നാട്ടിലെത്തിയ പ്രവാസി അവധി കഴിഞ്ഞ് ഗള്‍ഫിലേക്ക് മടങ്ങാനായി കൊവിഡ് പരിശോധനയ്ക്ക് പോകവേ വാഹനാപകടത്തില്‍ മരിച്ചു. കൂടെയുണ്ടായിരുന്ന ഭാര്യാ സഹോദരപുത്രനെ ഗുരുതരമായ പരിക്കുകളോടെ സ്വകാര്യ മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു.

ചവറ കൃഷ്ണന്‍ നടയ്ക്ക് സമീപം നടയില്‍ കിഴക്കതില്‍ രാധാകൃഷ്ണപ്പിളളയാണ് (58) മരിച്ചത്. ഒപ്പമുണ്ടായിരുന്ന അര്‍ജുനാണ് (20) ഗുരുതരാവസ്ഥയില്‍ ചികിത്സയിലുളളത്. വ്യാഴാഴ്ച വൈകിട്ട് അഞ്ചോടെ ബൈപ്പാസ് റോഡില്‍ പാലത്തറക്കടുത്തായിരുന്നു അപകടം നടന്നത്.

ഷാര്‍ജയില്‍ നിന്ന് നാട്ടിലെത്തിയ രാധാകൃഷ്ണപിളള ശനിയാഴ്ച തിരികെ പോകുന്നതിനായി പാലത്തറയിലുളള സഹകരണ ആശുപത്രിയില്‍ ആര്‍.ടി.പി.സി.ആര്‍ നടത്തുന്നതിനായി വരുമ്പോഴാണ് സ്‌കൂട്ടറില്‍ കാറിടിച്ചത്.

ഉടന്‍ അടുത്തുളള സഹകരണ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല.