അപകടം വിളിച്ചുവരുത്തിയത്, ടേക്ക് ഓഫിനിടെ പിൻചിറകിൽ അപകടമുണ്ടായതിന് കാരണം വിമാനത്തിന്റെ ഭാര നിർണ്ണയത്തിൽ പൈലറ്റാനുണ്ടായ പിഴവ്, സംഭവത്തിന് പിന്നാലെ പൈലറ്റിനെ സസ്പെന്റ് ചെയ്ത് എയർ ഇന്ത്യ എക്സ്പ്രസ്...!!
എല്ലാവരേയും വളരെ ആശങ്കയുടെ മുൾ മുനയിൽ നിർത്തിയ സംഭവമായിരുന്നു കഴിഞ്ഞ ദിവസം തിരുവനന്തപുരം വിമാനത്താവളത്തിൽ സാങ്കേതിക തകരാർ മൂലമുള്ള എയർ ഇന്ത്യ എക്സ്പ്രസിന്റെ അടിയന്തര ലാൻഡിങ്. ടേക്ക് ഓഫിനിടെ വിമാനത്തിന് തകരാർ സംഭവിക്കാൻ കാരണം പൈലറ്റിന്റെ പിഴവാണെന്ന വിലയിരുത്തലിന്റെ അടിസ്ഥാനത്തിൽ പൈലറ്റിനെതിരെ നടപടി.
സംഭവത്തിൽ പൈലറ്റിന് സസ്പെന്റ് ചെയ്തിരിക്കുകയാണ്. ടേക്ക് ഓഫിനിടെ പിൻചിറകിൽ അപകടമുണ്ടായതിന് കാരണം വിമാനത്തിന്റെ ഭാര നിർണ്ണയത്തിൽ പൈലറ്റാനുണ്ടായ പിഴവാണെന്നാണ് വിലയിരുത്തൽ. ഇന്നലെയാണ് കരിപ്പൂരിൽ നിന്നും ദമാമിലേക്ക് പറന്നുയർന്ന വിമാനം സാങ്കേതിക തകരാറിനെ തുടർന്ന് രണ്ടര മണിക്കൂറിന് ശേഷം അടിയന്തിരമായി തിരുവനന്തപുരത്തിറക്കേണ്ടി വന്നത്. രാവിലെ 9.44 ന് കരിപ്പൂരിൽ നിന്നും ടേക്ക് ഓഫ് ചെയ്തപ്പോൾ തന്നെ സാങ്കേതിക തകരാർ ശ്രദ്ധയിൽപ്പെട്ട പൈലറ്റ് എയർട്രാഫിക് കൺട്രോൾ റൂമിൽ വിവരം അറിയിച്ചു.
ആദ്യം കരിപ്പൂരിൽ തന്നെ അടിയന്തിരമായി ഇറക്കാൻ ശ്രമിച്ചെങ്കിലും അടിയന്തിര ലാൻഡിംഗിന് അനുമതി കിട്ടാത്തതിനെ തുടർന്ന് കൊച്ചിയിലേക്ക് പറന്നു. കൊച്ചിയിലും എമർജൻസി ലാൻഡിംഗ് അനുമതിയില്ലാത്തിനാലാണ് തിരുവനന്തപുരത്തിറക്കിയത്. ആദ്യം 11,10 ന് വിമാനത്തിന് അടിയന്തര ലാൻഡിംഗ് നടത്താൻ അനുമതി നൽകിയെന്ന വിവരം ലഭിച്ചെങ്കിലും ഇന്ധനം ഒഴുക്കിക്കളഞ്ഞ് ശേഷം അടിയന്തര ലാന്ഡിങ് നടത്തുമെന്ന വിവരം ലഭിക്കുകയായിരുന്നു.
തുടർന്ന് വിഴിഞ്ഞം ഭാഗത്തിനു മുകളിലൂടെ പറന്ന് വിമാനത്തിലെ ഇന്ധനം കടലിലൊഴുക്കുകയായിരുന്നു. പിന്നീട് തിരുവനന്തപുരം വിമാനത്താവളത്തിൽ വിമാനം സുരക്ഷിതമായി തന്നെ ലാൻഡ് ചെയ്യുകയായിരുന്നു. വിവരം അറിയിച്ചതിനെ തുടർന്ന് അടിയന്തര ലാൻഡിങ്ങിന് തിരുവനന്തപുരം വിമാനത്താവളത്തിൽ എല്ലാം വിധ സജ്ജീകരണങ്ങളും ഒരുക്കിയിരുന്നു.
168 യാത്രക്കാരാണ് വിമാനത്തിലുണ്ടായിരുന്നത്. തിരുവനന്തപുരത്ത് എത്തിയ ശേഷം വിമാനത്തിലെ യാത്രക്കാരെ ട്രാന്സിറ്റ് ലോഞ്ചിലേക്ക് മാറ്റി. ഹാങ്ങര് യൂണിറ്റിലേക്ക് മാറ്റിയ വിമാനം തകരാര് പരിഹരിച്ച ശേഷം കഴിഞ്ഞ ദിവസം നാലരയോടെ ദമാമിലേക്ക് തിരിച്ചു. സാങ്കേതിക തകരാറിന് കാരണം പൈലറ്റിന്റെ വീഴ്ചയാണെന്ന് എയര് ഇന്ത്യയുടെ ആഭ്യന്തര അന്വേഷണത്തില് കണ്ടെത്തിയതോടെ തിരുവനന്തപുരത്ത് നിന്ന് മറ്റൊരു പൈലറ്റാണ് വിമാനം നിയന്ത്രിച്ചത്.
സാങ്കേതിക തകരാർ മൂലം എയർഇന്ത്യ എക്സ്പ്രസിന്റെ വിമാനങ്ങൾ തിരിച്ചിറക്കണ്ടി വരുന്നത് അടുത്തിടെ പതിവ് സംഭവമാക്കുകയാണ്. ഇത്തരം സംഭവങ്ങൾ ആവർത്തിക്കുമ്പോഴും ഇതിന് കൃത്യമായ വിശദീകരണം നൽകാൻ എയർ ഇന്ത്യയ്ക്ക് സാധിക്കുന്നില്ല. കാലപ്പഴക്കം ചെന്ന വിമാനങ്ങളാണ് വിമാനക്കമ്പനി ഉപയോഗിക്കുന്നതെന്നും ഇതിനോടകം തന്നെ പരക്കെ ആക്ഷേപം ഉയർന്നു കഴിഞ്ഞു. ഇത്തരത്തിലുള്ള സംഭവങ്ങൾ വീണ്ടും ആവർത്തിക്കുന്നത് യാത്രക്കാരെ ഭയപ്പാടിലും ബുദ്ധിമൂട്ടിലുമാക്കുകയാണ്.
https://www.facebook.com/Malayalivartha
