പ്രവാസികള്ക്ക് ആശ്വാസമായി ഇന്ത്യയില് നിന്നു യുഎഇയിലേയ്ക്കുള്ള വിമാന സര്വീസ് ജൂലൈ 7ന് ആരംഭിക്കുമെന്ന് എമിറേറ്റ്സ്
പ്രവാസികള്ക്ക് ആശ്വാസമായി ഇന്ത്യയില് നിന്ന് യുഎഇയിലേയ്ക്കുള്ള യാത്രാ വിമാന സര്വീസ് ജൂലൈ 7ന് പുനഃരാരംഭിക്കുമെന്നു പ്രതീക്ഷിക്കുന്നതായി എമിറേറ്റ്സ് എയര്ലൈന്സ് അധികൃതര് അറിയിച്ചു. യുഎഇ ഗവ.വകുപ്പുകളില് നിന്ന് ഇതിനായുള്ള മാര്ഗനിര്ദേശങ്ങള്ക്കും അനുമതിക്കുമായി കാത്തിരിക്കുകയാണ്.
വൈകാതെ ഇതുസംബന്ധമായി കൂടുതല് വിവരങ്ങള് പുറത്തുവിടുമെന്ന് ഒരു യാത്രക്കാരന്റെ സംശയത്തിനുള്ള മറുപടിയായി എമിറേറ്റ്സ് അധികൃതര് തങ്ങളുടെ ട്വിറ്റര് പേജിലൂടെ പറഞ്ഞു. കഴിഞ്ഞ ദിവസങ്ങളില് വിമാന സര്വീസ് പുനരാരംഭിക്കുന്നതുമായി ബന്ധപ്പെട്ട് വന്ന അടിസ്ഥാനരഹിതമായ റിപ്പോര്ടുകള് യാത്ര ചെയ്യാനായി കാത്തിരിക്കുന്ന തന്നില് ആശയക്കുഴപ്പമുണ്ടാക്കിയതിനാല് കൃത്യമായ വിവരം ലഭിക്കുമോ എന്നായിരുന്നു നിഖില് ജയ് സിംഘാനി എന്ന യാത്രക്കാരന് ആരാഞ്ഞത്. നോട്ടോമെന്(നോട്ടീസ് ടു എയര്മെന്) അടിസ്ഥാനമാക്കിയായിട്ടായിരുന്നു ഈ റിപ്പോര്ട്ടുകള്.
എന്നാല്, നോട്ടോമെന് എല്ലാ ദിവസവും പുറത്തിറക്കുന്നതാണെന്ന് അധികൃതര് മറുപടി നല്കിയിരുന്നു. അതേസമയം, എമിറേറ്റ്സിന്റെ വെബ് സൈറ്റില് ജൂലൈ 7 മുതലുള്ള ടിക്കറ്റ് വില്പന ആരംഭിച്ചിട്ടുണ്ട്. മുംബൈയില് നിന്ന് ദുബായിലേയ്ക്ക് വണ്വേ എക്കണോമി ടിക്കറ്റ് നിരക്ക് 43,683 രൂപയാണ്. എന്നാല്, എയര് ഇന്ത്യ, എയര് ഇന്ത്യാ എക്സ്പ്രസ്, മറ്റു സ്വകാര്യ വിമാനകമ്ബനികള് എന്നിവ ഇതുവരെ ടിക്കറ്റ് ബുക്കിങ് പുനരാരംഭിച്ചിട്ടില്ല.
ജൂലൈ 6 വരെയാണ് നിലവില് ഇന്ത്യയുഎഇ വിമാന സര്വീസ് ഉണ്ടാകില്ലെന്ന് അധികൃതര് അറിയിച്ചിട്ടുള്ളത്. എയര് ഇന്ത്യ അധികൃതരും കഴിഞ്ഞ ദിവസം അറിയിപ്പ് പുറപ്പെടുവിച്ചിരുന്നു. ഈ മാസം 23 മുതല് ഇന്ത്യയില് നിന്നുള്ള യാത്രാ വിലക്ക് യുഎഇ അധികൃതര് കര്ശന നിബന്ധനകളോടെ നീക്കം ചെയ്തു. ദേശീയ ദുരന്ത നിവാരണ സമിതിയെ ഉദ്ധരിച്ച് ദുബായ് മീഡിയാ ഓഫീസ് ഈ വിവരം ട്വീറ്റ് ചെയ്തിരുന്നു.
വിമാന സര്വീസ് ജൂലൈ 7ന് പുനരാരംഭിക്കുമെന്ന പ്രതീക്ഷ കൈവന്നതോടെ അവധിക്കാലം ചെലവഴിക്കാനായി നാട്ടിലെത്തി യാത്രാ വിലക്കിനെ തുടര്ന്ന് കുടുങ്ങിക്കിടക്കുന്നവര്, പുതിയ തൊഴില് വീസ, സന്ദര്ശക വീസ എന്നിവയില് വരാനിരിക്കുന്ന മലയാളികളടക്കം ഒട്ടേറെ ഇന്ത്യക്കാര് ആഹ്ളാദത്തിലായി. മാസങ്ങളായി മടങ്ങിവരാനാകാത്തതിനാല് പലരുടെയും യുഎഇയിലെ ജോലി പോലും ആശങ്കയിലാണ്.
ഇന്ത്യയിലെ കോവിഡ് വ്യാപന പശ്ചാത്തലത്തില് ഏപ്രില് 25 നാണ് ഇന്ത്യയില് നിന്നുളള നിമാന സര്വീസുകള്ക്ക് യുഎഇ വിലക്കേര്പ്പെടുത്തിയത്.
https://www.facebook.com/Malayalivartha
