സ്വന്തം മക്കളെ ഉപദ്രവിച്ചാൽ അത് ഏതൊരു ഒരച്ഛൻ അമ്മമാർക്കും അത് സഹിക്കാൻ പറ്റുന്ന കാര്യമല്ല. കുവൈത്തിൽ പ്രവാസിയായിരിക്കെ തന്റെ മകളെ പീഡിപ്പിക്കാൻ ശ്രമിച്ചയാളെ നാട്ടിലെത്തി വകവരുത്തിയിരിക്കുകയാണ് ഒരച്ഛൻ. പന്ത്രണ്ടുകാരിയായ മകളെ ലൈംഗികമായി പീഡിപ്പിക്കാൻ ശ്രമിച്ച ബന്ധുവിനെ പെൺകുട്ടിയുടെ പിതാവ് കൊലപ്പെടുത്തി അന്ന് വൈകിട്ടുതന്നെ കുവൈത്തിലേക്ക് മടങ്ങുകയും ചെയ്തു.

പൊലീസിൽ പരാതി നൽകിയിട്ടും പെൺകുട്ടിയെ പീഡിപ്പിക്കാൻ ശ്രമിച്ചയാളെ താക്കീത് നൽകി വിട്ടയച്ചതാണ് പ്രവാസിയെ ഇത്തരമൊരു കൊലപാതകം നടത്താൻ പ്രേരിപ്പിച്ചത്. ആന്ധ്രാപ്രദേശിലെ അന്നമയ്യ ജില്ലയിൽ ആണ് ഈ സംഭവം നടന്നത്. ഇതേ തുടർന്ന് പൊലീസ് അന്വേഷണം നടത്തിയെങ്കിലും കൊലപാതകത്തിന് പിന്നിൽ ആരെന്ന് കണ്ടുപിടിക്കാൻ കഴിഞ്ഞിരുന്നില്ല. പിന്നാലെ സ്വന്തം യുട്യൂബ് ചാനലിലൂടെ പിതാവ് തന്നെയാണ് ബന്ധുവിനെ കൊലപ്പെടുത്തിയെന്ന് ഏറ്റുപറഞ്ഞതും. വിവരം പുറംലോകം അറിയുന്നതും.

15 വർഷങ്ങളായി കുവൈത്തിൽ ജോലിചെയ്യുന്ന പിതാവിനൊപ്പമായിരുന്നു ഭാര്യയും മകളും താമസിച്ചിരുന്നത്. എന്നാൽ കുറച്ചുനാൾ കഴിഞ്ഞപ്പോൾ മകളെ നാട്ടിലുള്ള ഭാര്യയുടെ മാതാപിതാക്കളുടെ അടുത്താക്കി. എന്നാൽ പന്ത്രണ്ടുകാരിയായ മകളുടെ സംരക്ഷണച്ചുമതല ഭാര്യയുടെ ഇളയ സഹോദരിയെ ഏൽപ്പിച്ച് അടുത്തിടെ ഭാര്യമാതാവിനേയും അയാൾ കുവൈത്തിലേക്ക് കൊണ്ടുപോയി. ആദ്യം കുട്ടിയെ നോക്കുന്നതിൽ ഇവർ താൽപ്പര്യം പ്രകടിപ്പിച്ചെങ്കിലും പിന്നീട് കാരണം എന്താണെന്ന് വെളിപ്പെടുത്താതെ സംരക്ഷണ ചുമതല നിന്ന് ഒഴിഞ്ഞുമാറി. ഇതോടെ ഭാര്യയുടെ അമ്മ കുവൈത്തിൽ നിന്ന് നാട്ടിൽ തിരിച്ചെത്തി. ഈ സമയത്താണ് ബന്ധുവായ യുവാവ് പന്ത്രണ്ടുകാരിയെ ലൈംഗികമായി ഉപദ്രവിക്കാൻ ശ്രമിച്ചെന്ന് വ്യക്തമായത്.

പൊലീസിൽ പരാതി നൽകിയിട്ടും കാര്യമായ ഇടപെടലുകളുണ്ടായില്ല. പ്രതിയായ യുവാവിനെ താക്കീതുചെയ്ത് വിട്ടയച്ച പൊലീസ് പരാതിക്കാരെ ശകാരിക്കുകയും ചെയ്തു. ഈ വിവരം അറിഞ്ഞതോടെയാണ് മകളെ പീഡിപ്പിക്കാൻ ശ്രമിച്ചയാളെ നാട്ടിലെത്തി ഇല്ലാതാക്കാൻ പിതാവ് തീരുമാനിച്ചത്. എല്ലാം അതീവ രഹസ്യമായി പ്ളാൻചെയ്തു. രാവിലെ ആന്ധ്രയിലെത്തിയ പിതാവ് പ്രതിയെ ഇരുമ്പുവടികൊണ്ട് മർദ്ദിച്ച് കൊലപ്പെടുത്തുകയായിരുന്നു. അന്നുവൈകിട്ടുതന്നെ വിദേശത്തേക്ക് മടങ്ങി.

ഇതിനിടെയാണ് സ്വന്തം യുട്യൂബ് ചാനലിലൂടെ കൊലപാതകം നടത്തിയത് താനാണെന്ന് ഇയാൾ ഏറ്റുപറഞ്ഞത്. പ്രതിയെ നാട്ടിലെത്തിക്കാനുള്ള ശ്രമങ്ങൾ പൊലീസ് ആരംഭിച്ചിട്ടുണ്ട്. വ്യക്തമായ പ്ലാൻ തയാറാക്കിയാണ് യുവാവിനെ കൊലപ്പെടുത്താൻ കുവൈത്തിൽ നിന്ന് നാട്ടിലെത്തിയതും തിരിച്ച് മടങ്ങിയതും. ഉടൻതന്നെ പ്രതിയുടെ അറസ്റ്റ് ഉൾപ്പെടെയുള്ള തുടർ നടപടികൾ ഉണ്ടാകുമെന്നാണ് പോലീസ് അറിയിച്ചത്.