കുവൈറ്റിലേക്ക് വരുന്നവരുടെ ശ്രദ്ധയ്ക്ക്.പുതിയ തീരുമാനവുമായി കുവൈത്ത് അധികൃതര്‍. വാക്‌സിന്‍ എടുത്തില്ലെങ്കില്‍ പ്രത്യേകം ശ്രദ്ധിക്കുക. കുവൈത്തിലേക്ക് വരുന്ന യാത്രക്കാരില്‍ വാക്‌സിന്‍ എടുക്കാത്തവര്‍ക്ക് ഇനി മുതല്‍ ക്വാറന്റീന്‍ ഏര്‍പ്പെടുത്തും.

കുവൈത്തിലേക്ക് വരുന്ന യാത്രക്കാരില്‍ കോവിഡ് വാക്‌സിന്‍ എടുക്കാത്തവരെ ഇന്‍സ്റ്റിട്യൂഷണല്‍ ക്വാറന്റീന് വിധേയരാക്കുമെന്ന വിവരം അധികൃതര്‍ അറിയിച്ചിരിക്കുകയാണ്.

ആദ്യ ഒരാഴ്ച ഇന്‍സ്റ്റിട്യൂഷണല്‍ ക്വാറിന്റീന്‍ പൂര്‍ത്തിയാക്കി തുടര്‍ന്നുള്ള ഒരാഴ്ച ഹോം ക്വാറന്റീന്‍ പൂര്‍ത്തിയാക്കുകയും പിസിആര്‍ പരിശോധനയും നടത്തണമെന്നും നിര്‍ദേശം നല്‍കിയിട്ടുണ്ട്. പക്ഷേ പത്തു വിഭാഗത്തില്‍പ്പെടുന്നവര്‍ക്ക് ഇളവ് ലഭിക്കും.

നയതന്ത്ര പ്രതിനിധികള്‍, കുവൈത്ത് സ്‌കോളര്‍ഷിപ് രോഗികളും കൂടെയുള്ളവരും, സ്വദേശി വിദ്യാര്‍ത്ഥികള്‍ തുടങ്ങി പത്തു വിഭാഗങ്ങള്‍ക്ക് മാത്രം ഇളവ് അനുവദിക്കുമെന്നും ആരോഗ്യ മന്ത്രാലയ അധികൃതര്‍ വിശദമാക്കിയിട്ടുണ്ട്.

എന്നാല്‍ ഇളവ് ലഭിക്കുന്നവര്‍ ഇന്‍സ്റ്റിട്യൂഷണല്‍ ക്വാറന്റൈനു പകരം ഹോം ക്വാറന്റീന്‍ പൂര്‍ത്തിയാക്കി പിസിആര്‍ പരിശോധന നടത്തണമെന്നും അറിയിപ്പില്‍ പറയുന്നു.

അതേ സമയം കുവൈത്തില്‍ കോവിഡ് പ്രതിരോധ കുത്തിവെയ്പ്പ് ക്യാമ്പയിന് സര്‍ക്കാര്‍ പരമപ്രാധാന്യം നല്‍കുന്നു. അതിവേഗം രാജ്യത്തെ 70 ശതമാനം ജനങ്ങള്‍ക്കും കുത്തിവെയ്പ്പ് പൂര്‍ത്തിയാക്കാന്‍ ആരോഗ്യമന്ത്രാലയം പദ്ധതി തയ്യാറാക്കിക്കഴിഞ്ഞു.

ആരോഗ്യ മന്ത്രി ഡോ.ബാസില്‍ അല്‍ സബാഹിന്റെ പ്രത്യേക നിര്‍ദേശപ്രകാരം കൂടുതല്‍ വാക്‌സിനേഷന്‍ ക്യാമ്പയിനുകള്‍ സംഘടിപ്പിക്കുകയും വ്യാപാര സ്ഥാപനങ്ങളിലും മാളുകള്‍ കേന്ദ്രീകരിച്ചും തൊഴിലാളികള്‍ കൂടുതലുള്ള ജോലി സ്ഥലങ്ങളില്‍ മൊബൈല്‍ യൂണിറ്റുകള്‍ എത്തി കുത്തിവെയ്പ്പ് പൂര്‍ത്തിയാക്കുകയാണ്.

രാജ്യത്തെ 70 ശതമാനം പേര്‍ക്കും കോവിഡ് വാക്‌സിനേഷന്‍ പൂര്‍ത്തിയാക്കി നിലവിലുള്ള നിയന്ത്രണങ്ങള്‍ ലഘൂകരിക്കാനാണ് സര്‍ക്കാരിന്റെ നീക്കം. ഇതിനകം 20 ലക്ഷം പേര്‍ക്ക് കുത്തിവെയ്പ്പ് നടത്തിയതായും പ്രതിദിനം 30,000 ത്തോളം പേരെ കുത്തിവെയ്പ്പ് നടത്താന്‍ കഴിയുന്നതായും ആരോഗ്യ മന്ത്രാലയ കണക്കുകള്‍ വെളിപ്പെടുത്തുന്നു.