നിയമസഭാ തെരഞ്ഞെടുപ്പിലേക്കുള്ള സ്ഥാനാര്‍ഥി പട്ടികയില്‍ സിപിഎമ്മിന് സമാനമായി അക്കാദമിക് മികവിന് പ്രാധാന്യം നൽകി കോൺഗ്രസും. കോണ്‍ഗ്രസ് മത്സരിക്കുന്ന 92 സീറ്റുകളിലെ 86 സ്ഥാനാര്‍ഥികളെ കെപിസിസി പ്രസിഡന്‍റ് മുല്ലപ്പള്ളി രാമചന്ദ്രൻ പ്രഖ്യാപിച്ചപ്പോൾ മൂന്ന് ഡോക്ടര്‍മാരും രണ്ട് പിഎച്ച്ഡി ബിരുദധാരികളും ഇടംപിടിച്ചു. 42 പേര്‍ക്ക് ബിരുദവും 12 പേര്‍ക്ക് ബിരുദാനന്തര ബിരുദവുമുണ്ട്.

പി ആര്‍ സരിന്‍(ഒറ്റപ്പാലം), എസ് എസ് ലാല്‍(കഴക്കൂട്ടം), കെ എസ് മനോജ്(ആലപ്പുഴ) എന്നിവരാണ് എംബിബിഎസ് ബിരുദമുള്ള സ്ഥാനാർത്ഥികൾ. മാത്യു കുഴല്‍നാടന്‍(മൂവാറ്റുപുഴ), പി ആര്‍ സോന(വൈക്കം) എന്നിവരാണ് പിഎച്ച്ഡി നേടിയവർ. ഒൻപത് വനിതകളെയാണ് കോൺഗ്രസ് സ്ഥാനാർഥികളാക്കിയിരിക്കുന്നത്. കോണ്‍ഗ്രസിലെ ഏറ്റവും പ്രായം കുറഞ്ഞ വനിതാ സ്ഥാനാർത്ഥി 27 വയസുകാരിയായ അരിത ബാബുവാണ്(കായംകുളം).

86 പേരുടെ പട്ടികയിൽ 25 വയസ് മുതൽ 50 വയസ് വരെ പ്രായമുള്ള 46 പേര്‍ ഇടംപിടിച്ചു. 51-60 വയസുവരെയുള്ള 22 പേരും 60 മുതൽ 70 വരെ പ്രായമുള്ള 15 പേരും എഴുപതിന് മുകളിൽ പ്രായമുള്ള മൂന്ന് പേരും പട്ടികയിലുണ്ട്. 55 ശതമാനം പുതുമുഖങ്ങൾക്ക് പ്രാധാന്യം നൽകിയുള്ള പട്ടികയാണ് കോൺഗ്രസിന്റേതെന്ന് കെപിസിസി അധ്യക്ഷന്‍ മുല്ലപ്പള്ളി രാമചന്ദ്രൻ വ്യക്തമാക്കി.

സിപിഎം 3 സ്ഥാനാര്‍ഥികളുടെ പട്ടിക പ്രഖ്യാപിച്ചപ്പോള്‍ വിദ്യാര്‍ഥി-യുവജന നേതാക്കളുടെ പ്രാതിനിധ്യവും അക്കാദമിക് പ്രാവീണ്യവും ശ്രദ്ധേയമായിരുന്നു. 12 വനിതകളും വിദ്യാര്‍ഥി-യുവജന നേതാക്കളായ 13 പേരും ഒന്‍പത് സ്വതന്ത്രരും പട്ടികയിലുണ്ട്. ബിരുദാനന്തര ബിരുദമുള്ള 14 പേരും പിഎച്ച്ഡി ഉള്ള രണ്ട് പേരും ആർക്കിടെക്റ്റായ ഒരാളും എംബിബിഎസ് ബിരുദധാരികളായ രണ്ട് പേരും ഇടംപിടിച്ചിരുന്നു.

മുപ്പത് വയസിന് താഴെയുള്ള നാല് പേരും സിപിഎം സ്ഥാനാര്‍ഥി പട്ടികയില്‍ ശ്രദ്ധേയമായിരുന്നു. സച്ചിന്‍ ദേവി, ജെയ്‌ക് സി തോമസ്, ലിന്‍റോ ജോസഫ്, പി മിഥുന എന്നിവരാണിവര്‍. 50 മുതല്‍ 60 വരെ പ്രായമുള്ളവരാണ് എല്‍ഡിഎഫിന്റെ സ്ഥാനാര്‍ത്ഥിപ്പട്ടികയില്‍ ഏറെപ്പേരും(31 പേര്‍). 60 വയസിന് മുകളിൽ പ്രായമുള്ള 24 പേരും 40-50 വയസിന് ഇടക്കുള്ള 13 പേരും 30- 40 വയസിന് ഇടയ്ക്കുള്ള എട്ട് പേരും മത്സരരംഗത്തുണ്ട്. അതുകൊണ്ട് തന്നെ ഇത്തവണ തീ പാറുന്ന പോരാട്ടമായിരിക്കും ജനങ്ങൾ കാണാനിരിക്കുന്നത്.