പ്രവാസികളെ ഏറെ ദുഃഖത്തിലാഴ്ത്തി കാനഡയിലെ സൗത്ത് സെറിയിൽ മൂന്നുദിവസം മുൻപുണ്ടായ വാഹനാപകടത്തിൽ പരിക്കേറ്റ് ചികിത്സയിലായിരുന്ന യുവതി മരിച്ചതായി റിപ്പോർട്ട്. പാലാ കരൂർ മാര്യപ്പുറം ഡോ. അനിൽ ചാക്കോയുടെ ഭാര്യ ശിൽപ ബാബു ആണ് കഴിഞ്ഞ ദിവസം മരിച്ചത്. 44 വയസായിരുന്നു. ശിൽപ കാനഡയിൽ സ്റ്റാഫ് നഴ്സായിരുന്നെന്ന് ഒരു പ്രമുഖ മാധ്യമം റിപ്പോർട്ട് ചെയ്യുകയുണ്ടായി.

കഴിഞ്ഞദിവസം സംഗീത ക്ലാസിന് പോയ മക്കളെ തിരികെ കൊണ്ടുവരാൻ പോകുന്നതിനിടെയായിരുന്നു ശിൽപയെ വാഹനമിടിച്ചത്. രണ്ട് വാഹനങ്ങൾ തമ്മിൽ കൂട്ടിയിടിക്കുകയും അതിലൊന്ന് റോഡരികിൽ നിൽക്കുകയായിരുന്ന ശിൽപയെ ഇടിക്കുകയുമായിരുന്നു എന്നാണ് റിപ്പോർട്ടുകൾ വ്യക്തമാക്കുന്നത്. ഗുരുതരമായി പരിക്കേറ്റ യുവതിയെ ആശുപത്രിയിൽ പ്രവേശിപ്പിച്ചെങ്കിലും ചികിത്സയിലിരിക്കെ തന്നെ മരണം സംഭവിക്കുകയായിരുന്നു.

കോട്ടയം ചാഴികാട്ട് ബാബുവിന്‍റെ മകളാണ് ശിൽപ. ഭർത്താവ് അനിൽ ചാക്കോ കാനഡയിൽ ഡോക്ടറാണ്. പാലാ ബ്ലൂമൂൺ ഹോട്ടൽ ഉടമ ചാക്കോച്ചന്‍റെ മകനാണ് ഡോ.അനിൽ. മക്കൾ: നോഹ, നീവ്.