ലോകത്താദ്യമായി യു.എ.ഇയിൽ സമുദ്രമധ്യത്തിൽ വീടുകൾ വിൽപനക്ക്... കപ്പൽ നിർമാതാക്കളായ സീഗേറ്റ് ഷിപ്പ് യാർഡ് ആണ് കടലിന് ഇണങ്ങുന്ന രീതിയുള്ള ഒഴുകുന്ന വീടുകളുടെ നിർമാണം പൂർത്തീകരിച്ച് വിൽപനക്ക് വെച്ചത്. രണ്ട് കോടി ദിർഹമിനാണ് നാല് കിടപ്പ് മുറികളുള്ള രണ്ട് നില വീട് വിറ്റുപോയത്.

അബു സബാഹ് എന്നറിയപ്പെടുന്ന ദുബായ് കേന്ദ്രമായി പ്രവർത്തിക്കുന്ന വ്യവസായി ബൽവീന്ദർ സഹാനിയാണ് ഈ സ്വപ്‌ന വീട് പൊന്നുംവില നൽകി സ്വന്തമാക്കിയത്.വീടിന്റെ വില ഇന്ത്യൻ കറൻസിയിലേക്ക് മാറ്റിയാൽ ഏകദേശം 40 കോടി രൂപ വരും .. നെപ്ട്യൂൺ സീ റിസോർട്ട് എന്നാണ് കടൽവെള്ളത്തിൽ പൊങ്ങി കിടക്കുന്ന ഈ പാർപ്പിട സമുച്ചയ പദ്ധതിയുടെ പേര്.

ലോകത്തിലെ തന്നെ ആദ്യത്തെ ജലത്തിൽ പൊങ്ങിക്കിടക്കുന്ന വീടാണിത്. അറ്റാച്ച്ഡ് വാഷ് റൂം, ബാൽക്കണി, ഗ്ലാസ്സ് സ്വമ്മിംഗ് പൂൾ, അടുക്കള, ലിവിംഗ് റൂം, തൊഴിലാളികൾക്ക് താമസിക്കാൻ രണ്ട് അധിക മുറികൾ, ഗ്ലാസ് ഫ്‌ളോറിംഗ് എല്ലാം കൂടി 900 സ്‌ക്വയർ മീറ്ററാണ് വീടിന്റെ വലിപ്പം. കരയിൽ കാണുന്ന വീടിന്റെ എല്ലാ സൗകര്യവുമുണ്ട് എന്നതാണ് ഈ വീടിന്റെയും പ്രത്യേകത.

ഇനി ഒരു സ്ഥലത്ത് തന്നെ ജീവിച്ചു ബോറടി തോന്നിയാൽ കടൽ വീടുമായി മറ്റൊരിടത്തേക്ക് മാറുകയും ചെയ്യാം. അനിവാര്യഘട്ടങ്ങളിൽ പ്രത്യേക ഹൈഡ്രോളിക്ക് എൻജിൻ പ്രവർത്തിച്ചാൽ വീട് ചലിച്ച് തുടങ്ങും. വീട് മുഴുവനായും സുരക്ഷാ സംവിധാനങ്ങൾ ഒരുക്കിയിട്ടുണ്ട്.

അത്യാധുനിക രീതിയിലാണ് സാങ്കേതിക സൗകര്യങ്ങൾ ഒരുക്കിയിരിക്കുന്നത്. മലിന ജലം കൊണ്ടുള്ള സ്മാർട്ട് ടെക്‌നോളജിയിലൂടെ ഊർജം ഉൽപാദിപ്പിക്കുകയും സോളാർ പവർ ഉപയോഗിച്ച് വൈദ്യുതി ലഭിക്കുകയും ചെയ്യുന്നു.

റാസൽഖൈമയിലെ അൽഹംറ തുറമുഖത്താണ് കടൽവീടിന്റെ ലോഞ്ചിംഗ് നടന്നത്. യു.എ.ഇയെ ഏറ്റവും വലിയ വിനോദ സഞ്ചാര നിക്ഷേപ സൗഹൃദ രാജ്യമാക്കി മാറ്റുകയാണ് ഈ പദ്ധതിയിലൂടെ ലക്ഷ്യമിടുന്നതെന്ന് സീഗേറ്റ് ഷിപ്പ് യാർഡ് സി.ഇ.ഒ മുഹമ്മദ് അൽബറായ് പറഞ്ഞു. 156 സ്യൂട്ട് റൂമുകളുള്ള ഒരു നക്ഷത്ര ഹോട്ടലും ഇതേ മാതൃകയിലുള്ള 12 വീടുകളും കമ്പനിയുടെ പദ്ധതിയിലുണ്ട്. കപ്പൽ നിർമാണ കമ്പനിയായ സീഗേറ്റാണ് ഈ പദ്ധതിയുടെ നിർമ്മാതാക്കൾ.

റാസൽഖൈമയിലെ അൽഹംറ തുറമുഖത്ത് നീറ്റിലിറക്കുന്ന ഈ വീടുകൾ ദുബൈ തീരത്താണ് സ്ഥിരമായുണ്ടാവുക. ഹൈഡ്രോളിക് സംവിധാനം ഉപയോഗിച്ച് ഇടക്കിടെ കടലിൽ സ്ഥലം മാറാം എന്നുള്ളതാണ് ഏറ്റവും വലിയ ആകർഷണീയത. .

156 സ്യൂട്ടുകളുള്ള ഹോട്ടൽ, 12 താമസബോട്ടുകൾ എന്നിവയടക്കമുള്ള ഭീമൻ റിസോർട്ട് എന്നിവ ഉൾക്കൊള്ളുന്ന പദ്ധതി 2023 ലാണ് പൂർത്തിയാവുക.