പ്രിയപ്പെട്ടവരെ കൈവീശി കാണിച്ച് അന്നം തേടിയുള്ള യാത്രയ്ക്കായി പ്രവാസലോകത്തേക്ക് എത്തിച്ചേർന്ന മാലാഖമാർ. തിരികെ വരുമ്പോൾ പ്രിയപ്പെട്ടവർക്ക് പെട്ടി നിറയെ സമ്മാനവുമായി എത്തുമെന്ന് മനസിൽ സ്വപ്നം കണ്ടിരുന്നു. പക്ഷേ മലയാളി സ്റ്റാഫ്‌ നഴ്സായ സുബി ജേക്കബിന്റെ വിധി മറ്റൊന്നായിരുന്നു. സൗദി നിയമപ്രകാരമുള്ള ക്വാറന്റീൻ പൂർത്തിയാക്കി ജോലിസ്ഥലമായ ജിദ്ദയിലേക്കുള്ള യാത്രയ്ക്കിടെയുണ്ടായ ഒരു വാഹനാപകടത്തിൽ സുബിയും കൂട്ടുകാരി അഖിലയും മരണമടഞ്ഞു. പ്രവാസി സുഹൃത്തുക്കളും പ്രിയപ്പെട്ടവരും ഉൾപ്പെടെ നിരവധി പേരാണ് ആ വിയോഗ വാർത്തയില്‍ കണ്ണീരണിഞ്ഞിരിക്കുന്നത്. സോഷ്യൽ മീഡിയയിൽ ഇരുവർക്കും ആദരമർപ്പിച്ച് പങ്കുവയ്ക്കപ്പെട്ട കുറിപ്പിലെ വരികള്‍ ഇങ്ങനെ....

സുബി ജേക്കബിന് ആദരമർപ്പിച്ച് ജേക്കബ് വർഗീസ് പങ്കുവച്ച കുറിപ്പ് :

ഞങ്ങൾ ഒരുമിച്ചുള്ള അവസാനത്തെ സെൽഫി..എന്റെ പിറന്നാളിന് അവൾ ഡൽഹിയിൽ നിന്നും മേടിച്ചു സൂക്ഷിച്ചു വെച്ചിരുന്ന അവളുടെ പിറന്നാൾ സമ്മാനം ആയ ആ ഷർട്ടും ഇട്ടു വീടിന്റെ പുറതോട്ടു ഇറങ്ങിയപ്പോൾ കുഞ്ഞിനുള്ള പാൽ കുപ്പിയും കയ്യിൽ പിടിച്ചോണ്ട് അവൾ ഓടി എന്റെ അടുത്തു വന്നു എന്നെ കാണാൻ.. ഞാൻ പറഞ്ഞു വാ ഒരു സെൽഫി എടുക്കാം.. അവൾ ഒഴിഞ്ഞു മാറി നാണം ആയിരുന്നു അവളുടെ മുഖത്തു.. അവളുടെ ഡ്രസ്സ്‌ കൊള്ളില്ലത്രേ.. എന്നിട്ടും ഞാൻ ബലമായി അവളെ പിടിച്ചു എന്റെ നെഞ്ചോടു ചേർത്തു നിർത്തി ഒരു ഫോട്ടോ എടുത്തു..

എടുത്തു കഴിഞ്ഞപ്പോൾ ആണ് കണ്ടത് അവളുടെ സ്നേഹം തുളുമ്പുന്ന ആ കണ്ണുകൾ ക്യാമറയിൽ ആയിരുന്നില്ല എന്റെ മുഖത്തേക്ക് ആയിരുന്നു എന്ന്.. ഇനി ആ കണ്ണുകൾ എന്നെ കാണില്ല.. ഇനി എനിക്ക് ചേർത്തുപിടിക്കാൻ അവൾ ഇല്ല... സൗദിയിലുള്ള എയർപോർട്ടിലെ കാർഗോ കൂമ്പാരങ്ങളുടെ ഇടയിൽ കെമിക്കലുകൾ നിറച്ച പെട്ടിക്കുള്ളിൽ ഒന്നു ചലിക്കാൻ പോലും ആകാതെ എന്നെയും കാത്തു അവൾ കിടപ്പുണ്ട്... നാളെ അവൾ എത്തും എന്നെ കാണാൻ. അവൾക്കു ഞങ്ങളെ കാണാൻ കഴിയുമോ എന്നറിയില്ല പക്ഷെ ഞാനും ന്റെ ഹന്നാമോളും അവളെ കാണും ഞങ്ങളുടെ അവസാനത്തെ കൂടി കാഴ്ച..

ഞാനൊന്നു വിളിച്ചു നോക്കാം അവൾ ഒന്നു ഉണർന്നാലോ... എനിക്ക് എന്റെ സുമോളെയും ഹന്നാമോൾക് അവളുടെ മമ്മിയെയും തിരിച്ചു കിട്ടിയാലോ.. പാഴ്ശ്രമം ആണെന്ന് അറിയാം എന്നാലും ഒരു അവസാന പ്രതീക്ഷ....

ആദരാജ്ഞലികൾ