കൊറോണ വ്യാപനത്തിന്റെ ആരംഭം മുതൽ തന്നെ സൗദി ഉൾപ്പടെയുള്ള രാഷ്ട്രങ്ങൾ ഇന്ത്യയ്ക്ക് വിലക്ക് കല്പിച്ചിരുന്നു. എന്നാൽ സൗദിയിലേക്ക് നേരിട്ട് വിമാന സര്‍വീസ് ഇല്ലാത്ത സാഹചര്യത്തില്‍ നേപ്പാള്‍ വഴിയും ഒമാന്‍ വഴിയും മറ്റു ചില ഗള്‍ഫ് രാജ്യങ്ങള്‍ വഴിയും ആണ് ഇന്ത്യയില്‍ നിന്നും സൗദിയിലേക്ക് പ്രവാസികള്‍ യാത്ര ചെയ്തിരുന്നത്. നേപ്പാളില്‍ 15 ദിവസത്തെ ക്വാറൻെറയിൻ കഴിഞ്ഞ് മാത്രമേ സൗദിയിലേക്ക് പോകാന്‍ സാധിക്കുകയുള്ളു.

നേപ്പാൾ വഴി സൗദിയിലേക്ക് വരുന്ന പ്രവാസി സുഹൃത്തുക്കളുടെ ശ്രദ്ധക്ക് എന്ന തലക്കെട്ട് നല്‍കി സൗജിദുല്‍ അന്‍സാര്‍ ഫേസ്ബുക്കില്‍ എഴുതിയ അനുഭവ കുറിപ്പാണ് ഇപ്പോള്‍ സോഷ്യല്‍ മീഡിയയില്‍ ശ്രദ്ധനേടി കൊണ്ടിരിക്കുന്നത്. മേയ് 17 മുതല്‍ യാത്ര നിരോധനം നീങ്ങും എന്നായരുന്നു പ്രവാസികളുടെ പ്രതീക്ഷ, എന്നാല്‍ നിരോധനം ഏര്‍പ്പെടുത്തിയിട്ടുള്ള ഇന്ത്യ ഉള്‍പ്പടെ 20 രാജ്യങ്ങളിലേക്ക് സര്‍വീസ് നടത്തില്ലെന്നാണ് സൗദിയ എയര്‍ലൈന്‍സ് അറിയിച്ചിരിക്കുന്നത്.

സൗജിദുല്‍ അന്‍സാറിന്‍റെ ഫേസ്ബുക്ക് പോസ്റ്റ് വായിക്കാം;

നേപ്പാൾ വഴി സൗദിയിലേക്ക് വരുന്ന പ്രവാസി സുഹൃത്തുക്കളുടെ ശ്രദ്ധക്ക്.

നേപ്പാൾ വഴി സൗദിയിലേക്ക് യാത്ര ചെയ്യുന്നതിൻെറ എഴുപത്തിരണ്ട് മണിക്കൂറിനകത്തുള്ള RT-PCR ടെസ്റ്റ് ചെയ്യുമ്പോൾ അംഗീകൃത കോവിഡ് ടെസ്റ്റ്‌ ലാബിൽ നിന്നാണ് ടെസ്റ്റ് ചെയ്യുന്നത് എന്ന് ഉറപ്പ് വരുത്തുക. കാരണം ഇന്ന് 21/04/21 ന് ബുധനാഴ്ച ഞങ്ങളോടൊപ്പം കാഡ്മണ്ഡു എയർപോർട്ടിൽ നിന്നും അൽജസീറ J9 540 നമ്പർ ഫ്ളൈറ്റിൽ യാത്ര ചെയ്ത മലയാളികളടക്കമുള്ള നിരവധി യാത്രക്കാരെയാണ് ബോർഡിം പാസ്സെടുത്ത് , എമിഗ്രേഷൻ കഴിഞ്ഞ് ഫ്ളൈറ്റിൽ കയറി ഇരുന്നതിന് ശേഷം അംഗീകാരം ഇല്ലാത്ത കോവിഡ് ലാബുകളിൽ നിന്നുള്ള ടെസ്റ്റ് റിപ്പോർട്ട് സ്വീകാര്യമല്ലെന്നും , ഈ ടെസ്റ്റ് റിപ്പോർട്ടുമായി യാത്ര ചെയ്യാൻ അനുവദിക്കില്ലെന്നും പറഞ്ഞ് ഫ്ളൈറ്റ് അധികൃതർ ഫ്ളൈറ്റിൽ നിന്നും ഇറക്കുകയും , അവരുടെ ലഗ്ഗേജ് തിരിച്ചിറക്കുകയും ചെയ്തിട്ടുണ്ട്.

ഈ ഫ്ളൈറ്റിൽ അവർക്ക് യാത്ര ചെയ്യാൻ സാധിച്ചിട്ടില്ല. ആയതിനാൽ നേപ്പാളിലുള്ള ഏജെൻ്റുമാർ മുഖേനയോ , സ്വന്തം റിസ്കിൽ നേപ്പാളിൽ വന്ന് യാത്രക്ക് മുമ്പ് RT PCR ടെസ്റ്റ് നടത്തുന്നവരും യാതൊരു കാരണവശാലും അംഗീകൃത കോവിഡ് ടെസ്റ്റ് ലാബുകളിൽ നിന്നല്ലാതെ ടെസ്റ്റ് നടത്തെരുതെന്ന് അറീക്കുകയാണ്.

ബോർഡിംഗിന് വേണ്ടി ക്യൂ നിൽക്കുന്ന സമയത്ത് തന്നെ അൽജസീറ ഫ്ളൈറ്റ് ജീവനക്കാരനായ ഒരാൾ എല്ലാവരുടെയും RT PCR റിപ്പോർട്ട് ഫോട്ടോ എടുത്ത് അയച്ചു കൊടുക്കുന്നുണ്ടായിരുന്നു. ഫ്ളൈറ്റിൽ എല്ലാവരും കയറിയ ശേഷം ഫ്ളൈറ്റിൽ നിന്നും അനോൺസ് വന്നു. കുറച്ചു പേർ അംഗീകാരമില്ലാത്ത ടെസ്റ്റ് കേന്ദ്രങ്ങളിൽ നിന്നുള്ള ടെസ്റ്റ് റിപ്പോർട്ടാണ് കൈവശം വെച്ചിട്ടുള്ളത് എന്നും എല്ലാവരും റിപ്പോർട്ട് റീചെക്കിംഗിന് വിധേയമാക്കണമെന്നും അറീച്ചു..

തുടർന്ന് നടന്ന ചെക്കിംഗിലാണ് മലയാളികളടക്കമുള്ള മുപ്പത് പേരെ ഫ്ളൈറ്റിൽ നിന്നും ഇറക്കുകയും ലെഗേജടക്കം തിരിച്ചു നൽകുകയും ചെയ്തിട്ടുള്ളത്. നേപ്പാളിൽ ഭീമമായ കാഷ് ചിലവാക്കി പതിനാല് ദിവസം ക്വാറൻെറയിൻ ചെയ്ത്, ഇന്ത്യൻ എമ്പസിയിൽ നിന്നും NOC ലഭിക്കാൻ യാത്രയുടെ തലേദിവസം ഒമ്പത് മണിക്ക് തുറക്കുന്ന എമ്പസിയിൽ പുലർച്ചെ പോയി വരി നിന്ന് 2590/- രൂപ അടച്ച് ഒരു ദിവസം മെനക്കെട്ട് കിട്ടുന്ന എൻ.ഒ.സി യുമായി ഭീമമായ സംഖ്യ മുടക്കി കണക്ഷൻ ഫ്ളൈറ്റ് വഴിയാണ് സൗദിയിലേക്ക് വരുന്നത്...

ആ യാത്ര ഈ ഒരശ്രദ്ധ മൂലം മുടങ്ങുകയും വീണ്ടും ഫ്ളൈറ്റ് ടിക്കറ്റിനായി ദിവസങ്ങൾ കാത്തിരിക്കേണ്ട അവസ്ഥയുണ്ടാവുകയെന്നത് വിശമകരമാണ്. ആയതിനാൽ ഫ്ളൈറ്റ് യാത്രക്ക് മുമ്പുള്ള കോവിഡ് ടെസ്റ്റ് അംഗീകൃത ലാബിൽ നിന്നാണെന്ന് ഉറപ്പ് വരുത്തുക.