞ തിരഞ്ഞെടുപ്പിലുണ്ടായിട്ടുമുണ്ട്. ഇതുമായി ബന്ധപ്പെട്ട് നോക്കുമ്പോൾ മടങ്ങിയെത്തിയ പ്രവാസികളുടെ കണക്ക് മുന്നണികളുടെ കണക്ക് കൂട്ടലുകൾ തെറ്റിക്കുമെന്നതിൽ യാതൊരുവിധ തർക്കമില്ല. പ്രവാസികളെ നാട്ടിലെത്തിക്കുന്നതുമായി ബന്ധപ്പെട്ട് ഉയർന്ന വിവാദങ്ങളും മറ്റും ഇവരുടെ വോട്ടിനെ സ്വാധീനിക്കുമോ എന്നാണ് ഇനി അറിയാനുള്ളത്.