കൊറോണ വ്യാപനം വീണ്ടും മുറുകുമ്പോൾ ഇത്തവണയും പെട്ടത് പ്രവാസികൾ തന്നെയാണ്. ഗൾഫ് രാഷ്ട്രങ്ങൾ ഇതിനോടകം തന്നെ ഇന്ത്യ ഉൾപ്പടെ നിരവധി രാജ്യങ്ങൾക്ക് വിലക്ക് ഏർപ്പെടുത്തി കഴിഞ്ഞു. ഒപ്പം മറ്റുരാഷ്ട്രങ്ങൾ ഇടത്താവളമാക്കി വരുന്നവർക്ക് കടുത്ത നിബന്ധനകളും ഏർപ്പെടുത്തിയിരുന്നു. അതിൽ ഏറെ പ്രധാനപ്പെട്ട ഒന്നാണ് കോവിഡ് വാക്‌സിൻ. അധികൃതർ വാക്‌സിൻ സ്വീകരിച്ചവർക്ക് മുൻഗണന നൽകുകയാണ് ചെയ്യുന്നത്.

പല ഗൾഫ് രാഷ്ട്രങ്ങളും ഇതിനോടകം തന്നെ പുറത്തിറങ്ങാൻ പോലും വാക്‌സിൻ എടുത്തിരിക്കണം എന്ന നിബന്ധന കൊണ്ടുവന്നു. ഇതിനുപിന്നാലെ സർക്കാരിനോട് പ്രവാസികൾ ഉന്നയിച്ച ആവശ്യവും ഇത് തന്നെയാണ്. വാക്‌സിൻ എടുക്കാൻ മുൻഗണന നൽകണം എന്നത്. ഇപ്പോഴിതാ അത് യാഥാർഥ്യത്തെ കൊണ്ടുവന്നിരിക്കുകയാണ്.

കേരളത്തില്‍ നിന്ന് ജോലിക്കോ പഠന ആവശ്യങ്ങള്‍ക്കോ ആയി വിദേശത്തേക്ക് പോകുന്നവര്‍ക്ക് വാക്സിനേഷന്‍ നിര്‍ബന്ധമാണെങ്കില്‍ അത് നല്‍കാനുള്ള സംവിധാനമുണ്ടാക്കുമെന്ന് മുഖ്യമന്ത്രി പിണറായി വിജയന്‍ കഴിഞ്ഞ ദിവസം വാർത്താസമ്മേളനത്തിലൂടെ പറയുകയുണ്ടായി. സ്‍കോളര്‍ഷിപ്പുകളുടെ ഭാഗമായി പോകേണ്ടവരെയും ഇതില്‍ പരിഗണിക്കുന്നതാണ്. വിദേശത്ത് പോകുന്നവര്‍ക്ക് കൊവിഡ് വാക്സിനേഷന്‍ സര്‍ട്ടിഫിക്കറ്റില്‍ പാസ്‍പോര്‍ട്ട് നമ്പര്‍ ആവശ്യമാണെങ്കില്‍ അതിന് പ്രത്യേകം അപേക്ഷ നല്‍കിയാല്‍, പാസ്‍പോര്‍ട്ട് നമ്പര്‍ കൂടി ഉള്‍പ്പെടുത്തിയ സര്‍ട്ടിഫിക്കറ്റ് നല്‍കുമെന്നും അദ്ദേഹം പറഞ്ഞു.

കൂടാതെ പ്രവാസികള്‍ക്ക് ജീവിത കാലം മുഴുവന്‍ സാമ്പത്തിക സുരക്ഷ നല്‍കുന്ന പ്രവാസി ഡിവിഡന്റ് പദ്ധതിയുടെ ഈ വര്‍ഷത്തെ രജിസ്‍ട്രേഷന്‍ തുടങ്ങിയതായും വാര്‍ത്താസമ്മേളനത്തില്‍ മുഖ്യമന്ത്രി വ്യക്തമാക്കി. ഡിവിഡന്റ് പദ്ധതിയുടെ ലാഭ വിഹിതം 10 ശതമാനമായി സര്‍ക്കാര്‍ നിലനിര്‍ത്തുകയും ചെയ്തിട്ടുണ്ട്. ഇതിനായി സബ്‍സിഡി 0.7 ശതമാനം വര്‍ദ്ധിപ്പിച്ചു. കിഫ്‍ബിയുടെ സഹകരണത്തോടെ കേരള പ്രവാസി ക്ഷേമ ബോര്‍ഡാണ് പദ്ധതി നടപ്പാക്കുന്നത്.

അതേസമയം നിക്ഷേപ സുരക്ഷയോടെയൊപ്പം പ്രവാസി കേരളീയര്‍ക്കും ജീവിത പങ്കാളിക്കും ആജീവനാന്തം പ്രതിമാസ സുരക്ഷിത വരുമാനം ഉറപ്പാക്കുന്ന പദ്ധതിക്ക് വന്‍ സ്വീകരണമാണ് കഴിഞ്ഞ വര്‍ഷം പ്രവാസികള്‍ നല്‍കിയതെന്ന് പറഞ്ഞ മുഖ്യമന്ത്രി, ഇത്തവണയും അത് ആവര്‍ത്തിക്കുമെന്ന പ്രതീക്ഷയും പങ്കുവെച്ചു. പ്രവാസി ഡിവിഡന്റ് പദ്ധതി എല്ലാ പ്രവാസികളും പ്രയോജനപ്പെടുത്തണമെന്നും അദ്ദേഹം അഭ്യര്‍ത്ഥിച്ചു. ഇത്തരത്തിൽ നിരവധി കാര്യങ്ങളാണ് പ്രവാസികൾക്കായി സർക്കാർ ഒരുക്കിയിരിക്കുന്നത്.