എത്രതന്നെ പ്രവാസികൾ ഗൾഫ് രാഷ്ട്രങ്ങളിലേക്ക് കുടിയേറിപ്പാർത്താലും തൊഴിൽ തേടി എത്തിയാലും സ്വന്തം നാടും കുടുംബവും മാത്രമാകും അവരുടെ മനസ്സിൽ. നാലു ചുവരുകൾക്കുള്ളിൽ ഗൃഹാതുരത നൽകുന്ന ഓർമകളുമായി അവർ ഉണ്ടാകും. അതുതന്നെയാകും സ്വന്തം നാടിനോ നാട്ടുകാർക്കോ എന്തെങ്കിലും സംഭവിച്ചാൽ അവർ ആദ്യം ഓടിയെത്തുന്നത്. പ്രളയം കേരളത്തെ ഒന്നാകെ പ്രതിസന്ധിയിലാക്കിയപ്പോൾ ആദ്യം സാമ്പത്തികമായി കൈത്താങ്ങായത് പ്രവാസികൾ തന്നെ.... അവർ നമ്മുടെ നാടിൻറെ നട്ടെല്ല് തന്നെയാണ്... എന്നാൽ ഇപ്പോഴിതാ ഏറെ അമ്പരപ്പിക്കുന്ന വാർത്തയാണ് പുറത്ത് വരുന്നത്.

പ്രവാസിഭക്തന്റെ കാണിക്കയായി വടക്കുന്നാഥക്ഷേത്രത്തിലേക്ക് 100 പവന്‍ തൂക്കമുള്ള സ്വര്‍ണ ആനയും ഒരുകോടി രൂപയും ലഭിച്ചിരിക്കുകയാണ്. സ്വര്‍ണ ആനയ്ക്ക് 45 ലക്ഷത്തോളം രൂപ വിലമതിക്കുമെന്നാണ് അറിയാൻ കഴിയുന്നത്. ആനയെ നടയിരുത്തുന്ന ചടങ്ങ് പ്രതീകാത്മകമായി നടത്തിയിട്ടുമുണ്ട്. കൊച്ചിന്‍ ദേവസ്വം ബോര്‍ഡിന്റെ ആന പഴയന്നൂര്‍ ശ്രീരാമനെയാണ് പ്രതീകാത്മകമായി ഇതിൽ നടയിരുത്തിയത്.

നടയിരുത്തലിന്റെ ചടങ്ങുകളിലെല്ലാം സ്വര്‍ണ ആനയെയും ഉള്‍പ്പെടുത്തിയിരുന്നതായും റിപ്പോർട്ടുകൾ ചൂണ്ടിക്കാണിക്കുന്നു. വെള്ളയും കരിമ്പടവും വിരിച്ച് ശ്രീരാമനെ ഇരുത്തിയതിനു സമീപം സ്വര്‍ണ ആനയെയും വെക്കുകയാണ് ചെയ്തത്. രണ്ട് ആനകള്‍ക്കും പൂജയുമുണ്ടായിരുന്നു. ക്ഷേത്രത്തിലെ വലിയബലിക്കല്ലിന് സമീപം പ്രത്യേകം സജ്ജമാക്കിയ സ്ഥലത്താണ് നടയിരുത്തല്‍ച്ചടങ്ങ് നടത്തിയിരുന്നത്. തന്ത്രി പുലിയന്നൂര്‍ ശങ്കരനാരായണന്‍ നമ്പൂതിരി ഈ ചടങ്ങിന് നേതൃത്വം നല്‍കി.

അതോടൊപ്പം തന്നെ ചടങ്ങില്‍ ദേവസ്വം അസിസ്റ്റന്റ് കമ്മിഷണര്‍ എം.ജി. ജഗദീഷ്, മാനേജര്‍ പി. കൃഷ്ണകുമാര്‍, സമിതി പ്രസിഡന്റ് പി. പങ്കജാക്ഷന്‍, സെക്രട്ടറി ടി.ആര്‍. ഹരിഹരന്‍, പി. ശശിധരന്‍, രാമകൃഷ്ണന്‍, ജീവധനം മാനേജര്‍ ഇ.ഡി. അഖില്‍ എന്നിവര്‍ പങ്കെടുക്കുകയുണ്ടായി. എന്നാൽ നിമിഷങ്ങൾക്കകം തന്നെ സംഭവം വൈറലായിരിക്കുകയാണ്. സമൂഹമാധ്യമങ്ങളിലടക്കം ചിത്രങ്ങൾ വ്യാപകമായി പ്രചരിച്ചതോടെ ഗൾഫിൽ മലയാളികളും ഏറ്റെടുത്തുകഴിഞ്ഞു. എന്നാൽ പ്രവാസി ഭക്തൻ എന്നതല്ലാതെ മറ്റൊരു വിവരങ്ങളും പുറത്ത് വന്നിട്ടില്ല.