ദുബൈയില്‍ നിന്ന് സൗദിയിലേക്ക് പുറപ്പെട്ട ബസിന് തീപിടിച്ചു. നാട്ടില്‍ നിന്ന് ദുബൈയിലെത്തി 14 ദിവസം ക്വാറന്റീനില്‍ കഴിഞ്ഞ ശേഷം സൗദിയിലേക്ക് പുറപ്പെട്ട മലയാളികളും ഉത്തര്‍പ്രദേശുകാരും സഞ്ചരിച്ച ബസിനാണ് തീപിടിച്ചത്.

യാത്ര തിരിച്ച ബസ് ദമ്മാമിന് 300 കിലോമീറ്ററകലെ വെച്ച് പൂര്‍ണമായി കത്തി നശിക്കുകയായിരുന്നുവെന്നാണ് വിവരം. പൂര്‍ണമായും കത്തിനശിച്ച ബസില്‍ നിന്ന് യാത്രക്കാര്‍ അത്ഭുതകരമായി ആര്‍ക്കും പരിക്കുകള്‍ പോലും ഇല്ലാതെ രക്ഷപ്പെട്ടു എന്നതാണ് ഏടുത്തുപറയേണ്ട ഒരു കാര്യം. 27 പേര്‍ മലയാളികളും 9 ഉത്തര്‍പ്രദേശ് സ്വദേശികളും ഉള്‍പ്പെടെ 36 യാത്രക്കാരാണ് ബസിലുണ്ടായിരുന്നത്.

യാത്ര പുറപ്പെട്ട് മണിക്കൂറുകള്‍ക്കകം ബസ് തകരാറിലാകുകയും സമീപത്തുള്ള വര്‍ക്ക് ഷോപ്പില്‍ തകരാര്‍ പരിഹരിച്ച് യാത്ര തുടരുകയായിരുന്നു. ദമ്മാം എത്തുന്നതിന് 300 കിലോമീറ്റര്‍ അകലെവെച്ച് ബസിന്റെ പിന്‍വശത്തുനിന്നും ശക്തമായ ചൂട് അനുഭവപ്പെടുകയും പുക ഉയരുകയും ചെയ്തതായി യാത്രക്കാര്‍ ഡ്രൈവറെ അറിയിച്ചു.

വാഹനം നിര്‍ത്തി യാത്രക്കാര്‍ മുഴുവന്‍ പുറത്തിറങ്ങി നിമിഷങ്ങള്‍ക്കകം ബസ് പൂര്‍ണ്ണമായും കത്തിയമരുകയായിരുന്നു.യാത്രക്കാര്‍ പരിക്കുകള്‍ കൂടാതെ രക്ഷപെട്ടെങ്കിലും പലരുടെയും ലഗേജുകളും രേഖകളും കത്തിനശിച്ചു. മൊബൈല്‍ ഫോണുകളും, പാസ്‌പോര്‍ട്ട് ഉള്‍പ്പടെയുള്ള രേഖകളും ഇതില്‍ പെടുന്നവയാണ്.

ബസിന്റെ പുറകില്‍ തീ കണ്ട ഉടനെ ഡ്രൈവറെ വിവരം അറിയിച്ച് ബസ് നിര്‍ത്തിച്ച് യാത്രക്കാരെല്ലാം ഇറങ്ങിയോടിയത് കൊണ്ട് വലിയൊരു ദുരന്തമാണ് ഒഴിവായത്.