ഉത്സവ സീസൺ പ്രമാണിച്ച് എയർ ഇന്ത്യ എക്സ് പ്രസ് അടക്കമുള്ള വിമാന കമ്പനികള്‍ പ്രവാസികളെ ലക്ഷ്യമിട്ട് നിരക്ക് കുത്തനെ വർദ്ധിപ്പിച്ചിരുന്നു. പലരും ഇത്തവണ നാട്ടിലെത്തിയത് ഭീമമായ തുക മുടക്കിയാണ്. എന്നാൽ തിരികെ മടങ്ങാനും ഇത്രയും തുക മുടക്കേണ്ടിവരുമെന്നുള്ള പ്രവാസികളുടെ ആശങ്കയ്ക്ക് അൽപ്പം ആശ്വാസമേകുന്ന വാർത്തയാണ് പുറത്തുവന്നിരിക്കുന്നത്. വിദ്യാലയങ്ങളിലെ ശൈത്യകാല അവധിയും ക്രിസ്മസും മുന്നില്‍ കണ്ട് നാട്ടിലെത്തിയ പ്രവാസികളുടെ മടക്കയാത്രക്ക് ആശ്വാസമേകി വിമാനനിരക്ക് കുറച്ചിരിക്കുകയാാണ് കമ്പനികൾ.

കഴിഞ്ഞ ദിവസങ്ങളില്‍ കുത്തനെ വര്‍ധിപ്പിച്ച വിമാനയാത്ര നിരക്കാണ് ഇപ്പോൾ പകുതിയോളം കുറച്ചത്. ക്രിസ്മസ് ആഘോഷത്തിനായി നാട്ടില്‍ പോയവര്‍ തിരികെ വരുന്നതും പ്രതീക്ഷിച്ച്‌ ഡിസംബര്‍ 26 മുതല്‍ 1000 ദിര്‍ഹമിന് മുകളിലേക്ക് ആയിരുന്നു മുഴുവന്‍ വിമാന കമ്ബനികളും ടിക്കറ്റിന് ഈടാക്കിയിരുന്നത്.

എന്നാല്‍, എയര്‍ ഇന്ത്യ എക്സ് പ്രസ് അടക്കമുള്ള വിമാന കമ്പനികള്‍ അടുത്ത ദിവസങ്ങളില്‍ 570 ദിര്‍ഹം മുതല്‍ കോഴിക്കോട്, കൊച്ചി എന്നിവിടങ്ങളില്‍ നിന്നും ഷാര്‍ജയിലേക്കും ദുബൈയിലേക്കും ടിക്കറ്റുകള്‍ ലഭ്യമാക്കി തുടങ്ങി. ആഴ്ചകള്‍ക്ക് മുന്നേ ഇതേ വിമാനങ്ങളില്‍ യാത്ര ചെയ്യാന്‍ മുന്‍കൂട്ടി ടിക്കറ്റ് എടുത്ത പലരും ഉയര്‍ന്ന നിരക്കില്‍ ടിക്കറ്റ് എടുത്തവരാണ്. ഡിസംബര്‍ 29, 30, 31 ദിവസങ്ങളില്‍ 575 ദിര്‍ഹം മുതല്‍ നിരക്ക് ഏർപ്പെടുത്തിയിരുന്നു. കോഴിക്കോട് നിന്നും ദുബൈ, ഷാര്‍ജ എന്നിവിടങ്ങളിലേക്കാണ് എയര്‍ ഇന്ത്യ എക്സ്പ്രസ് ഈ നിരക്ക് സജീകരിച്ചിരുന്നത്.

കോഴിക്കോട് നിന്നും കണ്ണൂരില്‍നിന്നും യു.എ.ഇയിലെ വിവിധ വിമാനത്താവളങ്ങളിലേക്ക് വരും ദിവസങ്ങളില്‍ സര്‍വിസ് നടത്തുന്ന വിമാനങ്ങളില്‍ ടിക്കറ്റുകള്‍ കാര്യമായി വിറ്റു പോയിട്ടില്ല എന്നാണ് കേരളത്തിലെ വിവിധ ട്രാവല്‍ ഏജന്‍സികള്‍ പറയുന്നത്. അതിനാല്‍ തന്നെ വരും ദിനങ്ങളില്‍ ടിക്കറ്റ് നിരക്ക് ഇനിയും കുറയുമെന്നാണ് ഇവര്‍ പ്രതീക്ഷിക്കുന്നത്.

ജനുവരി ആദ്യവാരവും കേരളത്തില്‍ നിന്ന് യു.എ.ഇയിലേക്ക് ഉയര്‍ന്ന നിരക്കാണ് ഈടാക്കിയിരുന്നത്. ജനുവരി ആദ്യവാരം കേരളത്തില്‍ നിന്നും യു.എ.ഇയിലേക്ക് 1500 ദിര്‍ഹമിന് മുകളിലായിരുന്നു വിവിധ വിമാന കമ്ബനികള്‍ ആഴ്ചകള്‍ക്കു മുന്നേ ഈടാക്കിയിരുന്നത്. അതും ഈ അടുത്ത ദിവസങ്ങളില്‍ 1000-1200 ദിര്‍ഹമായി കുറച്ചിരിക്കുകയാണ്.