യുഎഇ പതാക ദിനാഘോഷങ്ങളുടെ ഭാഗമായി ദുബൈയിലെ എല്ലാ ശാഖകളിലും കൊമേഴ്‌സ്യൽ കേന്ദ്രങ്ങളിലും ദുബൈയിലെ തന്ത്രപ്രധാന സ്ഥലത്ത് സ്ഥിതി ചെയ്യുന്ന കെട്ടിടങ്ങളിലുമായി 42 പതാകകൾ ഉയർത്തി യൂണിയൻ കോപ്. സ്വന്തം രാജ്യത്തോടും രാജ്യത്തെ മികച്ച ഭരണ നേതൃത്വത്തോടുമുള്ള വിശ്വാസ്യതയും കൂറും പുലർത്തി, മാതൃക സൃഷ്ടിച്ചിരിക്കുകയാണ് യൂണിയൻ കോപ്.

അൽ വർഖ സിറ്റി മാൾ ബിൽഡിങിൽ നടന്ന പതാക ഉയർത്തൽ ചടങ്ങിൽ യൂണിയൻ കോപിൻറെ ഡിവിഷൻ, ഡിപ്പാർട്ട്മെൻറ് ഡയറക്ടർമാർ, സെക്ഷൻ മാനേജർമാർ യൂണിയൻ കോപിലെ നിരവധി ജീവനക്കാർ എന്നിവർ പങ്കെടുത്തു. യൂണിയൻ കോപിന്റെ എല്ലാ ശാഖകളിലും കൊമേഴ്‌സ്യൽ സെന്ററുകളിലും മറ്റ് യൂണിയൻ കോപ് കെട്ടിടങ്ങളിലും വിവിധ ശാഖകളിലെയും കോ ഓപ്പറേറ്റീവിൻറെ കേന്ദ്രങ്ങളിലെയും മാനേജർമാരുടെ നേതൃത്വത്തിൽ ദേശീയ പതാക ഉയർത്തി.

ജീവനക്കാരും ഉപഭോക്താക്കളും ചടങ്ങുകളിൽ പങ്കെടുത്തു. ആഘോഷത്തിന്റെ ഭാഗമായി വിവിധ ശാഖകളിലും കൊമേഴ്‌സ്യൽ കേന്ദ്രങ്ങളിലുമെത്തിയ ഉപഭോക്താക്കൾക്ക് യൂണിയൻ കോപ് ജീവനക്കാർ യുഎഇ പതാക വിതരണം ചെയ്തു. തങ്ങളുടെ പ്രിയപ്പെട്ട രാജ്യത്തോടുള്ള സ്നേഹം പ്രകടിപ്പിക്കാനും ഭരണാധികാരികളോടുള്ള വിശ്വാസ്യതയും കൂറും പുതുക്കാനുമുള്ള അവസരമാണിതെന്ന് യൂണിയൻ കോപ് സിഇഒ പറഞ്ഞു.

ദേശീയ പതാക ഉയർത്തുന്നതിനായി യൂണിയൻ കോപിൻറെ ഭാഗമായിട്ടുള്ള എല്ലാവരും കാത്തിരിക്കുന്ന അവസരമാണിതെന്നും ഐക്യത്തിൻറെയും ദേശീയ അഖണ്ഡതയുടെയും അടയാളമായാണ് ഇതിനെ കാണുന്നതെന്നും അദ്ദേഹം കൂട്ടിച്ചേർത്തു. എല്ലാ മേഖലകളിലും യുഎഇ കൈവരിച്ച നേട്ടങ്ങളുടെ ഓർമ്മ പുതുക്കാനുള്ള ദിനം കൂടിയാണിതെന്നും അതിനാലാണ് ലോകത്തിലെ മറ്റ് രാജ്യങ്ങൾക്ക് മാതൃകയാകാൻ കഴിയുന്നതെന്നും കോഓപ്പറേറ്റീവ് ചൂണ്ടിക്കാട്ടി.

എല്ലാ വർഷവും ജീവനക്കാരും ഉപഭോക്താക്കളുമായി വിവിധ ശാഖകകളിലും കൊമേഴ്സ്യൽ സെൻററുകളിലും ഈ അവസരം യൂണിയൻ കോപ് ആഘോഷിക്കാറുണ്ടെന്നും ഈ ദേശീയ അവസരത്തിൽ എല്ലാ സ്ഥാപനങ്ങളും സർക്കാർ ഏജൻസികളും ഒത്തുചേർന്ന് എമിറേറ്റിൻറെ ഒരുമയും, യുഎഇ തങ്ങൾക്ക് പകരുന്ന ശക്തിയും അഭിമാനവും തെളിയിക്കാറുണ്ടെന്നും കോഓപ്പറേറ്റീവ് ചൂണ്ടിക്കാട്ടി.