സൗദിയില്‍ കോവിഡ് സ്ഥിരീകരിക്കുന്നവരുടെ പ്രതിദിന എണ്ണത്തില്‍ നേരിയ കുറവ് വരികയാണ്. രോഗമുക്തരുടെ എണ്ണം ഉയരുകയും ചെയ്തു. വെള്ളിയാഴ്ച ആരോഗ്യമന്ത്രാലയം പുറത്തുവിട്ട കണക്ക് പ്രകാരം 353 പേര്‍ക്കാണ് പുതുതായി രോഗ ബാധ സ്ഥിരീകരിച്ചത്.

രാജ്യത്താകെ 305 രോഗികള്‍ സുഖം പ്രാപിച്ചു. രാജ്യത്ത് വിവിധയിടങ്ങളിലായി നാല് മരണങ്ങളും റിപ്പോര്‍ട്ട് ചെയ്തു. ഇതുവരെ രോഗം സ്ഥിരീകരിച്ചവരുടെ ആകെ എണ്ണം 372073 ആയി. ഇതില്‍ 362947 പേര്‍ സുഖം പ്രാപിച്ചു.

ആകെ മരണസംഖ്യ 6424 ആയി. 2702 പേര്‍ രാജ്യത്തെ വിവിധ ആശുപത്രികളിലും മറ്റുമായി ചികിത്സയില്‍ കഴിയുന്നു.

അതില്‍ 447 പേരുടെ നില ഗുരുതരമാണ്. ബാക്കിയുള്ളവരുടെ ആരോഗ്യനില തൃപ്തികരമാണ്. രാജ്യത്തെ കോവിഡ് മുക്തി നിരക്ക് 97.6 ശതമാനം ആയി. മരണനിരക്ക് 1.7 ശതമാനമാണ്.

വിശ്വാസികള്‍ക്ക് കൂടി കോവിഡ് സ്ഥിരീകരിച്ചതിനെത്തുടര്‍ന്ന് സൗദിയുടെ വിവിധ പ്രദേശങ്ങളിലെ 8 പള്ളികള്‍ കൂടി താല്‍ക്കാലികമായി അടച്ചതായി ഇസ്ലാമിക്ക് കോള്‍ ആന്റ് ഗൈഡന്‍സ് വിഭാഗം അറിയിച്ചു. ഇതോടെ മുന്‍കരുതല്‍ നടപടികളുടെ ഭാഗമായി അടച്ച പള്ളികളുടെ എണ്ണം 52 അയി. 38 പള്ളികള്‍ അണുവിമുകമാക്കിയ ശേഷം തുറന്നതായും മന്ത്രാലയം പ്രസ്താവനയില്‍ പറഞ്ഞു.