ദുബായ് ഡ്യൂട്ടി ഫ്രീ മില്ലേനിയം മില്യനയര്‍ വിജയി മലയാളി. 25 വര്‍ഷമായി ഖത്തറിലെ ദോഹയില്‍ താമസമാക്കിയ അബ്ദുള്‍ റൗഫ് മുല്ലാളി കുന്നോന്റകത്തിനാണ് 10 ലക്ഷം ഡോളര്‍ ( ഏകദേശം 8,19,32,500 രൂപ ) സമ്മാനമായി ലഭിച്ചിരിക്കുന്നത്. ശനിയാഴ്ച ദുബായ് ഡ്യൂട്ടി ഫ്രീ ടെന്നിസ് ചാംപ്യന്‍ഷിപ്പ് പുരുഷ വിഭാഗം ജേതാവായ റഷ്യന്‍ ടെന്നീസ് താരം ഡാനില്‍ മെദ്‌വദേവാണ് സീരീസ് 416ന്റെ ടിക്കറ്റ് നറുക്കെടുത്തത്.

1771 എന്ന ടിക്കറ്റ് നമ്പറാണ് 55കാരനായ അബ്ദുള്‍ റൗഫിനെ സമ്മാനാര്‍ഹമാക്കിയത്. ഫെബ്രുവരി 16ന് ഓണ്‍ലൈനായാണ് ഇദ്ദേഹം ടിക്കറ്റെടുത്തത്. ദോഹയിലെ ഒരു ബില്‍ഡിംഗ് മെയിന്റനന്‍സ് കമ്പനിയില്‍ ഫിനാന്‍സ് മാനേജരാണിദ്ദേഹം. 2018 മുതല്‍ ദുബായ് ഡ്യൂട്ടി ഫ്രീ ടിക്കറ്റുകള്‍ വാങ്ങാറുള്ള ഇദ്ദേഹം പ്രമോഷനുകളില്‍ പങ്കെടുക്കുന്നതും പതിവാണ്. 1999ല്‍ മില്ലേനിയം മില്യനയര്‍ പ്രമോഷന്‍ ആരംഭിച്ചതിന് ശേഷം 10 ലക്ഷം ഡോളര്‍ നേടുന്ന 207ാമത്തെ ഇന്ത്യക്കാരനാണ് അബ്ദുള്‍ റൗഫ്.